កម្ពុជាស្វាគមន៍ទីម័រខាងកើត ប៉ុន្តែលោក Honda មិនបានឈរបញ្ជាផ្ទាល់ឡើយ

កីឡាជាតិ

ជាតិ

កម្ពុជាស្វាគមន៍ទីម័រខាងកើត ប៉ុន្តែលោក Honda មិនបានឈរបញ្ជាផ្ទាល់ឡើយ

12, Oct 2018 , 2:58 pm

រូបភាព

ដោយ:

ក្រុមកីឡាករជម្រើសជាតិកម្ពុជា ត្រូវតទល់ជាមួយទីម័រខាងកើត នាជំនួបមិត្តភាពអន្តរជាតិនៅម៉ោង៦:៣០នាទីល្ងាចថ្ងៃទី១២ ខែតុលា ឆ្នាំ២០១៨ នាពហុកីឡដ្ឋានជាតិ។ អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda គ្មានវត្តមានក្នុងជំនួបនេះទេ ដោយសារជាប់ភារកិច្ចនៅក្លិបអាជីពរបស់ខ្លួន។

លោក Keisuke Honda អ្នកចាត់ការទូទៅក្រុមជម្រើសជាតិកម្ពុជា ដែលបានដឹកនាំក្រុមកម្ពុជាក្នុងជំនួបមិត្តភាពអន្តរជាតិលើកដំបូងជាមួយម៉ាឡេស៊ី កាលពីថ្ងៃទី១០ កញ្ញា នឹងគ្មានវត្តមានដឹកនាំក្នុងជំនួបលើកទី២របស់កម្ពុជានៅល្ងាចនេះ។ លោក Felix Gonzalez Dalmas គ្រូបង្វឹកក្រុមជម្រើសជាតិកម្ពុជា ត្រូវទទួលភារកិច្ចដឹកនាំក្រុមនៅលើទីលានជំនួសលោក Honda នាជំនួបតទល់ជាមួយក្រុមទីម័រខាងកើត។

បើតាមប្រវត្តិជួបគ្នា៦លើកកន្លងមក កម្ពុជាធ្លាប់យកឈ្នះទីម័រខាងកើតចំនួន៤លើក ស្មើ និងចាញ់១លើក។ កម្ពុជាបានបញ្ចប់ក្នុងលទ្ធផលស្មើ ២-២ ជាមួយទីម័រខាងកើតនាជំនួបវគ្គជម្រុះពានរង្វាន់ AFF Championship 2008 មុនកម្ពុជាយកឈ្នះ ៤-២ ក្នុងព្រឹត្តិការណ៍ AFF Championship នៅឆ្នាំ២០១០។

នៅឆ្នាំ២០១២ ក្នុងព្រឹត្តិការណ៍ដដែលនេះ ទីម័រខាងកើតបានយកឈ្នះកម្ពុជា ៥-១។ នៅឆ្នាំ២០១៤ ក្នុងព្រឹត្តិការណ៍នេះដែរ កម្ពុជាបានយកឈ្នះទីម័រខាងកើត ៣-២ ហើយបានបន្តឈ្នះ ២-០ នាការប្រកួតមិត្តភាពអន្តរជាតិនៅឆ្នាំ២០១៦ និងយកឈ្នះ ៣-២ ក្នុងវគ្គជម្រុះ AFF Championship ឆ្នាំ២០១៦។

តើកីឡាកររូបណានឹងក្លាយជាក្លាយម្ចាស់អាវលេខ១១ក្នុងជំនួបជាមួយទីម័រខាងកើតនៅល្ងាចនេះ? នេះជាចម្ងល់របស់អ្នកគាំទ្រដែលទន្ទឹងចង់ដឹងកីឡាកររូបណាក្នុងចំណោមកីឡាករ ចាន់ វឌ្ឍនាកា និង ស៊ិន កក្កដា នឹងក្លាយជាម្ចាស់លេខអាវនេះ។ នាជំនួបមិត្តភាពអន្តរជាតិលើកដំបូងជាមួយម៉ាឡេស៊ី លោក Keisuke Honda បានប្រគល់លេខអាវនេះឲ្យទៅកីឡាករ ស៊ិន កក្កដា។ ប៉ុន្តែកាលនោះគ្មានវត្តមានកីឡាករ ចាន់ វឌ្ឍនាកា ក្នុងក្រុមជម្រើសជាតិនោះទេ ខណៈ វឌ្ឍនាកា បានគ្រប់គ្រងលេខនេះជាយូរមកហើយកាលពីពេលកន្លងទៅ៕