ជាតិ
បុណ្យភ្ជុំបិណ្ឌ
សង្គមជាតិ
ភ្ជុំបិណ្ឌ៖ ក្រសួងទេសចរណ៍ ស្នើឲ្យម្ចាស់អាជីវករថែរក្សាអនាម័យត្រឹមត្រូវ
× ភ្នំពេញ៖ ក្រសួងទេសចរណ៍ បានណែនាំឲ្យសមត្ថកិច្ចគ្រប់ថ្នាក់ និងម្ចាស់អាជីវកម្ម រៀបចំសណ្តាប់ធ្នាប់សាធារណៈ និងទុកដាក់សំរាមឲ្យបានត្រឹមត្រូវ ដើម្បីធានាបានសន្តិសុខ សុវត្ថិភាព និងអនាម័យ នាពិធីបុណ្យភ្ជុំបិណ្ឌខាងមុខនេះ ។
សេចក្តីណែនាំដែលចេញផ្សាយដោយក្រសួងទេសចរណ៍ មានគោលបំណងឲ្យម្ចាស់អាជីវករ ម្ចាស់រមណីយដ្ឋាន និងប្រជាពលរដ្ឋ ចូលរួមអនុវត្ត និងពង្រឹងគុណភាពផលិតផល សេវាកម្ម និងរៀបចំទុកដាក់សំរាម ដាច់ដោយឡែកពីគ្នាទៅតាមប្រភេទខុសគ្នា ។ ជាពិសេសបញ្ឈប់ការបោះចោលក្រដាសជូតមាត់នៅក្រៅធុង។ ទន្ទឹមនឹងនេះ ក្រសួងស្នើឲ្យសមត្ថកិច្ចគ្រប់លំដាប់ថ្នាក់ ត្រូវចុះអប់រំទៅពលរដ្ឋដែលលក់ដូរតាមផ្លូវថ្នល់ឲ្យរក្សាអនាម័យម្ហូប អាហារ និងផ្តល់បដិសណ្ឋានកិច្ចជូនភ្ញៀវទេសចរ។
តាមការណែនាំរបស់ក្រសួងទេសចរណ៍ ឧបាសក ឧបាសិកា និងពុទ្ធបរិស័ទ ចំរុះជើងវត្ត ត្រូវសហការជាមន្ទីរធម្មការ និងសាសនា ដើម្បីរៀបចំវត្តអារាមឲ្យក្លាយជាកន្លែងដែលអាចឈ្វេងយល់ពីប្រវត្តិ និងទំនៀមទម្លាប់នៃការរៀបចំពិធីបុណ្យភ្ជុំបិណ្ឌ និងចូលរួមថែរក្សាអនាម័យក្នុងបរិវេណវត្តនាឱកាសបុណ្យភ្ជុំបិណ្ឌនេះ ។
ជាមួយគ្នាផងដែរ ក្រសួងទេសចរណ៍ ប្រាប់ឲ្យប្រតិបត្តិករទេសចរណ៍ សហការជាមួយអាជ្ញាធរដែនដី និងសមត្ថកិច្ច ចូលរួមទប់ស្កាត់ការជួញដូរគ្រឿងញៀន និងការធ្វើអាជីវកម្មផ្លូវភេទលើកុមារ ។ ជាពិសេសការទប់ស្កាត់រាល់សកម្មភាពរបស់ក្មេងទំនើង។
រាល់ម្ចាស់កាណូត ឬម្ចាស់ទូក«ដ» មិនត្រូវដឹកភ្ញៀវឲ្យលើសចំណុះដែលធ្វើដំណើរកម្សាន្តទៅរមណីយដ្ឋាននានា ដោយឆ្លងកាត់សមុទ្រ ស្ទឹងបឹង ជាដើម។ នេះជាសេចក្តីណែនាំបន្ថែមរបស់ក្រសួងទេសចរណ៍ទៅកាន់ម្ចាស់អាជីករ នៅតាមរមណីយដ្ឋាននានា៕
Tag:
ភ្ជុំបិណ្ឌ
ក្រសួងទេសចរណ៍
បរិស្ថាន
© រក្សាសិទ្ធិដោយ thmeythmey.com