ជាតិ
នយោបាយជាតិ
សមុទ្រចិនខាងត្បូង៖ សម្ដេច ហ៊ុន សែន ថា ប្រទេសក្រៅតំបន់ទាញសមាជិកអាស៊ានឃុបឃិតនយោបាយអាក្រក់
×![]()
សម្ដេចនាយករដ្ឋមន្ត្រី ហ៊ុន សែន យល់ថា ប្រទេសក្រៅតំបន់ខ្លះបានធ្វើសកម្មភាពអូសទាញ និងគាបសង្កត់ឲ្យប្រទេសសមាជិកអាស៊ាន គាំទ្រមុនតុលាការចេញសាលដីកាលើបញ្ហាជម្លោះសមុទ្រចិនខាងត្បូង ដែលជាការឃុបឃិតនយោបាយអាក្រក់បំផុត ក្នុងក្របខណ្ឌនៃនយោបាយអន្តរជាតិ។ 
ប្រធានគណបក្សប្រជាជនកម្ពុជា សម្ដេច ហ៊ុន សែន នៅតែរក្សាជំហមិនគាំទ្រ និងប្រឆាំងរាល់សេចក្ដីថ្លែងការណ៍ណាមួយរបស់អាស៊ានគាំទ្រ ដល់សាលដីកាតុលាការមជ្ឈត្តកម្មពាក់ព័ន្ធនឹងជម្លោះនៅសមុទ្រចិនខាងត្បូង។ នាយករដ្ឋមន្ត្រី ហ៊ុន សែន យល់ថា បញ្ហាជម្លោះនេះ ត្រូវបានប្រទេសក្រៅតំបន់ខ្លះ បានធ្វើសកម្មភាពអូសទាញ និងគាបសង្កត់ឲ្យប្រទេសសមាជិកអាស៊ាន គាំទ្រមុនពេលតុលាការចេញសាលដីកាលើបញ្ហាជម្លោះសមុទ្រចិនខាងត្បូង។ ហើយការខិតខំរបស់ប្រទេសក្រៅតំបន់នេះ គឺដើម្បីប្រមូលកម្លាំងប្រឆាំងចិន ដែលវានឹងផ្ដល់នូវផលអវិជ្ជមានសម្រាប់អាស៊ាន និងផ្ដល់ផលអាក្រក់ដល់សន្តិភាពក្នុងតំបន់។
ត្រង់ចំណុចនេះសម្ដេច ហ៊ុន សែន ចាត់ទុកថា ការអូសទាញនេះជាការឃុបឃិតខាងនយោបាយដ៏អាក្រក់បំផុតក្នុងក្របខណ្ឌនៃនយោបាយអន្តរជាតិ ដែលអាចផ្ដល់លទ្ធផលទៅដល់ការបែកបាក់រវាងអាស៊ានផង និងរវាងអាស៊ាន-ចិនផង។
ថ្លែងនៅក្នុងអង្គមីទ្ទីញរំឭកខួបបង្កើតគណបក្សលើកទី៦៥ព្រឹកនេះ ប្រមុខបក្សប្រជាជនកម្ពុជាបានបញ្ជាក់ដូច្នេះថា៖«គណបក្សប្រជាជនកម្ពុជា ចាត់ទុកបញ្ហាសមុទ្រចិនខាងត្បូងជាបញ្ហារវាងបណ្ដាប្រទេសដែលមានការពាក់ព័ន្ធជាមួយគ្នា លើបញ្ហាអធិបតេយ្យ ហើយមិនមែនជាបញ្ហារវាងអាស៊ាន និងចិននោះទេ…។ មានតែប្រទេសពាក់ព័ន្ធតែប៉ុណ្ណោះដែលមានលទ្ធភាពដោះស្រាយបញ្ហានេះ អាស៊ានគ្មានលទ្ធភាពនឹងធ្វើជំនួសឲ្យប្រទេសដែលពាក់ព័ន្ធនោះឡើយ»។
ប្រធានគណបក្សប្រជាជនកម្ពុជា ក៏អំពាវនាវឲ្យប្រទេសនៅក្រៅតំបនអាស៊ាន បញ្ឈប់ការជ្រៀតជ្រែកលើបញ្ហាសមុទ្រចិនខាងត្បូងនេះ។ ហើយបណ្ដាប្រទេសដែលពាក់ព័ន្ធ គួរតែយកចិត្តទុកដាក់ចំពោះបញ្ហាសមុទ្រចិនខាងត្បូង ដោយអនុវត្តនូវស្មារតីនៃសេចក្ដីថ្លែងការណ៍ស្តីពីការប្រតិបត្តិរបស់បណ្ដាភាគីនៅសមុទ្រចិនខាងត្បូង (DOC) ដើម្បីឈានទៅសម្រេចក្រមប្រតិបត្តិ(COC) ចៀសវាងការប្រើប្រាស់សមុទ្រចិនខាងត្បូង ធ្វើជាឧបករណ៍តថ្លៃ ឬជាចំណាប់ខ្មាំងនៃសម័យប្រជុំថ្នាក់តំបន់ និងអន្តរជាតិ ដែលលទ្ធផលរបស់វាក្នុងប៉ុន្មានឆ្នាំចុងក្រោយនេះគឺការបែកបាក់គ្នា។
កន្លងមកនាយករដ្ឋមន្ត្រី ក៏បានបង្គាប់ឲ្យរដ្ឋមន្ត្រីក្រសូងការបរទេស និងឧត្តមមន្ត្រីកម្ពុជា ប្រកាន់ជំហតែមួយ នៅក្នុងការបកស្រាយលើបញ្ហាជម្លោះសមុទ្រចិនខាងត្បូងនេះ ដោយសម្ដេចព្រលយពាក្យថា បើមានមន្ត្រីណាម្នាក់ ដែលបកស្រាយខុសពីជំហរបស់លោកនោះ ពួកគេនឹងត្រូវដកចេញពីតំណែងភ្លាម។
តែយ៉ាងណាការបដិសេធរបស់ប្រមុខរដ្ឋាភិបាល ដែលមិនចូលរួមគាំទ្រលើបញ្ហាសមុទ្រចិនខាងត្បូងនេះ ត្រូវបានអ្នកវិភាគមួយចំនួនរិះគន់ថា រដ្ឋាភិបាលកំពុងមានគោលនយោបាយទោរទន់ងាកទៅរកចិនខ្លាំង។ ឆ្លើយតបការរិះគន់នេះសម្ដេចនាយករដ្ឋមន្ត្រី ហ៊ុន សែន បានអះអាងកន្លងមកថា កម្ពុជាមិនដែលខ្លាចចិននោះទេ ហើយចិនក៏មិនដែលមកចាប់បង្ខំកម្ពុជាឲ្យធ្វើតាមខ្លួននោះដែរ៕
Tag:
ហ៊ុន សែន
អាស៊ាន
សមុទ្រចិនខាងត្បូង
© រក្សាសិទ្ធិដោយ thmeythmey.com
