អន្តរជាតិ
ជប៉ុន៖ Hacker 100នាក់លួចលុយ១៣លានដុល្លារពីទូរ ATM
× ក្រុមHacker ដ៏ធំមួយនៅក្នុងប្រទេសជប៉ុន បានលួចលុយដល់ទៅ១.ពាន់លានយ៉េន ដែលស្មើនឹង១២.៧លានដុល្លារពីទូរATM ច្រើនជាងមួយរយ ក្នុងរយៈពេលតែពីរម៉ោងប៉ុណ្ណោះ កាលពីដើមខែឧសភា។ នេះបើយោងតាមរបាយការណ៍ក្នុងស្រុក ដែលស្រង់ប្រភពដោយសារព័ត៌មាន Asian Correspondence។
ដោយស្រង់ប្រភពព័ត៌មានក្នុងស្រុក សារព័ត៌មាន The Mainichi ផ្សាយថា លុយចំនួន១២.៧លានដុល្លារ ត្រូវបានលួចពីទូរATM ច្រើនជាងមួយពាន់នៅតាមហាងនានា ក្នុងប្រទេសជប៉ុន។ អាជ្ញាធរជឿថា លុយដ៏សន្ធឹកសន្ទាប់ទាំងនោះ ត្រូវបានដកដោយប្រើកាតក្រេឌីតក្លែងក្លាយ ដែលមានផ្ទុកព័ត៌មានស្ទួនគ្នា និងលេចចេញពីធនាគារមួយនៅប្រទេសអាហ្វ្រិកខាងត្បូង។
ជាមួយគ្នានេះដែរ ប៉ូលិសបានប៉ាន់ស្មានថា មនុស្សយ៉ាងតិចមួយរយនាក់ជាប់ពាក់ព័ន្ធនឹងការលួចតាមប្រព័ន្ធទំនើបបែបនេះ។ ហើយបើយោងតាមរបាយការណ៍ ការលួចលុយតាមទូរATM នេះ ធ្វើឡើងនៅថ្ងៃទី១៥ ខែឧសភា នៅឯហាងនានាក្នុងខេត្តចំនួន១៦។
នៅខណៈនេះ ប៉ូលិសកំពុងតែតាមដានអត្តសញ្ញាណជនសង្ស័យ ដោយមានជំនួយពីភាគីប៉ូលិសអាហ្វ្រិកខាងត្បូង តាមរយៈប៉ូលិសអន្តរជាតិ Interpol។ លើសពីនេះ ប៉ូលិសក៏កំពុងតែស៊ើបអង្កេតពីរបៀបដែលពី័ត៌មានកាតក្រេឌីតត្រូវបានលួចយក។
ទន្ទឹមនឹងនេះ បើតាមComputerworld អ្នកលួចទាំងនោះអាចដកប្រាក់បានមួយសែនយ៉េន ឬ៩១៣ដុល្លារ ពីប្រតិបត្តិការ១៤០០០ដង ដោយប្រើកាតក្រេឌីតចំនួន១៦០០។ ហើយក្រុមនេះបានដាក់គោលដៅលួចលើទូរATM នៅតាមហាង 7/11 ព្រោះហាងទាំងនេះទទួលកាតក្រេឌីតប្រាក់បរទេស។
នៅឯអាហ្វ្រិកខាងត្បូងឯណោះវិញ ធនាគារ South Africa Standard Bank អះអាងថា ខ្លួនជាអ្នករងគ្រោះនៃករណីនេះ។ ធនាគារនេះបន្តថា ករណីនេះមានជាប់ទាក់ទងនឹងការដកប្រាក់ ដែលប្រើកាតក្លែងក្លាយ នៅតាមទូរATM ជាច្រើនក្នុងប្រទេសជប៉ុន។ យ៉ាងណាក្ដី ធនាគារនេះ ក៏ធានាអតិថិជនរបស់ខ្លួនថា ពួកគេនឹងមិនបាត់បង់ហិរញ្ញវត្ថុពួកគេទេ៕
© រក្សាសិទ្ធិដោយ thmeythmey.com