ជាតិ
សង្គមជាតិ
ក្រសួងវប្បធម៌៖ យុវនារី គួរដឹងខ្លួនឯងពីការស្លៀកពាក់ទៅវត្ត កុំឲ្យគេណែនាំដដែលៗ លោក ថៃ នរៈសត្យា អ្នកនាំពាក្យក្រសួងវប្បធម៌
× ភ្នំពេញ៖ មិនមែនជារឿងចម្លែកនោះទេ ដែលយុវនារីមួយចំនួន ស្លៀកខ្លីទៅវត្ត។ ទម្លាប់មិនសូវល្អនេះ មានតាំងពីយូរណាស់មកហើយ។ ក្រសួង វប្បធម៌ និងវិចិត្រសិល្បៈ ប្រាប់ឲ្យយុវនារីទាំងនោះ ស្លៀកពាក់ឲ្យបានសមរម្យ នៅពេលចូលវត្ត។
លោក ថៃ នរៈសត្យា បានប្រាប់ដល់សារព័ត៌មានថ្មីៗថា យុវនារីស្លៀកខ្លី មិនត្រឹមតែនៅបុណ្យភ្ជុំបិណ្ឌនោះទេ សូម្បីបុណ្យចូលឆ្នាំខ្មែរ ឬបុណ្យជាតិផ្សេងទៀត ក៏មានយុវនារីស្លៀកខ្លីដែរ ដែលធ្វើឲ្យរងការរិះគន់ខ្លាំងពីសាធារណជន។ ប៉ុន្តែពួកគេ នៅតែអនុវត្តសកម្មភាពនោះដដែល ទោះបីក្រសួងវប្បធម៌ ណែនាំប៉ុនណាក៏ដោយ។
អ្នកនាំពាក្យនៃក្រសួងវប្បធម៌រូបនេះ បានណែនាំថា៖ «នារីគួរដឹងពីកាលៈទេសៈណាគួរស្លៀកអី ពេលបុណ្យទានគួរស្លៀកអី ពេលហែលទឹកគួរស្លៀកអី ដើម្បីកុំឲ្យមានការតិះដៀលពីសាធារណជន។ យើងមិនចង់ស្តីបន្ទាសពួកគេទៀតទេ ដោយសារមានអ្នកខ្លះស្លៀកល្អទៅ ហើយខ្លះទៀតមិនល្អទៅ យើងមានតែណែនាំពួកគេបន្ថែមទៀត យើងចង់ឲ្យតែគេល្អប៉ុណ្ណោះ ទើបសង្គមក៏ល្អទៅតាមហ្នឹងដែរ»។
ចំពោះការស្លៀកខ្លីនេះ មន្ត្រីជាន់ខ្ពស់នៃក្រសួងវប្បធម៌ខាងលើ មិនចង់និយាយច្រើនឡើយ ព្រោះមាននារីភាគច្រើនយល់ដឹងពីរបៀបស្លៀកពាក់បែបណាល្អ ឬបែបណាប៉ះពាល់ហើយ គឺមានតែនារីមួយចំនួន ដែលមិនទាន់យល់តែប៉ុណ្ណោះ។ ទាក់ទងនឹងបញ្ហានេះ លោក នរៈ សត្យា បានបញ្ជាក់ថា ការស្លៀកខ្លីនៅរដូវបុណ្យចូលវត្ត មិនត្រឹមតែធ្វើឲ្យទាស់ភ្នែកអ្នកដទៃនោះទេ ប៉ុន្តែក៏រងការរិះគន់ពីសាធារណជននៅតាមបណ្តាញសង្គមហ្វេសប៊ុក យ៉ាងចាស់ដៃផងដែរ។
ទោះបីមានការណែនាំពីក្រសួងវប្បធម៌យ៉ាងណាក៏ដោយ ពួកគេនៅតែធ្វើទៅតាមទម្លាប់ស្លៀកខ្លីរបស់ពួកគេនៅឡើយ។ ក្រសួងវប្បធម៌ មានតែអំពាវនាវដល់យុវនារីទាំងអស់ចូលរួមអភិវឌ្ឍន៍ ប៉ុន្តែក្នុងន័យអភិរក្សតម្លៃនៃវប្បធម៌ខ្មែរឲ្យបានខ្ជាប់ខ្ជួន៕
Tag:
ក្រសួងវប្បធម៌
ស្លៀកខ្លី
ភ្ជុំបិណ្ឌ
© រក្សាសិទ្ធិដោយ thmeythmey.com