ជាតិ
សេដ្ឋកិច្ច
សម្តេច ហ៊ុន សែន ស្នើម៉ាកាវឲ្យបង្កើនការទិញកសិផលកម្ពុជា សម្តេច ហ៊ុន សែន ជួបសំណាលជាមួយលោក ហូ ហៅវ៉ា (Ho Hou Wah ) អតីតប្រធាននៃរដ្ឋបាលពិសេសទីក្រុងម៉ាកាវ។ រូបថត ហ្វេសប៊ុកសម្តេច ហ៊ុន សែន
× ភ្នំពេញ៖ ក្នុងជំនួបជាមួយលោក ហូ ហៅវ៉ា (Ho Hou Wah ) អតីតប្រធាននៃរដ្ឋបាលពិសេសទីក្រុងម៉ាកាវ និងជាអនុសភានយោបាយចិន សម្តេច ហ៊ុន សែន នាយករដ្ឋមន្ត្រីកម្ពុជា បានស្នើឲ្យម៉ាកាវបង្កើនការទិញកសិផលពីកម្ពុជា។ ក្រៅពីទិញកសិផលកម្ពុជា សម្តេច ហ៊ុន សែន ក៏ស្នើឲ្យម៉ាកាវ យកប្រទេសកម្ពុជាធ្វើជាកន្លែងឃ្លាំងកែច្នៃរក្សាទុកអង្ករសម្រាប់នាំចេញទៅកាន់ទីផ្សារអន្តរជាតិ និងទៅប្រទេសមួយចំនួនដែលទទួលជំនួយស្បៀងពីមិត្តចិន។
ការស្នើនេះ ធ្វើឡើងនៅពេល សម្តេច ហ៊ុន សែន ជួបសំណាលជាមួយលោក ហូ ហៅវ៉ា (Ho Hou Wah ) អតីតប្រធាននៃរដ្ឋបាលពិសេសទីក្រុងម៉ាកាវ និងជាអនុសភានយោបាយចិននៅវិមានរដ្ឋសភាក្នុងរាជធានីភ្នំពេញ។ នេះបើយោងតាមទំព័រហ្វេសប៊ុក សម្តេច ហ៊ុន សែន ចុះផ្សាយនៅថ្ងៃទី៣០ ខែឧសភា ឆ្នាំ២០១៦ នេះ។
ក្រៅពីស្វាគមន៍ ចំពោះដំណើរទស្សនកិច្ចរបស់លោក Ho Hou wah និងគណៈប្រតិភូ សម្តេច ហ៊ុន សែន បានជំរុញឲ្យអ្នកវិនិយោគម៉ាកាវ មកស្វែងយល់អំពីឱកាសវិនិយោគនៅកម្ពុជាព្រោះប្រទេសកម្ពុជា មានសក្ដានុពលច្រើនក្នុងនោះ ដូចជា ទេសចរណ៍ និង កសិកម្មជាដើម។
លើសពីនេះ សម្តេច ហ៊ុន សែន ក៏បានជំរុញឲ្យមានជើងហោះហើរត្រង់ពីម៉ាកាវមកកាន់កម្ពុជាឲ្យបានកាន់តែច្រើនផងដែរ។ ចំណែក លោក Ho Hou Wah ពេញចិត្តយ៉ាងខ្លាំងចំពោះការលើកឡើងរបស់សម្តេច ហ៊ុន សែន ហើយលោកនឹងយកទៅពិភាក្សានៅម៉ាកាវ។
ក្នុងឱកាសនៃជំនួបនេះ សម្តេច ហ៊ុន សែន បានអញ្ជើញ លោក Ho Hou Wah ចូលរួមនៅក្នុងវេទិការសេដ្ឋកិច្ចពិភពលោក ដែលនឹងធ្វើនៅកម្ពុជាឆ្នាំក្រោយនេះផងដែរ៕
© រក្សាសិទ្ធិដោយ thmeythmey.com