រដ្ឋ ផ្តើមប្រមូលពន្ធយានជំនិះសម្រាប់ឆ្នាំ២០១៦នៅដើមខែកក្កដានេះ

ជាតិ

សេដ្ឋកិច្ច

រដ្ឋ ផ្តើមប្រមូលពន្ធយានជំនិះសម្រាប់ឆ្នាំ២០១៦នៅដើមខែកក្កដានេះ

26, Jun 2016 , 8:39 pm

រូបភាព

ដោយ: ខន ចំប៉ា

អគ្គនាយកដ្ឋានពន្ធដារ ចាប់ផ្តើមការប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៦ ចាប់ពីដើម ខែកក្កដា ដល់ដំណាច់ខែវិច្ឆិកា។ ម្ចាស់យានជំនិះ ដែលយឺតយ៉ាវបង់ពន្ធ នឹងប្រឈមនឹងការពិន័យ បង់ប្រាក់ពន្ធ១០០ភាគរយ លើប្រាក់ពន្ធដែលត្រូវបង់ ចាប់ពីដើមឆ្នាំ២០១៧ ។

នៅខែកក្កដាខាងមុខ អគ្គនាយកដ្ឋានពន្ធដារនឹងចាប់ផ្តើម ប្រមូលពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទសម្រាប់ឆ្នាំ២០១៦ ។ ការប្រមូលពន្ធនេះ មានរយៈពេល៥ខែ គឺផ្តើមពីថ្ងៃទី ១ ខែកក្កដា ហើយបញ្ចប់នៅថ្ងៃទី៣០ ខែវិច្ឆិកា ឆ្នាំ២០១៦ ។

ផ្អែកតាមសេចក្តីជូនដំណឹងរបស់អគ្គនាយកដ្ឋានពន្ធ ចុះថ្ងៃទី២៤ ខែមិថុនា ឆ្នាំ២០១៦ ការបង់ពន្ធក្នុងឆ្នាំ២០១៦នេះ ម្ចាស់មធ្យោបាយដឹកជញ្ជូន និងយានជំនិះគ្រប់ប្រភេទ ត្រូវដាក់លិខិតប្រកាស និងបង់ពន្ធនៅសាខាពន្ធដារខេត្ត/ខណ្ឌ ឬនៅសាខាណាមួយនៃធនាគារកាណាឌីយ៉ា អ.ក ឬធនគារអេសីលីដា ភីអិលស៊ី ដោយត្រូវបំពេញលិខិតប្រកាសបង់ពន្ធចំនួន២សន្លឹក ចំពោះយានយន្តដែលបង់លើកដំបូង និងយានយន្តដែលពុំទាន់ទទួលបាន បណ្ណសម្គាល់ ការបង់ពន្ធមធ្យោបាយដឹកជញ្ជូន និងយានជំនិះគ្រប់ប្រភេទ។

ក្នុងពេលដាក់លិខិតប្រកាស និងបង់ពន្ធ ម្ចាស់យានជំនិះ ត្រូវភ្ជាប់មកជាមួយនូវច្បាប់ថតចម្លង បណ្ណសម្គាល់យានយន្ត ឬច្បាប់ថតចម្លងវិញ្ញាបនបត្រត្រួតពិនិត្យលក្ខណៈបច្ចេកទេសយានយន្ត (សម្រាប់រថយន្តក្រៅពីប្រភេទPick Up) ដែលចេញ ដោយអគ្គនាយកដ្ឋានសាធារណការ និងដឹកជញ្ជូន ឬបង្កាន់ដៃបង់ពន្ធនាំចូល ឬលិខិតបញ្ជាក់ការប្រើប្រាស់យានយន្តចេញដោយឃុំ/សង្កាត់ ចំពោះយានយន្តកែច្នៃក្នុងស្រុក និងច្បាប់ថតចម្លងអត្តសញ្ញាណប័ណ្ណ ឬលិខិតឆ្លងដែន ឬលិខិតបញ្ជាក់សំបុត្រកំណើតរបស់ម្ចាស់យានយន្តចេញដោយមន្ត្រីអត្រានុកូលដ្ឋាន។ នេះបើតាមនាយកដ្ឋានពន្ធដារ ដែលបញ្ជាក់ដែរថា យានយន្តដែលបានទទួលបណ្ណសម្គាល់ការបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទ ហើយនោះ ពុំចាំបាច់ បំពេញលិខិតប្រកាសបង់ពន្ធទៀតនោះទេ។

ពន្ធនេះត្រូវបានលើកលែងចំពោះ រថយន្តគិលានសង្គ្រោះ រថយន្តពន្លត់អគ្គិភ័យជាកម្មសិទ្ធិរបស់រដ្ឋ។ យានយន្តដែលជាកម្មសិទ្ធិរបស់អង្គភាពកង់យោធពលខេមរភូមិន្ទ កងរាជអាវុធហត្ថ នគរបាលជាតិ ដែលបម្រើការងារសម្រាប់កិច្ចការពារជាតិ ជាមធ្យោបាយដឹកជញ្ជូនសម្ភារថទ័ព ក៏ដូចជាសម្រាប់កិច្ចការសន្តិសុខ សណ្តាប់ធ្នាប់ និងយានយន្តដែលកម្មសិទ្ធិរបស់ស្ថានទូត ឬស្ថានកុងស៊ុលបរទេស អង្គការអន្តរជាតិ ឬទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាល។ ប៉ុន្តែអគ្គនាយកដ្ឋានពន្ធដារតម្រូវឲ្យក្រសួង ស្ថាប័ន ដែលជាម្ចាស់កម្មសិទ្ធិរបស់មធ្យោបាយដឹកជញ្ជូន និងយានជំនិះ ត្រូវស្នើសុំទៅអគ្គនាយកដ្ឋានបពន្ធដារ ដើម្បីទទួលបាននូវ លតាបត្របង់ពន្ធ (ពន្ធជាបន្ទុករបស់រដ្ឋ) ដោយភ្ជាប់មកជាមួយនូវបញ្ជីសារពើភណ្ឌរបស់ក្រសួង ស្ថាប័ន ឬអង្គភាពដែលបានស្នើសុំ។

អគ្គនាយកដ្ឋានពន្ធដារ ក៏បានបញ្ជាក់ដែរថា ចាប់ពីថ្ងៃទី១ ខែមករា ឆ្នាំ២០១៧ អង្គភាពពន្ធដារ នឹងចុះត្រួតពិនិត្យ និងពិន័យចំពោះមធ្យោបាយដឹកជញ្ជូន និងយានជំនិះទាំងឡាយ ដែលមិនទាន់បានប្រកាសបង់ពន្ធក្នុងឆ្នាំកន្លងមក និងត្រូវបង់ពន្ធ និងប្រាក់ពិន័យ១០០ភាគរយ លើប្រាក់ពន្ធដែលត្រូវបង់៕