អន្តរជាតិ
ដូណាល់ ត្រាំ បន្ទោស អូបាម៉ាដែលមិនលើកពីបញ្ហាជប៉ុនវាយប្រហារ Pearl Harbor
× លោក ដូណាល់ ត្រាំ បានរិះគន់ខ្លាំងៗពីការអញ្ជើញទៅកាន់កន្លែងគោរពវិញ្ញាណក្ខន្ធនៅហ៊ីរ៉ូស៊ីម៉ា របស់ប្រធានាធិបតីបារ៉ាក់ អូបាម៉ា កាលពីចុងសប្តាហ៍មុននេះ។ លោក ដូណាល់ ត្រាំ ថា លោក អូបាម៉ា គួរតែលើកយករឿងរ៉ាវប្រវត្តិសាស្ត្រដែលជប៉ុនវាយប្រហារមូលដ្ឋានយោធាអាមេរិក (Pearl Harbor ) នៅហាវ៉ៃសម័យសង្គ្រាមលោកលើកទី២។
បេក្ខជនប្រធានាធិបតីបក្សសាធារណរដ្ឋលោក ដូណាល់ ត្រាំ បានទិតៀនវត្តមានលោក បារ៉ាក់ អូបាម៉ា នៅហ៊ីរ៉ូស៊ីម៉ា កាលពីចុងសប្តាហ៍មុន ដោយលោកទាញយកបញ្ហាប្រវត្តិសាស្ត្រដែលជប៉ុនវាយប្រហារមូលដ្ឋានយោធាអាមេរិក Pearl Harbor ឆ្នាំ ១៩៤១ ។ លោកចង់ពន្យល់ថា ប្រធានាធិបតី អាមេរិកទៅគោរពវិញ្ញាណក្ខន្ធប្រជាជនជប៉ុន ខណៈដែលជប៉ុនមិនដែរមានចេតនាគោរពវិញ្ញាណក្ខន្ធអាមេរិកដែលស្លាប់នៅ Pearl Harborសោះ។
លោក ដូណាល់ ត្រាំ បានសរសេរបង្ហោះតាមប្រព័ន្ធទំនាក់ទំនងសង្គ្រាម Twitter ថា៖« តើលោក អូបាម៉ា ធ្លាប់ជជែកពីការវាយប្រហារលើមូលដ្ឋានទ័ពនៅ Pearl Harbor ស្របពេលដែលលោកនៅជប៉ុន? ប្រជាជនអាមេរិករាប់ពាន់នាក់ស្លាប់បាត់បង់ជីវិត?»។
កាលពីថ្ងៃសុក្រ លោក បារ៉ាក់ អូបាម៉ា បានក្លាយជាប្រធានាធិបតីអាមេរិក ដំបូងបំផុតដែលទៅគោរពវិញ្ញាណក្ខន្ធប្រជាជនជប៉ុនដែលស្លាប់ក្នុងនៅហ៊ីរ៉ូស៊ីម៉ា ចាប់តាំងពីអាមេរិកទម្លាក់គ្រាប់បែកបរមាណូនៅជប៉ុននោះ។ អាមេរិកតែងតែអះអាងថា ការទម្លាក់គ្រាប់បែកនេះគឺដើម្បីពន្លឿនការបញ្ចប់សង្គ្រាមលោកលើកទី ២ ប៉ុណ្ណោះ ហើយប្រជាជននិងរដ្ឋាភិបាលជប៉ុនតែងតែបង្ហាញការសោកស្តាយចំពោះ សកម្មភាពរបស់ខ្លួនក្នុងសម័យសង្គ្រាមផងដែរ។ ប៉ុន្តែជប៉ុនគ្មានគម្រោងសូមអភ័យទោសឬគោរពវិញ្ញាណក្ខន្ធប្រជាជនអាមេរិកដែលស្លាប់ដោយសារការវាយប្រហាររបស់ខ្លួនឡើយ។
ពាក់ព័ន្ធរឿងជប៉ុនវាយប្រហារកំពង់ផែ Pearl Harbor នាយករដ្ឋមន្ត្រីជប៉ុនលោក ស៊ីនហ្សូ អាបេ បានថ្លែងថា លោកគ្មានគម្រោងជាក់លាក់ណាមួយដើម្បីទៅទស្សនកិច្ចកំពង់ផែ Pearl Harbor នៅហាវ៉ៃឡើយ។
តាមពិតទៅចេតនាសំខាន់របស់លោក បារ៉ាក់ អូបាម៉ា គឺ ចង់មានមរតកសំខាន់មួយដែលជំរុញឲ្យមានការបំបាត់ចោលការប្រើប្រាស់អាវុធនុយក្លេអ៊ែរទូទាំងពិភពលោកមុនលោកចាកចេញពីតំណែងនៅដើមឆ្នាំក្រោយ។
សូមបញ្ជាក់ថា ជប៉ុនបានវាយប្រហារមូលដ្ឋានទ័ពអាមេរិកនៅ Pearl Harbor ថ្ងៃ ៧ ខែធ្នូឆ្នាំ ១៩៤១ហើយការវាយប្រហារដោយគ្មានប្រកាសដំណឹងមុននេះបានសម្លាប់ទាហាននិងប្រជាជនអាមេរិកអស់ប្រហែល ២៤០០នាក់ ហើយការវាយប្រហារនេះក៏បានដាស់ឲ្យអាមេរិកហាក់ប្រឡូកក្នុងសង្គ្រាមលោកលើកទី២ផងដែរ៕
Tag:
Pearl Harbor
បារ៉ាក់ អូបាម៉ា
ដូណាល់ ត្រាំ
© រក្សាសិទ្ធិដោយ thmeythmey.com