ភ្នំពេញ៖ សម្តេចនាយករដ្ឋមន្ត្រី ហ៊ុន សែន ដែលកំពុងស្ថិតនៅប្រទេសជប៉ុនដើម្បីចូលរួមក្នុងកិច្ចប្រជុំកំពូលមេដឹកនាំប្រទេសមេគង្គ-ជប៉ុនលើកទីដប់ បានថ្លែងថា កម្ពុជាចាត់ទុកជប៉ុននេះជាគម្រូដែលស័ក្តិសមសម្រាប់កម្ពុជារៀនសូត្រតាមក្នុងការអភិវឌ្ឍ និងលើកស្ទួយប្រជាធិបតេយ្យ។
ក្នុងបទសម្ភាសន៍ជាមួយទីភ្នាក់ងារព័ត៌មាន Kyodo ជប៉ុននៅថ្ងៃសុក្រទី ៦ ខែតុលា មុនចាកចេញទៅប្រជុំមេគង្គ-ជប៉ុននៅជប៉ុន នាយករដ្ឋមន្ត្រីកម្ពុជាសម្តេច ហ៊ុន សែន បានបញ្ជាក់ច្បាស់ថា ជប៉ុនជាគម្រូប្រជាធិបតេយ្យដែលកម្ពុជាគួររៀនសូត្រតាម ហើយជប៉ុននេះជាប្រទេសដែលមួយគត់ដែលកម្ពុជាអាចរៀនបាន។
សម្តេចបានថ្លែងក្នុងបទសម្ភាសន៍បែបនេះ៖ «ខ្ញុំតែងតែក្រឡេកទៅមើលប្រទេសអភិវឌ្ឍមួយចំនួនក្នុងតំបន់ និងលើពិភពលោក ដើម្បីខ្ញុំអាចរៀនសូត្របានពីពួកគេជុំវិញបញ្ហាសេដ្ឋកិច្ច និងនយោបាយ។ ជាក់ស្តែង ជប៉ុនតែងតែអាចរក្សាសេដ្ឋកិច្ចរឹងមាំ និងស្ថិរភាពនយោបាយ។ ជប៉ុននេះជាគម្រូមួយនៃប្រជាធិបតេយ្យពិតប្រាកដ»។
សម្តេចបានលើកឡើងពីការរៀនសូត្រពីជប៉ុនដើម្បីអភិវឌ្ឍ និងពង្រឹងលទ្ធិប្រជាធិបតេយ្យបែបនេះ ដើម្បីឆ្លើយតបនឹងសំណួរថាតើ កម្ពុជានឹងដើរទៅមុខលើផ្លូវប្រជាធិបតេយ្យរបៀបណា ក្រោយគណបក្សប្រជាជនកម្ពុជាជាបក្សកាន់អំណាចឈ្នះឆ្នោតភ្លូកទឹកភ្លូកដីកាលពីថ្ងៃ ២៩ ខែកក្កដា នឹងក្រសោបយកអាសនៈសភាទាំងអស់។
យ៉ាងណាមិញ ការបោះឆ្នោតរងការរិះគន់ខ្លាំង ដោយសារការបោះឆ្នោតប្រព្រឹត្តទៅដោយគ្មានគណបក្សប្រឆាំងដែលមានឥទ្ធិពលក្នុងការបោះឆ្នោតនេះ។ សហរដ្ឋអាមេរិក និងសហភាពអឺរ៉ុប ជាដើម ចាត់ទុកការបោះឆ្នោត ដែលគ្មានវត្តមានគណបក្សប្រឆាំងនោះ មិនស្របតាមគន្លងប្រជាធិបតេយ្យឡើយ។
កម្ពុជាចង់ដំឡើងកម្រិតទំនាក់ទំនងជាមួយជប៉ុនទៅ «ដៃគូយុទ្ធសាស្ត្រគ្រប់ជ្រុងជ្រោយ»
ដោយឡែក ក្នុងបទសម្ភាសន៍ដដែលនោះ សម្តេច ក៏បានលើកសរសើររដ្ឋាភិបាលនិងប្រជាជនជប៉ុនដែលបានរួមចំណែកធំធេងក្នុងការជួយអភិវឌ្ឍសេដ្ឋកិច្ច និងសង្គម។ បន្ថែមពីនេះ សម្តេចក៏បង្ហើបពីបំណងរបស់រដ្ឋាភិបាលកម្ពុជាក្នុងការដំឡើងកម្រិតទំនាក់ទំនងរវាងប្រជាជាតិទាំងពីរទៅដល់ «ភាពជាដៃគូយុទ្ធសាស្ត្រគ្រប់ជ្រុងជ្រោយ»ដែរ។
ចង់បានភាពជាដៃគូយុទ្ធសាស្ត្រគ្រប់ជ្រុងជ្រោយជាមួយជប៉ុនក្នុងពេលណាមួយខាងមុខ។ បើសិនជាមានការឯកភាពគ្នាសម្រេចដំឡើងកម្រិតដល់ដៃគូយុទ្ធសាស្ត្រគ្រប់ជ្រុងជ្រោយនោះ ជប៉ុននឹងក្លាយជាប្រទេសទីពីរដែរ ស្របពេលចំណងមិត្តភាពប្រជាជាតិទាំងពីរឈានដល់វ័យ ៦៥ឆ្នាំក្នុងឆ្នាំ ២០១៨ហើយនេះ។
កម្ពុជា និងជប៉ុនបានក្លាយជាដៃគូយុទ្ធសាស្ត្រឆ្នាំ ២០១៣ ហើយមានតែចិនប៉ុណ្ណោះដែលបានបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយជាមួយកម្ពុជាតាំងពីឆ្នាំ ២០១០។ បើសិនជា ជប៉ុន និងកម្ពុជាឯកភាពគ្នាដំឡើងកម្រិតដៃគូយុទ្ធសាស្ត្រមែននោះ ជប៉ុនជាប្រទេសទីពីរបន្ទាប់ពីចិនដែរ។
សូមបញ្ជាក់ថា សម្តេច ហ៊ុន សែន បានដឹកនាំគណៈប្រតិភូ ចេញពីប្រទេសកម្ពុជា នៅព្រឹកថ្ងៃទី៦ ខែតុលា ឆ្នាំឆ្នាំ២០១៨នេះ ដើម្បីទៅចូលរួមប្រជុំកំពូលមេគង្គ-ជប៉ុនលើកទី១០ នៅប្រទេសជប៉ុន។
បើតាមក្រសួងការបរទេសដដែល កិច្ចប្រជុំថ្នាក់តំបន់នេះ នឹងពិភាក្សា និងអនុម័តយុទ្ធសាស្ត្រទីក្រុងតូក្យូថ្មីឆ្នាំ ២០១៨ ដែលមានសសរស្តម្ភបីមានការផ្សាភ្ជាប់, ប្រជាជន និងការការពារបរិស្ថាន។
ក្រៅពីកិច្ចប្រជុំនេះ នាយករដ្ឋមន្ត្រីកម្ពុជា ក៏មានជំនួបដាច់ដោយឡែកជាមួយនាយករដ្ឋមន្ត្រីជប៉ុនលោក ស៊ីនហ្សូ អាបេ ដើម្បីពិភាក្សាពីបញ្ហាកិច្ចសហប្រតិបត្តិការទ្វេភាគី ទាំងក្នុងតំបន់និងថ្នាក់អន្តរជាតិ៕