ជាតិ
នយោបាយជាតិ
សម្តេច ហ៊ុន សែន ចេញទៅជប៉ុននៅព្រឹកនេះ ដើម្បីពិភាក្សាពីប្រទេសជាប់ទន្លេមេគង្គ
× ភ្នំពេញ៖ សម្តេចនាយករដ្ឋមន្ត្រី ហ៊ុន សែន បានដឹកនាំគណៈប្រតិភូ ចេញពីប្រទេសកម្ពុជា នៅព្រឹកថ្ងៃទី៦ ខែតុលា ឆ្នាំឆ្នាំ២០១៨នេះ ដើម្បីទៅចូលរួមប្រជុំកំពូលមេគង្គ-ជប៉ុនលើកទី១០ នៅប្រទេសជប៉ុន។ បេសកកម្មរបស់គណៈប្រតិភូកម្ពុជា នៅប្រទេសជប៉ុន នឹងត្រូវបញ្ចប់ នៅថ្ងៃទី៦ ដល់ថ្ងៃទី១០ ខែតុលា។
អ្នក ដែលត្រូវធ្វើដំណើរទៅជាមួយប្រមុខរដ្ឋាភិបាល រួមមាន លោក ប្រាក់ សុខុន រដ្ឋមន្ត្រីក្រសួងការបរទេស និងឥស្សរជនផ្សេងទៀត រួមទាំងថ្នាក់ដឹកនាំនៃសភាពាណិជ្ជកម្មកម្ពុជាផងដែរ។ នេះបើតាមសេចក្តីប្រកាសព័ត៌មានពីក្រសួងការបរទេសកម្ពុជា។
សេចក្តីប្រកាសព័ត៌មាន បញ្ជាក់បែបនេះថា៖«សម្តេច ហ៊ុន សែន នឹងថ្លែងសុន្ទរកថាមួយ ដោយផ្តោតសំខាន់លើទិសដៅនាពេលអនាគត នៃកិច្ចសហប្រតិបត្តិការមេគង្គ-ជប៉ុន»។
បើតាមក្រសួងការបរទេសដដែល កិច្ចប្រជុំនេះ នឹងពិភាក្សា ហើយអនុម័តយុទ្ធសាស្ត្រទីក្រុងតូក្យូថ្មី សំដៅលើកកម្ពស់សុខមាលភាពប្រជាជន និងការការពារបរិស្ថាន។ ប្រភពខាងលើ បានបន្តថា យុទ្ធសាស្ត្រនេះ ផ្តោតសំខាន់លើការអភិវឌ្ឍប្រកបដោយចីរភាព និងការកាត់បន្ថយគម្លាតនៃការអភិវឌ្ឍរវាងប្រទេសមេគង្គ និងប្រទេសសមាជិកអាស៊ានផ្សេងទៀត។
ក្រៅពីកិច្ចប្រជុំនេះ នាយករដ្ឋមន្ត្រីកម្ពុជា ក៏មានជំនួបដាច់ដោយឡែកជាមួយលោក ស៊ីនហ្សូ អាបេ នាយករដ្ឋមន្ត្រីជប៉ុនផងដែរ ជុំវិញបញ្ហាផ្សេងៗ ដែលជាការយកចិត្តទុកដាក់លើកិច្ចសហប្រតិបត្តិការទ្វេភាគី ទាំងក្នុងតំបន់និងថ្នាក់អន្តរជាតិ។
លើសពីនេះ មេដឹកនាំកម្ពុជា នឹងឆ្លៀតជួបសំណេះសំណាលជាមួយសហគមន៍និងសិស្សិតកម្ពុជា ដែលកំពុងរស់នៅនិងសិក្សានៅប្រទេសជប៉ុនផងដែរ៕
© រក្សាសិទ្ធិដោយ thmeythmey.com