បសស ពង្រីកសេវាថែទាំសុខភាព ដល់គ្រួសារកម្មករ នឹងគ្រោងរៀបចំសម្រាប់មន្ត្រីរាជការ…

ជាតិ

បសស ពង្រីកសេវាថែទាំសុខភាព ដល់គ្រួសារកម្មករ នឹងគ្រោងរៀបចំសម្រាប់មន្ត្រីរាជការ…

30, May 2016 , 10:59 pm

រូបភាព

ដោយ:

ភ្នំពេញ៖ បេឡាជាតិរបបសន្ដិសុខសង្គម(បសស) នឹងរៀបចំបន្តពង្រីកវិសាលភាពសមាជិក លើការអនុវត្ដសេវាថែទាំសុខភាពដល់ក្រុមគ្រួសារ និងសាច់ញាតិកម្មករ ហើយគ្រោងរៀបចំសម្រាប់មន្ត្រីរាជការ និងកម្លាំងប្រដាប់អាវុធទៀតផង។ នេះបើតាមAKP ដែលបានដកស្រង់ប្រសាសន៍ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ថ្លែងក្នុងសិក្ខាសាលា ស្ដីពី ការផ្សព្វផ្សាយគោលនយោបាយ នៃការអនុវត្ដរបបសន្ដិសុខសង្គមផ្នែកថែទាំសុខភាព នៅភោជនីយដ្ឋានទន្លេបាសាក់២ កាលពីថ្ងៃទី២៩ខែឧសភាឆ្នាំ២០១៦។

ការដាក់ឱ្យអនុវត្ដន៍របបសន្ដិសុខ សង្គម ផ្នែកថែទាំសុខភាពនេះ នឹងចាប់ផ្ដើមមុនគេ សម្រាប់កម្មករ នៅតាមរោងចក្រ សហគ្រាស និងគ្រឹះស្ថានផ្នែកវិស័យឯកជន។ នេះបើតាមប្រសាសន៍រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក អ៊ិត សំហេង។ លោករដ្ឋមន្ត្រីបញ្ជាក់បន្តថា បន្ទាប់ពីការអនុវត្ដន៍ឱ្យបានដល់កម្មករទូទាំង ប្រទេសរួចមក ជាជំហានបន្ត បសស នឹងរៀបចំពង្រីកវិសាលភាពទៅដល់សមាជិកគ្រួសារកម្មករ បន្ថែមទៀត ដើម្បីជួយការពារសុខភាព និងការព្យាបាលដោយមិនគិតលុយ ពេលមានគ្រោះថ្នាក់ ឬមានជំងឺផ្សេងៗកើតឡើង។

បើតាមAKP លោករដ្ឋមន្ត្រីបញ្ជាក់យ៉ាងដូច្នេះ៖«ការថែទាំសុខភាពមិនមែនសម្រាប់តែលើបញ្ហាគ្រោះថ្នាក់ការងារតែមួយមុខនោះទេ ប៉ុន្ដែក្រុមគ្រួសារ ប្រពន្ធ ឬប្ដី និងកូនក្នុងបន្ទុក ពេលមានជំងឺឈឺស្កាត់នៅក្នុងគ្រួសារ បេឡាជាតិរបប សន្ដិសុខសង្គម អាចជួយព្យាបាលជំងឺ ឬការជួយឧបត្ដម្ភថវិកាបន្ថែមទៀត»។

លោករដ្ឋមន្ត្រីបញ្ជាក់ទៀតថា ក្រៅពីការការដាក់ ឱ្យអនុវត្ដន៍របបសន្ដិសុខសង្គមផ្នែកថែទាំសុខភាព សម្រាប់កម្មករ និយោជិត សហគ្រាស គ្រឹះស្ថានវិស័យឯកជននោះ បសស ក៏កំពុងរៀបចំក្រុមការងារបច្ចេកទេសធ្វើការសិក្សា សម្រាប់ផ្ដល់ជូនសេវាថែទាំសុខភាពនេះ ទៅដល់មន្ដ្រីរាជការ និងកងកម្លាំងប្រដាប់អាវុធបន្ថែមទៀត។

ចំណែក លោក អ៊ុក សមវិទ្យា នាយកបេឡាជាតិរបបសន្ដិសុខសង្គម នៃក្រសួងការងារ និងបណ្ដុះបណ្ដាល វិជ្ជាជីវៈ បានបញ្ជាក់ថា ការដាក់ឱ្យដំណើរការរបបសន្ដិសុខសង្គម ផ្នែកថែទាំសុខភាព នឹងចាប់ផ្ដើម អនុវត្ដន៍ មុនគេនៅរាជធានីភ្នំពេញ ខេត្ដកណ្ដាល និងខេត្ដកំពង់ស្ពឺ និងបន្ដពង្រីកវិសាលភាពឲ្យបានទូទាំងប្រទេស។

«ការអនុវត្ដរបបថែទាំសុខភាពនេះ បានជួយធានាដល់ការផ្ដល់សេវាព្យាបាល និងថែទាំ វេជ្ជសាស្ដ្រ ព្រមទាំងការផ្ដល់ប្រាក់បំណាច់ប្រចាំថ្ងៃ សម្រាប់រយៈពេលនៃការផ្អាកការងារ ដោយការព្យាបាលជំងឺ និងគ្រោះថ្នាក់ផ្សេងៗក្រៅពីហានិភ័យការងារ និងការសម្រាកមាតុភាព» នេះជាការបញ្ជាក់របស់លោក អ៊ុក សមវិទ្យា។ លោកបន្ថែមទៀតថា ការដាក់ឱ្យអនុវត្ដន៍របបថែទាំសុខភាពការងារនេះ បានផ្ដល់ប្រយោជន៍ទៅដល់ប្រពន្ធ ឬប្ដី និងកូន នៅក្នុងបន្ទុកផ្ទាល់នៃសាមីជនដែលជាសមាជិកបេឡាជាតិ របបសន្ដិសុខសង្គម ក្រោយពីទទួល មរណភាពដោយហានិភ័យការងារ។

សូមបញ្ជាក់ថា គិតរហូតមកដល់ពេលនេះ មានក្រុមហ៊ុន រោងចក្រ សហគ្រាស ដែលបានមកចុះ បញ្ជីកាចូលជាសមាជិកបេឡាជាតិរបបសន្ដិសុខសង្គម ជាង៨ពាន់សហគ្រាស និងមានកម្មករ និយោជិត ជាសមាជិកចំនួនជាង១លាន២០ម៉ឺននាក់ ហើយបេឡាជាតិបានចុះកិច្ចព្រមព្រៀងជាមួយមន្ទីរពេទ្យ និងមូលដ្ឋានសុខាភិបាលរដ្ឋ និងឯកជនប្រមាណ៩៥មូលដ្ឋានសុខាភិបាលនៅទូទាំងប្រទេស សម្រាប់ព្យាបាលជូន ដល់បង ប្អូនកម្មករ និយោជិត៕