អន្តរជាតិ
នយោបាយអន្តរជាតិ
អឺរ៉ុប អាចក្លាយជាតំបន់បាល់កង់ទីពីរ ក្រោយការចាកចេញរបស់អង់គ្លេស
×
ប្រមុខវិហារកាតូលិក បានព្រមានពីការបែកបាក់នៅក្នុងតំបន់អឺរ៉ុប ដូចអ្វីដែលកើតឡើង នៅតំបន់បាល់កង់ កាលពីទសវត្សរ៍ឆ្នាំ១៩៩០។ សម្ដេចប៉ាប នៃវិហារគ្រិស្តកាតូលិកព្រមានបែបនេះ បន្ទាប់ពីចក្រភពអង់គ្លេស បោះឆ្នោតប្រជាមតិចាកចេញលែងជាសមាជិកសហភាពអឺរ៉ុប ហើយព្រះអង្គ ក៏បានទទូចឲ្យអឺរ៉ុប ផ្ដល់សិទ្ធិឲ្យទូលាយ ដល់សមាជិករបស់ខ្លួន។
ក្នុងដំណើរត្រលប់ទៅបុរីវ៉ាទីកង់ សម្ដេចប៉ាប ហ្វ្រង់ស៊ីស បានប្រាប់អ្នកសារព័ត៌មាន នៅថ្ងៃទី២៦ ខែមិថុនា ថា អឺរ៉ុប អាចក្លាយជាតំបន់បាល់កង់ទីពីរ ដែលបែកខ្ញែកគ្នា និងមានជម្លោះឥតឈប់ ក្រោយការចាកចេញរបស់ចក្រភពអង់គ្លេស។ ព្រះអង្គ ក៏ផ្ដាំឲ្យសហភាពអឺរ៉ុប ត្រូវសម្លឹងទៅមុខ តាមរយៈការផ្ដល់សេរីភាពឲ្យច្រើននៅសមាជិក។
នៅលើយន្តហោះមកពីអាមេនី ប្រមុខបុរីវ៉ាទីកង់ មានបន្ទូលថា អឺរ៉ុបត្រូវតែបង្កើតសហភាពថ្មីមួយ ព្រោះប្រព័ន្ធបច្ចុប្បន្ននេះ មានបញ្ហារាំងស្ទះក្នុងដំណើការរបស់អឺរ៉ុបនេះ។ ហើយអឺរ៉ុប ត្រូវតែលះបង់តម្លៃខ្លះ ទើបអាចទៅមុខបាន។ ជាមួយគ្នានេះ សម្ដេចប៉ាប ក៏បានលើកឡើង ពីតំបន់មួយចំនួន ដែលអាចបែកខ្ញែកផងដែរ។
យោងតាមសារព័ត៌មាន AFP ផ្សាយថា សម្ដេចប៉ាប ហ្វ្រង់ស៊ីស ព្រមានថា ទឹកដីស្កុតឡែន និងCatalonia របស់អេស្ប៉ាញ អាចនឹងជំរុញឲ្យមានការផ្ដាច់ខ្លួន ដែលនេះមានន័យថា កំពុងតែធ្វើឲ្យអឺរ៉ុប ក្លាយជាតំបន់បាល់កង់ដែរហើយ។ លើសពីនេះ សម្ដេចប៉ាប បញ្ជាក់ទៀតថា ប្លុកអឺរ៉ុប ត្រូវតែស្ដារភាពរឹងមាំរបស់ខ្លួនឡើងវិញ គឺត្រូវផ្ដល់សេរីភាព និងឯករាជ្យភាព ឲ្យកាន់តែច្រើន ទៅប្រទេសជាសមាជិករបស់ខ្លួន។
ទាក់ទងនឹងការធ្វើប្រជាមតិរបស់ចក្រភពអង់គ្លេស សម្ដេចមានបន្ទូល នៅថ្ងៃទី២៣ ខែមិថុនា ថា ឆន្ទះប្រជាជន ត្រូវបានបញ្ចេញហើយ។ នេះតម្រូវឲ្យមានកាទទួលខុសត្រូវធំធេង ដើម្បីធានា ពីសុខុមាលភាពរបស់ប្រជាជនចក្រភពអង់គ្លេស ក៏ដូចជា របស់ប្រជាជននៃទ្វីបអឺរ៉ុបទាំងមូលផងដែរ។
ការលើកឡើងរបស់សម្ដេចប៉ាប ធ្វើឡើង ខណៈមានប្រទេសមួយចំនួន ចង់ដើរតាមអង់គ្លេស។ នៅមុននេះបន្តិច មេដឹកនាំនៃគណបក្សស្ដាំនិយម និងក្រុមប្រឆាំងជនអន្តោប្រវេសន៍ នៅក្នុងប្រទេស ជាសមាជិកសហភាពអឺរ៉ុបខ្លះ មានផែនការជំរុញឲ្យការធ្វើប្រជាមតិ ដូចចក្រភពអង់គ្លេសដែរ។ អ្នកនយោបាយ នៅឯស្លូវ៉ាគី ហូឡង់ ដាណឺម៉ាក ស៊ុយអែត និងបារាំង សុទ្ធតែបានទាមទារឲ្យការធ្វើប្រជាមតិលើសមាជិកភាពរបស់ខ្លួន នៅក្នុងសហភាពអឺរ៉ុប៕
Tag:
អឺរ៉ុប
បាល់កង់
សម្ដេចប៉ាប
© រក្សាសិទ្ធិដោយ thmeythmey.com