ជាតិ
សេដ្ឋកិច្ច
សម្តេច ហ៊ុន សែន ៖ កម្ពុជា ជា «រោងចក្រនៃអាស៊ី»
× ភ្នំពេញ៖ កម្ពុជាកំពុងក្លាយខ្លួនជា «រោងចក្រនៃអាស៊ី» ព្រោះកម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលមានភាពងាយស្រួលក្នុងការផ្គត់ផ្គង់ទំនិញលើទីផ្សារអនុតំបន់មេគ្គង, ទីផ្សារអាស៊ាន និងទីផ្សារសំខាន់ៗដទៃទៀតក្នុងពិភពលោក។ នេះជាសក្តានុពលវិនិយោគសំខាន់មួយ ក្នុងចំណោមសក្តានុពលសំខាន់ផ្សេងៗទៀត ដែលសម្តេចនាយករដ្ឋមន្ត្រី ហ៊ុន សែន បានលើកឡើងក្នុងពិធីបើកវេទិកាធុរកិច្ចកម្ពុជា-នេប៉ាល់ កាលពីថ្ងៃទី ១៤ ខែ ឧសភា ឆ្នាំ២០១៩។
ថ្លែងចំពោះមុខនាយករដ្ឋមន្ត្រីនេប៉ាល់ លោក ខេ ភី សាម៉ា អូលី និងអ្នកធុរកិច្ចនេប៉ាល់ជាច្រើនរូបទៀតនោះ សម្តេច ហ៊ុន សែន បានរៀបរាប់ពីសក្តានុពលរបស់កម្ពុជា ទៅកាន់អ្នកវិនិយោគទាំងនោះថា កម្ពុជាមានសក្តានុពលវិនិយោគសំខាន់ៗចំនួន ៤ចំណុចគឺ៖ ទី១ ស្ថិរភាពនយោបាយ និងម៉ាក្រូសេដ្ឋកិច្ច។ ទី២ ការបើកចំហសេដ្ឋកិច្ចសម្រាប់អ្នកវិនិយោគទាំងអស់ ដោយគ្មានការរើសអើងរវាងអ្នកវិនិយោគកម្ពុជា និងអ្នកវិនិយោគបរទេស។ ទី៣ កម្លាំងពលកម្មដែលមានភាពសម្បូរបែបនិងវ័យក្មេង ដែលក្នុងនោះប្រជាជនដែលមានអាយុ៣៥ឆ្នាំចុះ មានចំនួនដល់ទៅ ៧២ ភាគរយ នៃចំនួនប្រជាជនសរុប គួបផ្សំនឹងប្រាក់ឈ្នួលដែលមានភាពប្រកួតប្រជែង។ ទី៤ កម្ពុជាស្ថិតនៅលើទីតាំងជាយុទ្ធសាស្ត្រក្នុងតំបន់អាស៊ាន ដែលតំបន់នេះបាននិងកំពុងក្លាយជា «រោងចក្រនៃអាស៊ី»។ សម្ដេច ហ៊ុន សែន ជំរុញឲ្យវិនិយោគគិនបរទេសមកសិក្សាឈ្វេងយល់ពីសក្តានុពល និងកាលានុវត្តភាពវិនិយោគនៅកម្ពុជា។
នាយករដ្ឋមន្ត្រីកម្ពុជា បាននិយាយដូច្នេះថា៖« ក្នុងនាមរាជរដ្ឋាភិបាលកម្ពុជាសូមស្វាគមន៍ចំពោះការសម្រេចចិត្តដ៏ឈ្លាសវៃរបស់អ្នកវិនិយោគបរទេសទាំងអស់ ជាពិសេសអ្នកវិនិយោគនេប៉ាល់ ដែលមានបំណងជ្រើសរើសប្រទេសកម្ពុជា ជាគោលដៅវិនិយោគដ៏មានសក្តានុពលខ្ពស់ក្នុងការចាប់ផ្តើម ឬពង្រីកអាជីវកម្មរបស់ខ្លួននៅក្រៅប្រទេស»។
រាជរដ្ឋាភិបាល បានដាក់ចេញនូវគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥- ២០២៥ ដែលជាយុទ្ធសាស្ត្រកំណើនសេដ្ឋកិច្ចថ្មី សំដៅធ្វើពិពិធកម្មសេដ្ឋកិច្ច និងកែប្រែរចនាសម្ព័ន្ធឧស្សាហកម្មកម្ពុជាពីឧស្សាហកម្មអតិពលកម្ម ទៅជាឧស្សាហកម្មផ្នែកលើជំនាញត្រឹមឆ្នាំ២០២៥។
ក្នុងរយៈពេល៤ខែដើមឆ្នាំ២០១៩ នេះ គម្រោងវិនិយោគដែលត្រូវបានអនុម័តមានចំនួន ១១៥គម្រោង ដែលមានទុនវិនិយោគប្រមាណ ៤ ប៊ីលានដុល្លារអាមេរិក។ ហើយចំពោះរយៈពេល៥ឆ្នាំ(២០១៤-២០១៨) កម្ពុជាបានអនុម័តគម្រោងវិនិយោគចំនួន ៩៥៩គម្រោង ដែលមានទុនវិនិយោគសរុបចំនួនប្រមាណ ២៣ប៊ីលានដុល្លារអាមេរិកដែលអាចបង្កើតការងារចំនួន ១លានកន្លែង។ នេះបើយោងតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជា៕
Tag:
ហ៊ុន សែន
សេដ្ឋកិច្ច
នេប៉ាល់
© រក្សាសិទ្ធិដោយ thmeythmey.com