អន្តរជាតិ
នយោបាយអន្តរជាតិ
ម្ដាយមីងមេដឹកនាំកូរ៉េខាងជើងបើកហាងបោកអ៊ុតនៅអាមេរិក លោកស្រី Ko Young-hee បង្រៀន គឹម ជុងអ៊ុន កាលពីក្មេង។ រូបថត Atimes
× លោកស្រី Ko Yong Suk ជាម្ដាយមីងលោក គីម ជុងអ៊ុន មេដឹកនាំកំពូលកូរ៉េខាងជើង កំពុងតែបើកហាងបោកអ៊ុតនៅក្រុងញូវយ៉ក បន្ទាប់ពីលោកស្រីរត់ភៀសខ្លួនមកទីនេះ តាំងពីឆ្នាំ១៩៩៨។ អ្វីដែលគួរឲ្យចាប់អារម្មណ៍នោះ លោកស្រី ជាអ្នកមើលថែលោក គីម កាលពីលោករស់នៅ និងរៀនសូត្រ នៅប្រទេសស្វ៊ីស។
ជារឿងដែលគួរភ្ញាក់ផ្អើល ដែលមីងរបស់មេដឹកនាំវ័យក្មេងកូរ៉េខាងជើង កំពុងតែបើកហាងបោកអ៊ុត និងរស់នៅយ៉ាងលាក់កំបាំងលើទឹកដីអាមេរិកជាសត្រូវរបស់ក្មួយប្រុសនោះ។ លោកស្រី ជាប្អូនស្រីរបស់ម្ដាយលោក គីម ជុងអ៊ុន ហើយលោកស្រីនេះហើយ ដែលទទួលខុសត្រូវលើជីវិតប្រចាំថ្ងៃរបស់លោក គីម នៅពេលរស់នៅប្រទេសស្វ៊ីសក្នុងឆ្នាំ១៩៩២។
ក្នុងកិច្ចសម្ភាសជាមួយកាសែត The Washington Post លោកស្រី Ko Yong Suk បានបញ្ចេញព័ត៌មានសម្ងាត់មួយចំនួន ក៏ដូចជាឆ្នាំកំណើតពិតប្រាកដរបស់ គីម ជុងអ៊ុន ដែលមិនមាននរណាដឹងច្បាស់លាស់។ លោកស្រី Ko និយាយថា គីម ជុងអ៊ុន កើតក្នុងឆ្នាំ១៩៨៤ មិនមែនដូចការរាយការណ៍ថា កើតក្នុងឆ្នាំ១៩៨២ ឬឆ្នាំ១៩៨៣ទេ ព្រោះលោក គីម កើតក្នុងឆ្នាំដំណាលគ្នា នឹងកូនប្រុសលោកស្រី។ លោកស្រីបានឲ្យដឹងថា លោកស្រី ជាអ្នកដូរខោទឹកនោមឲ្យលោក គីម ជុងអ៊ុន ទៀតផង។
បើតាមលោកស្រី Ko ក្មួយរបស់លោកស្រី គឺ គីម ជុងអ៊ុន មិនមែនជាក្មេងបង្កបញ្ហាទេ ប៉ុន្តែជាក្មេងឆាប់ខឹង និងមិនសូវអំណត់ទេ។ លោកស្រីបន្តថា នៅពេលម្ដាយ (ម្ដាយលោក គីម ជុងអ៊ុន) បន្ទោស ដោយសារលេងច្រើន ឬរៀនមិនពូកែ លោក គីម មិននិយាយអ្វីត្រលប់វិញទេ តែលោកនឹងធ្វើរឿងអ្វីផ្សេង ដូចជាមិនញាំបាយជាដើម។
រឿងដែលគួរឲ្យចាប់អារម្មណ៍ ដែលលោកស្រី Ko បង្ហើបក្នុងកិច្ចសម្ភាសនោះ គឺការស្នងតំណែងរបស់លោក គីម ជុងអ៊ុន។ ស្ត្រីរូបនេះបញ្ជាក់ថា លោក គីម ជុងអ៊ុន ដឹងថាលោកនឹងក្លាយជាមេដឹកនាំកូរ៉េខាងជើង តាំងពីឆ្នាំ១៩៩២ មកម្លេះ។ លោកស្រីនិយាយថា សញ្ញានៃរឿងនេះបានលេចចេញ គឺនៅពេលខួបកំណើតអាយុ៨ឆ្នាំរបស់លោក គីម ជុងអ៊ុន ដែលពេលនោះ មានការចូលរួមពីមន្ត្រីជាន់ខ្ពស់របស់កូរ៉េខាងជើង។
សូមបញ្ជាក់ថា លោកស្រី Ko និងប្ដីលោកស្រី Ri Gang ព្រមទាំងកូនបីនាក់ បានភៀសទៅអាមេរិកក្នុងឆ្នាំ១៩៩៨ បន្ទាប់ពីរត់ទៅស្ថានទូតអាមេរិកក្នុងប្រទេសស្វ៊ីស។ ក្រុមគ្រួសារលោកស្រី ក៏ត្រូវដឹកទៅកាន់មូលដ្ឋានយោធាអាមរិក នៅទីក្រុងFrankfurt ប្រទេសអាល្លឺម៉ង់ មុននឹងបញ្ជូនទៅកាន់អាមេរិក ដែលនៅទីនោះពួកគេត្រូវបានសួរចម្លើយ។ នៅទឹកដីអាមេរិក លោកស្រី ប្រហែលជាទទួលបានការឧបត្ថម្ភពីសំណាក់ភ្នាក់ងារCIA មុននឹងចាកចេញពីក្រុងវ៉ាស៊ីនតោន និងធ្វើជំនួញខ្លួនឯង ព្រមទាំងបន្តលាក់អត្តសញ្ញាណជាសាច់ញាតិជិតដិតរបស់មេដឹកនាំកំពូលកូរ៉េខាងជើង៕
Tag:
គីមជុងអ៊ុន
កូរ៉េខាងជើង
អាមេរិក
© រក្សាសិទ្ធិដោយ thmeythmey.com