ជាតិ
សម្តេច ហ៊ុន សែន ចេញចំណាត់ការលើលោក ឡោក ហ៊ួរ ជុំវិញទំនាស់ដីធ្លី
×
ទីស្តីការគណៈរដ្ឋមន្ត្រី តាមរយៈចំណាររបស់សម្តេច ហ៊ុន សែន បានចេញចំណាត់ការមួយចំនួនលើកលោក ឧកញ៉ា ឡោក ហ៊ួរ ជុំវិញទំនាស់ដីធ្លី។ ចំណាត់ការនេះ កើតឡើងមិនដល់មួយខែផង បន្ទាប់ពីលោក ឡោក ហ៊ួរ ត្រូវបានលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បញ្ចូលទៅក្នុងបញ្ជីខ្មៅបុគ្គលដែលរំលោភដីធ្លី កាលពីដើមខែឧសភាកន្លងទៅ។
ផ្អែកតាមលិខិតរបស់ទីស្តីការគណៈរដ្ឋមន្ត្រីចុះថ្ងៃទី២៧ ខែឧសភា ចំណាត់ការទាំងនោះរួមមាន៖ទី១ លោក ឡោក ហ៊ួរ ចូលរួមដោះស្រាយជាមួយប្រជាពលរដ្ឋដែលរងគ្រោះពីការរំលោភបំពាន និងជាមួយសមត្ថកិច្ចពាក់ព័ន្ធ ដោយសុឆន្ទៈបញ្ចប់ទំនាស់ និងស្មារតីទទួលខុសត្រូវ។ ទី២ រដ្ឋបាលសុរិយោដីផ្អាកចុះបញ្ជី ឬផ្ទេរផ្លូវដីដែលមិនទាន់ដោះស្រាយរួច ចៀសវាងធ្វើឲ្យភាគីរងគ្រោះកាន់តែរីករាលដាល និងជាការទប់ស្កាត់កុំឲ្យឈ្មោះដដែល(ឡោក ហ៊ួរ) បង្កទំនាស់ និងមានលទ្ធភាពធ្វើសកម្មភាពអសកម្មតទៅទៀត។ និងទី៣ ប្រធានស្ថាប័នរបស់លោក ឡោក ហ៊ួរ ត្រូវមានវិធានការសមស្រប ដោយលោក ឡោក ហ៊ួរ ជាឧត្តមសេនីយ៍នគរបាលជាតិ ក្រសួងមហាផ្ទៃ តែព្យួរការងារដើម្បីអនុវត្តន៍មុខងារបច្ចុប្បន្នដែលជាតំណាងរាស្ត្រ។
សូមបញ្ជាក់ថា កាលពីថ្ងៃទី៦ ខែឧសភា កន្លងមក លោក ជា សុផារ៉ា បានព្រមានរៀបចំឈ្មោះបុគ្គលរំលោភដីធ្លីពលរដ្ឋ ក្នុងបញ្ជីខ្មៅ ជូនសម្តេចនាយករដ្ឋមន្ត្រី ហ៊ុន សែន។ រហូតមកទល់ពេលនេះ មានតែឯកឧត្តម ឡោក ហ៊ួរ ម្នាក់ទេ ដែលស្ថិតក្នុងបញ្ជីខ្មៅ ហើយត្រូវបានចាត់វិធានការនៅពេលនេះ៕
Tag:
ជា សុផារ៉ា
ឡោក ហ៊ួរ
ដីធ្លី
© រក្សាសិទ្ធិដោយ thmeythmey.com