ជាតិ
EU ចាប់ផ្ដើមដំណើរការដកប្រព័ន្ធអនុគ្រោះពន្ធកម្ពុជា
× ភ្នំពេញ៖ គណៈកម្មការអឺរ៉ុប បានប្រកាសពីដំណើរការដកប្រព័ន្ធអនុគ្រោះពន្ធកម្ពុជា និងមីយ៉ានម៉ា កាលពីថ្ងៃ៥ តុលា ។ បញ្ហាប្រទេសទាំងពីរនេះ ត្រូវបានគណៈកម្មការអឺរ៉ុប ផ្ដោតទៅលើការរំលោភបំពានសិទ្ធិមនុស្ស និងកម្មករ។
ក្នុងដំណើការបន្តនីតិវីធីនេះ
គណៈកម្មការអឺរ៉ុប បានលើកឡើងពីចំណុចអវិជ្ជមានរបស់កម្ពុជាថា បញ្ហាអភិវឌ្ឍន៍សិទ្ធិមនុស្ស និងសិទ្ធិកម្មករ នៅតែជាបញ្ហា ដែលគ្មានសញ្ញាច្បាស់លាស់បង្ហាញឲ្យឃើញអំពីភាពប្រសើរឡើងឡើយ។ ស្នងការអឺរ៉ុបទទួលបន្ទុកពាណិជ្ជកម្ម បានបញ្ជាក់ដូច្នេះថា៖«យើងនឹងបន្តឆ្ពោះទៅនៃដំណើរការអនុគ្រោះពន្ធនេះ។ វាមានបញ្ហាជាច្រើននៅទីនេះ កាលពីប៉ុន្មានឆ្នាំមុន ហើយករណីខ្លះក្នុងប្រទេសនេះ គឺបានវិលត្រឡប់ថយក្រោយ។ ការបោះឆ្នោតនៅកម្ពុជាក្នុងឆ្នាំនេះ ហើយបន្ទាប់ពីគណៈកម្មការអឺរ៉ុបទៅប្រទេសកម្ពុជា ពួកគេបានកត់សម្គាល់ពីបញ្ហារំលោភ និងការគំរាមកំហែង ព្រមទាំងការដាក់កំហិតដោយលក្ខខណ្ឌជាច្រើន នៅពេលនិយាយដល់សិទ្ធិនយោបាយសំខាន់ៗ»។
ជាមួយគ្នានេះ គណៈកម្មការអឺរ៉ុប ក៏បានលើកយកបញ្ហាមីយ៉ាន់ម៉ា ដែលទាក់ទងនឹងបញ្ហាស្ថានភាពរំលោភបំពានក្រុមជនជាតិដើមភាគតិចរូហ៊ីងយ៉ា ។ ជាពិសេសក្រុមមេដឹកនាំយោធា ដែលពាក់ព័ន្ធនឹងការសម្លាប់ និងបទឧក្រិដ្ឋកម្មប្រឆាំងមនុស្សជាតិផងដែរ។ បញ្ហាទាំងនេះ គឺជាចំណុចសំខាន់ដែលគណៈកម្មការសិទ្ធិមនុស្សយកចិត្តទុកដាក់ ក្នុងការប្រឆាំងដាច់ខាតចំពោះសកម្មភាព និងប្រព័ន្ធហិង្សាទាំងឡាយ។
អមជាមួយការលើកឡើងពីបញ្ហារបស់ប្រទេសទាំងពីរនេះ គណៈកម្មការអឺរ៉ុប ក៏បានរំឭកពីប្រព័ន្ធអនុគ្រោះពន្ធ ដែលកម្ពុជា និងមីយ៉ាន់ម៉ា ទទួលបានកន្លងមកថា រាល់ការផ្ដល់ការអនុគ្រោះពន្ធនេះ គឺជាប្រយោជន៍មួយសម្រាប់ប្រទេសទាំងពីរ ក្នុងការនាំទំនិញចូលទីផ្សារដោយសេរី លើកលែងតែអាវុធ និងគ្រឿងផ្ទុះផ្សេង តាមរយៈការទទួលបានការលើកលែងពន្ធ។ ប៉ុន្តែការទទួលបានប្រព័ន្ធអនុគ្រោះពន្ធនេះ លុះត្រាតែប្រទេសទាំងអនុវត្តឲ្យបានតាមអនុសញ្ញា១៥ របស់អង្គការសហប្រជាជាតិ និងអង្គការពលកម្មអន្តរជាតិ។
មូលហេតុដែលកម្ពុជាអាចទទួលបានការអនុគ្រោះពន្ធ នាំចូលទំនិញទៅទីផ្សារអឺរ៉ុប ដោយសារតែកម្ពុជាស្ថិតនៅក្នុងប្រទេសអភិវឌ្ឍតិចតួច។ ហើយបើមិនមានបញ្ហាអ្វីទេនាពេលខាងមុខ កម្ពុជាអាចទទួលបានការអនុគ្រោះពន្ធ ដល់ឆ្នាំ២០២៧។ នេះបើតាមលោក George Edgar ឯកអគ្គរដ្ឋទូតសហភាពអឺរ៉ុបប្រចាំកម្ពុជា។
កាលពីឆ្នាំ២០១៧កន្លងមក កម្ពុជាបាននាំទំនិញទៅទីផ្សារសហភាពអឺរ៉ុប (EU) ជាង ៥,៧ពាន់លានដុលា្លរអាមរិក ។ កម្ពុជាទទួលបានការអនុគ្រោះពន្ធទាំងស្រុងពីទីផ្សារនេះ។ បើមិនទទួលបានការអនុគ្រោះពន្ធទេ កម្ពុជាត្រូវបង់ពន្ធជាង៥០០លានដុល្លារចូលទីផ្សារអឺរ៉ុប។ ទំនិញដែលទៅទីផ្សារមួយនេះ រួមមាន សំលៀកបំពាក់ ស្រោមជើង ស្បែកជើង អង្ករ គ្រាប់ធញ្ញជាតិ វត្ថុធ្វើពីស្បែក កៅស៊ូ និងទោចក្រយាន ជាដើម៕
© រក្សាសិទ្ធិដោយ thmeythmey.com