លោក យន្ត មីន ឲ្យក្រុមហ៊ុនចិនសិក្សាគម្រោងកសាងផ្លូវ និងលូ នៅខេត្តព្រះសីហនុ ក្រោយខូចស្ទើរទាំងស្រុង

ជាតិ

លោក យន្ត មីន ឲ្យក្រុមហ៊ុនចិនសិក្សាគម្រោងកសាងផ្លូវ និងលូ នៅខេត្តព្រះសីហនុ ក្រោយខូចស្ទើរទាំងស្រុង

28, Sep 2018 , 7:59 am

រូបភាព

ដោយ: ថ្មីៗ

ភ្នំពេញ៖ អភិបាលខេត្តព្រះសីហនុ ឲ្យក្រុមហ៊ុនចិនចំនួន៦ សិក្សាពីគម្រោងសាងសង់ហេដ្ឋារចនាសម្ព័ន្ធនៅខេត្តព្រះសីហនុ បន្ទាប់ពីមានការរងខូចខាតស្ទើរតែទាំងស្រុង ក្នុងរយៈពេលចុងក្រោយនេះ។ ការអនុញ្ញាតនេះ ធ្វើឡើងតាមសំណើរបស់ក្រុមហ៊ុនចិនទាំងនោះ។

ក្រុមហ៊ុនចិន ដែលមានបំណងរៀបចំហេដ្ឋារចនាសម្ព័ន្ធខេត្តព្រះសីហនុនេះ គឺត្រូវសិក្សាគម្រោងស្តាផ្លូវ និងប្រព័ន្ធលូ ។ អភិបាលខេត្តលោក យន្ត មីន រំពឹងថា ក្រុមហ៊ុនចិន នឹងសហការជាមួយរដ្ឋបាលខេត្ត រួមទាំងមន្ទីរពាក់ព័ន្ធ ក្នុងការស្តារវិស័យហេដ្ឋារចនាសម្ពន្ធ័នៅខេត្តព្រះសីហនុ ឲ្យបានល្អប្រសើរឡើងវិញ។

ផ្លូវមេក្នុងក្រុងសំខាន់ៗដែលលើកយកមកពិភាក្សាគ្នានេះ មានចំនួន៨ខ្សែបែកខ្នែងសំខាន់ៗចំនួន២៨ខ្សែ មានប្រវែងសរុបចំនួន១៤០គម។ ផ្លូវទាំងនេះបានបែកជាខ្នែងសំខាន់ៗចំនួន២៤៥ខ្សែទៀត នៅទូទាំងក្រុងព្រះសីហនុ។ ក្នុងនោះផ្លូវសំខាន់ចំនួន២៨ខ្សែ ក្នុងក្រុងព្រះសីហនុ ជាផ្លូវសំខាន់ដែលត្រូវតែរកវិធីដោះស្រាយចំពោះមុខ ដោយត្រូវតែកែលម្អនិងពង្រីកឲ្យកាន់តែប្រសើរឡើង។ នេះបើតាមលោក ណុប ហេង ប្រធានមន្ទីរសាធារណៈការនិងដឹកជញ្ជូនខេត្តព្រះសីហនុ។

តាមរយៈកិច្ចពិភាក្សានេះ ក្រុមហ៊ុនចិនទាំង៦ អះអាងថា ពួកគេអាចដោះស្រាយបាន លើគម្រោងស្ដារហេដ្ឋារចនាសម្ព័ន្ធនេះ ។ លោក ZHOU CHUANFA អ្នកគ្រប់គ្រងទីផ្សារក្រុមហ៊ុនចិន (THE OVERSEAS CO.,OF CHINA RAILWAY NO.10 ENGINEERING GROUP CO LTD) លើកឡើងថា ពួកគេនឹងសហការជាមួយខេត្តព្រះសីហនុ លើគម្រោងសាងសង់ផ្លូវនិងលូ។ តំណាងក្រុមហ៊ុននេះ បានបញ្ជាក់ថា ក្រុមហ៊ុនពួកគេធ្លាប់មានបទពិសោធក្នុងការសាងសង់ផ្លូវនៅតាមប្រទេសមួយចំនួនក្នុងពិភពលោក។ នេះបើតាមហ្វេសប៊ុករដ្ឋបាលខេត្តព្រះសីហនុ៕