កីឡាជាតិ
ជាតិ
យូដូរាជសីហ៍ឈ្នះមេដាយមាសច្រើនជាងគេក្នុងការប្រជែងជើងឯកយូដូថ្នាក់ជាតិ
×
ការប្រកួតកីឡាយូដូជ្រើសរើសជើងឯថ្នាក់ជាតិប្រចាំឆ្នាំ២០១៦ ដែលប្រព្រឹត្តនៅអគារដំបូលទូកស្លាបខាងស្តាំក្នុងពហុកីឡដ្ឋានជាតិ បានបញ្ចប់ដោយជោគជ័យកាលពីចុងសប្តាហ៍កន្លងមក បន្ទាប់ពីធ្វើការប្រកួតអស់រយៈពេល៥ថ្ងៃ ដោយក្លិបយូដូរាជសីហ៍ឈ្នះមេដាយមាសច្រើនជាងគេក្នុងចំណោមក្លិបចំនួន៥ចូលរួម ខណៈក្លិបយូដូនាគរាជឈរលំដាប់លេខ២ មុនក្លិបយូដូដំរីស, យូដូខេត្តសៀមរាប និងក្លិបយូដូអូឡាំពិក។
ក្លិបយូដូរាជសីហ៍បានក្លាយជាម្ចាស់ជើងឯកប្រចាំព្រឹតិ្តការណ៍ការប្រកួតកីឡាយូដូជ្រើសជើងឯកថ្នាក់ជាតិប្រចាំឆ្នាំ២០១៦ ក្រោយពីក្លិបនេះបានឈ្នះមេដាយមាសច្រើនជាងគេ ក្នុងចំណោមក្លិបចំនួន៥ចូលរួម។ សម្រាប់ការប្រកួតនេះក្លិបយូដូរាជសីហ៍បានដាក់កីឡាករចំនួន១៩នាក់ចូលរួមក្នុងចំណោមកីឡាករសរុបចំនួន៨៣នាក់។
ក្លិនយូដូរាជសីហ៍ដណ្តើមបានមេដាយមេដាយមាសចំនួន៦គ្រឿង, ប្រាក់៥គ្រឿង និងសំរឹទ្ធ៤គ្រឿង ខណៈក្លិបនាគរាជដណ្តើបានមេដាយមាស៣គ្រឿង, ប្រាក់២គ្រឿង និងសំរឹទ្ធ៤គ្រឿង ឬឯក្លិបយូដូដំរីសដណ្តើមបានមេដាយមាស១គ្រឿង, ប្រាក់២គ្រឿង និងសំរឹទ្ធ៤គ្រឿង។ ចំណែកក្លិបយូដូខេត្តសៀមរាបដណ្តើមបានមេដាយមាស១គ្រឿង ប្រាក់១គ្រឿង និងសំរឹទ្ធ៩គ្រឿង ក្រុមនេះបើរាប់ពីចំនួនមេដាយឈរលំដាប់លេខ២ បន្ទាប់ពីក្លិបរាជសីហ៍។ ដោយឡែកក្លិបយូដូអូឡាំពិក ទទួលបានមេដាយប្រាក់១គ្រឿង និងសំរឹទ្ធ២គ្រឿង។
គួរបញ្ជាក់ថា ការប្រកួតកីឡាយូដូជ្រើសរើសជើងឯកថ្នាក់ជាតិប្រចាំឆ្នាំ២០១៦ មានក្លិបចំនួន៥ចូលរួមដែលមានកីឡាករសរុបចំនួន៨៣នាក់(ស្រី២១នាក់) និងមាន១១ប្រភេទវិញ្ញាសាចូលរួម ដោយមានបុរស៨វិញ្ញាសា និងនារីចំនួន៣វិញ្ញាសា។ បន្ទាប់ពីធ្វើការប្រកួតអស់រយៈពេល៥ថ្ងៃចាប់ពីថ្ងៃទី២២ ដល់ថ្ងៃទី២៦ ខែមិថុនា នៅអគារដំបូលទូកក្នុងពហុកីឡដ្ឋានជាតិការប្រកួតកីឡាយូដូជ្រើសរើសជើងឯកថ្នាក់ជាតិប្រចាំឆ្នាំ២០១៦ បានបញ្ចប់ដោយជោគជ័យកាលពីចុងសប្តាហ៍កន្លងមក៕
Tag:
យូដូ
ជើងឯកយូដូថ្នាក់ជាតិ
© រក្សាសិទ្ធិដោយ thmeythmey.com