ជាតិ
នយោបាយជាតិ
សម្តេច ហ៊ុន សែន៖ គម្រោងបង្កើតខេត្តថ្មី បានក្លាយជាសាច់ជ្រូក៣ជាន់ សម្រាប់មន្ត្រីខិលខូច
×![]()
ដោយ: ថ្មីៗ
ភ្នំពេញ៖ ខេត្តថ្មីពីរ ដែលរដ្ឋាភិបាល ប្រកាសថានឹងបង្កើតឡើង ត្រូវបានលុបចោលទៅវិញ។ មូលហេតុចម្បង គឺមកពីប្រមុខរដ្ឋាភិបាល ខឹងនឹងមន្ត្រីមួយចំនួន ដែលប្រជែងគ្នាយកតំណែង ខណៈខេត្តថ្មីទាំងពីរ មិនទាន់លេចចេញរូបរាងនៅឡើយ។
ខេត្តថ្មីពីរ ដែលកំពុងស្ថិតក្នុងគម្រោង ដោយមិនទាន់កើតឡើងផង ស្រាប់តែមានមន្ត្រីខ្លះ ហ៊ានស្នើទៅសម្តេចនាយករដ្ឋមន្ត្រី ហ៊ុន សែន ផ្ទាល់តែម្តង ដើម្បីសុំកាន់តំណែងផ្សេងៗ ជាពិសេតំណែងជាអភិបាលនិងអភិបាលរងខេត្ត រួមទាំងតំណែងជាប្រធាននិងអនុប្រធានមន្ទីរផងដែរ។ ទង្វើរបស់មន្ត្រីបែបនេះ ធ្វើឲ្យប្រមុខរដ្ឋាភិបាល ហួសចិត្តនិងខឹងយ៉ាងខ្លាំង ហើយក៏ប្រកាសលុបចោលវិញ នូវគម្រោងបង្កើតខេត្តថ្មី។
ពីវេទិកាស្តីពីទិវាគ្រូបង្រៀន នាថ្ងៃទី៥ ខែតុលា ឆ្នាំ២០១៨នេះ នាយករដ្ឋមន្ត្រីកម្ពុជា អះអាងថា មន្ត្រីទាំងនោះ ថែមទាំងផ្គូផ្គងតំណែងជាមុន និងយកលុយពីគ្នា ដើម្បីដោះដូរយកតំណែង។ មេដឹកនាំកម្ពុជា ស្តីបន្ទោសមន្ត្រីទាំងនោះខ្លាំងៗយ៉ាងដូច្នេះថា៖«ឯងមិនទាន់សម្រេចបង្កើតឬមិនបង្កើតផង មកចែកគ្នាធ្វើចៅហ្វាយខេត្តទៅហើយ។ ខ្ញុំ ចារទៅវិញ តើប្រញាប់ងាប់ទៅណា? វា ទៅជាឆ្កួតអស់ទៅ។ ឥឡូវឈប់ នៅឲ្យស្ងៀម បានហើយ មហាផ្ទៃ កុំធ្វើអ្វីតទៅទៀត»។
រឿងមួយទៀត ដែលធ្វើឲ្យសម្តេច ហ៊ុន សែន មិនសប្បាបយចិត្ត ហើយឈានដល់សម្រេចលុបចោលគម្រោងបង្កើតខេត្តថ្មី គឺដោយសារតែគម្រោងនេះ ត្រូវបានបែកធ្លាយ។ នាយករដ្ឋមន្ត្រី សង្កត់ធ្ងន់បែបនេះថា៖«ខ្ញុំស្មានតែគេយកទៅសិក្សាស្ងាត់ៗ ដូចកាលពីបង្កើតខេត្តត្បូងឃ្មុំ...តែនេះ យកទៅបញ្ចេញតែម្តង ដូចជាមិនដល់២៤ម៉ោងផង។ អ៊ីចឹងហើយ បានជាវាកើតរឿង។ វាបានក្លាយទៅជាសាច់ជ្រូក៣ជាន់ សម្រាប់មន្ត្រីខិលខូច»។
សំឡេងរបស់សម្តេច ហ៊ុន សែន ដែលថ្លែងក្នុងវេទិកាស្តីពីទិវាគ្រូបង្រៀន
ក្រោយសម្តេចនាយករដ្ឋមន្ត្រីប្រកាសរួច ទីស្តីការគណៈរដ្ឋមន្ត្រី ក៏ចេញស.ជ.ណ. (សេចក្តីជូនដំណឹង) មួយភ្លាម ដើម្បីលុបចោលនូវគម្រោងបង្កើតខេត្តថ្មី។
សូមរម្លឹកថា គម្រោងបង្កើតខេត្តថ្មី ត្រូវបានក្រសួងមហាផ្ទៃ ដាក់សំណើទៅកាន់ប្រមុខរដ្ឋាភិបាល កាលពីអំឡុងខែ សីហា ឆ្នាំ២០១៨ ហើយក៏ទទួលបានការយល់ព្រម។ បើតាមគម្រោងនេះ ក្នុងចំណោមខេត្តថ្មីទាំងពីរ មានមួយ គ្រោងបំបែកចេញពីខេត្តកណ្តាល ហើយមួយទៀត គ្រោងបង្កើតចេញពីខេត្តមណ្ឌលគិរី និងខេត្តរតនគិរី៕
© រក្សាសិទ្ធិដោយ thmeythmey.com
