ជាតិ
សាលារៀន អន្តរទ្វីប អាមេរិកាំង ដឹកនាំថ្នាក់កុមារអបអរសាទរទិវាកុមារអន្ដរជាតិ និងទិវាកុមារកម្ពុជា
× ទិវាកុមារអន្តរជាតិ ជាទិវាដ៏វិសេសមួយដែលត្រូវបានគេប្រារព្ធឡើងនៅថ្ងៃ០១ ខែមិថុនា ជារៀងរាល់ឆ្នាំ ក្នុងគោលបំណងដើម្បីលើកស្ទួយដល់សិទ្ធិកុមារ សំដៅក្រើនរំឭក និងបង្កើនការយកចិត្តទុកដាក់ជាពិសេសចំពោះប្អូនៗកុមារលើពិភពលោក។ នៅសាលារៀន អន្តរទ្វីប អាមេរិកាំង បានរៀបចំដឹកនាំប្អូនៗកុមារជាច្រើនរយនាក់ រួមទាំងបុគ្គលិក លោកគ្រូ អ្នកគ្រូ មាតាបិតា និងអ្នកអាណាព្យាបាលសិស្សយ៉ាងច្រើនកុះករចូលរួមប្រារព្ធនូវពិធីអបអរសាទរទិវាកុមារអន្ដរជាតិ និងទិវាកុមារកម្ពុជា កាលពីថ្ងៃទី២៦ ខែឧសភា ឆ្នាំ២០១៦ កន្លងទៅនេះ។
លោកស្រី ចាប ស្រីឃួន ចាងហ្វាងក្រោមមត្តេយ្យ មត្តេយ្យ និងបឋមសិក្សា បានលើកឡើងក្នុងពិធីអបអរសាទរនាឱកាសនោះទាំងទឹកមុខញញឹមថា ទិវាកុមារអន្ដរជាតិ និងទិវាកុមារកម្ពុជា ០១មិថុនា មានអត្ថន័យយ៉ាងជ្រាលជ្រៅ និងមានសារៈសំខាន់ណាស់សម្រាប់សង្គមជាតិក្នុងការយកចិត្តទុកដាក់លើកុមារ ជាពិសេសគឺការប្រឆាំងទៅនឹងពលកម្មកុមារ ការជួញដូរកុមារ និងជួយជំរុញការអភិវឌ្ឍកុមារ ដែលជាគ្រឹះដ៏ចម្បងក្នុងការអភិវឌ្ឍសង្គមជាតិនាពេលអនាគត។
លោកស្រីបានបន្តថា កុមារឆាប់ទទួលរងនូវសម្ពាធ និងឥទ្ធិពលអូសទាញពីមជ្ឈដ្ឋានសង្គមជុំវិញ ចំពោះការតម្រង់ទិសនិងអប់រំកុមារឱ្យបានល្អគឺជាភារកិច្ចរបស់យើងគ្រប់រូប ហើយសាលារៀនចាំបាច់ត្រូវប្រារព្ធទិវានេះឡើងដើម្បីពង្រឹងដល់សិទ្ធិកុមារ និងដើម្បីអប់រំឱ្យកុមារស្គាល់ពីតួនាទីនិងសិទ្ធិធំៗរបស់ខ្លួនដែលរួមមានដូចជា សិទ្ធិរស់រានមានជីវិត សិទ្ធិទទួលការការពារ សិទ្ធិក្នុងការចូលរួម សិទ្ធិក្នុងការអភិវឌ្ឍ និងចង់ឱ្យពួកគេចេះប្រើប្រាស់សិទ្ធិបានត្រឹមត្រូវ។
លោកស្រីបានលើកឡើងទៀតថា កុមារគឺជាមនុស្សជាទីស្រឡាញ់បំផុត និងជាចំណែកមួយដ៏ធំធេងរបស់ប្រជាជនទូទៅ កុមារទាំងពីរភេទប្រៀបបានទៅនឹងទំពាំងដែលត្រូវស្នងឫស្សី និងជាក្ដីសង្ឃឹមនៃយើងរាល់គ្នា និងពិភពលោកនាពេលអនាគត។ ការមិនយកចិត្ដទុកដាក់គិតគូរចំពោះកុមារ គឺជាការលះបង់នូវកាតព្វកិច្ចរបស់ខ្លួនជាពលរដ្ឋ។ យើងទាំងអស់គ្នាត្រូវធ្វើយ៉ាងណាឱ្យកុមារមានសុខភាពល្អ ការអប់រំល្អ និងចិញ្ចឹមបីបាច់ថែរក្សាឱ្យបានល្អដើម្បីឱ្យឫស្សីមានភាពរឹងមាំ ជាបញ្ញវន្តប្រកបដោយចំណេះ ជំនាញ និងសីលធម៌ល្អចូលរួមអភិវឌ្ឍប្រទេសជាតិ៕
(អត្ថបទសាលា)
© រក្សាសិទ្ធិដោយ thmeythmey.com