លោក អ៊ឹម ដារ៉ូ៖ ខ្ញុំជ្រើសរើសជំនាញ ដោយគិតទាំងទីផ្សារការងារ និងចិត្តស្រលាញ់

ជាតិ

បទយកការណ៍ / បទសម្ភាសន៍

លោក អ៊ឹម ដារ៉ូ៖ ខ្ញុំជ្រើសរើសជំនាញ ដោយគិតទាំងទីផ្សារការងារ និងចិត្តស្រលាញ់

15, Oct 2018 , 10:39 pm

រូបភាព

ដោយ:

ភ្នំពេញ៖ ការចាប់ជំនាញសិក្សា គឺជាប្រធានបទមួយដ៏សំខាន់ចំពោះសិស្សនិស្សិតទូទៅ ពិសេសសិស្សដែលទើបប្រឡងបាក់ឌុបហើយ។ តែងមានការចោទជាសំណួរថា តើគេគួរជ្រើសរើសជំនាញ ទៅតាមការស្រលាញ់ពេញចិត្ត ឬតាមតម្រូវការទីផ្សារការងារ? ចំពោះចំណុចនេះ លោក អ៊ឹម ដារ៉ូ ដែលជាអតីតនិស្សិតឆ្នើមមួយរូប បានប្រាប់ពីបទពិសោធន៍ខ្លួនថា រូបលោកចាប់ជំនាញសិក្សានៅមហាវិទ្យាល័យ ដោយឈរលើមូលដានពីររួមគ្នា គឺទាំងចិត្តស្រលាញ់ និងតម្រូវការទីផ្សារការងារ។

សូមស្ដាប់បទសម្ភាសខ្លីមួយរវាងលោក ញ៉ុង ហេង នៃសារព័ត៌មានថ្មីៗ និងលោក អ៊ឹម ដារ៉ូ ជាអតីតនិស្សិតឆ្នើមនៃសាកលវិទ្យាល័យបច្ចេកវិទ្យាកម្ពុជា (តិចណូ) ហើយបច្ចុប្បន្នលោកបំពេញការងារជាអ្នកសរសេរកូដ នៅក្នុងក្រុមហ៊ុនទូរសព្ទចល័តមួយ ដូចតទៅនេះ៖

លោក អ៊ឹម ដារ៉ូ រៀបរាប់ថា កាលនៅរៀនវិទ្យាល័យ រូបលោកស្រលាញ់ជំនាញនុយក្លេអ៊ែរ តែដោយសារអត់មានឱកាសការងារ ក៏សម្រេចយកជំនាញអេឡិចត្រូនិកស្វ័យប្រវត្តិកម្ម ដែលជាជំនាញស្រលាញ់ទី២ និងមានទីផ្សារការងារ។ លោកទទួលបានអាហារូបករណ៍សិក្សាបរិញ្ញាបត្រលើជំនាញនេះ នៅសាលាតិចណូ។ តែលោក ដារ៉ូ មានព័ត៌មាន និងសម្រេចចិត្តបែបនេះបាន ក៏ព្រោះលោកមានការណែនាំពីលោកគ្រូ អ្នកគ្រូ និងអ្នកដែលរាប់អានរូបលោក។

អត្ថបទទាក់ទង

អតីតនិស្សិតឆ្នើម អ៊ឹម ដារ៉ូ៖ ជីវិតសិក្សានៅវិទ្យាល័យ និងមហាវិទ្យាល័យ ខុសគ្នាដាច់

ពេលរៀននៅមហាវិទ្យាល័យ យុវជនរូបនេះ ឆ្លៀតស្រាវជ្រាវជំនាញព័ត៌មានវិទ្យា (IT) បន្ថែម ព្រោះលោកមានបំណងចេះពីរជំនាញក្នុងពេលតែមួយ ដែលនៅពេលស្វែងការងារ នឹងមានអាទិភាពជាងអ្នកចេះជំនាញតែមួយ។ ជាក់ស្ដែងការងារដែលលោកធ្វើសព្វថ្ងៃខាងសរសេរកូដនេះ គឺប្រើជំនាញ IT នេះឯង។

ទោះយ៉ាងណា IT នេះ គឺជាជំនាញដែលពាក់ព័ន្ធនឹងជំនាញគោលរបស់លោក«អេឡិចត្រូវនិកស្វ័យប្រវត្តិកម្ម» ពោលគឺមិនមែនជំនាញដាច់ដោយឡែកនោះទេ។ ក្នុងការសិក្សាកន្លងមក លោកបានសំយោគជំនាញពីរនេះបញ្ចូលគ្នា សម្រាប់ច្នៃប្រឌិដ្ឋលើស្នាដៃបច្ចេកវិទ្យាផ្សេងៗរបស់លោក ក៏ដូចជាសម្លឹងឱកាសចាប់សក្ដានុពលណាមួយ ទៅថ្ងៃខាងមុខ៕