កីឡាជាតិ
ជាតិ
សិង្ហបុរី សរសេរអ្វីខ្លះពីកម្ពុជាមុនប៉ះគ្នាថ្ងៃស្អែក
× ក្រុមកីឡាបាល់ទាត់ជម្រើសជាតិកម្ពុជានឹងបើកទ្វារស្វាគមន៍សិង្ហបុរីសម្រាប់ជំនួបមិត្តភាពអន្តរជាតិ នៅកីឡដ្ឋានជាតិអូឡាំពិកនាល្ងាចថ្ងៃទី១៦ ខែតុលា និងជាការប្រកួតកំដៅសាច់ដុំត្រៀមប្រជែងពានរង្វាន់ Suzuki Cup ឆ្នាំ២០១៨ ខាងមុខ។
នៅមុនជំនួបរវាងក្រុមទាំងពីរ សហព័ន្ធកីឡាបាល់ទាត់សិង្ហបុរី (FAS) នៅថ្ងៃទី១៤ តុលា តាមរយៈគេហទំព័រផ្ទាល់របស់ខ្លួនបានសរសេររៀបរាប់ពីប្រវត្តិខ្លះៗរបស់ក្រុមរហស្សនាមគោព្រៃកម្ពុជា ពោលគឺចាប់តាំងពីប្រទេសនេះបានចូលរួមជាមួយ FIFA ពីឆ្នាំ១៩៥៣មក។
ពួកគេបានសរសេរដូច្នេះថា គូប្រជែងនៅតំបន់អាស៊ានរបស់សិង្ហបុរីមានប្រជាជនប្រហែល ១៥ លាននាក់ ដែលក្នុងនោះ ៩៧ភាគរយគឺជាខ្មែរ។ កីឡាបាល់ទាត់គឺជាកីឡាដែលមានប្រជាប្រិយភាពបំផុតនៅក្នុងប្រទេសកម្ពុជា។
កម្ពុជាបានចូលជាសមាជិករបស់សហព័ន្ធកីឡាបាល់ទាត់អន្តរជាតិ FIFA ក្នុងឆ្នាំ ១៩៥៣ ហើយនៅឆ្នាំ ១៩៧២ ដែលកម្ពុជាកាលណោះនៅជាសាធារណរដ្ឋខ្មែរបានទទួលជ័យជម្នះដ៏អស្ចារ្យបំផុតនៅក្នុងការប្រកួតអន្តរជាតិដែលអាចឈរនៅលំដាប់ទីបួនក្នុងព្រឹត្តិការណ៍ Asian Cup។
ចំណាត់ថ្នាក់ FIFA Ranking ខ្ពស់បំផុតរបស់កម្ពុជាគឺនៅឆ្នាំ១៩៩៨ ដោយឈរនៅលេខរៀងទី ១៦២ និងកម្រិតទាបបំផុតគឺនៅចំណាត់ថ្នក់ទី ១៨៩ នៅឆ្នាំ ២០១៣។ តែបច្ចុប្បន្នកម្ពុជាឈរនៅលេខរៀងទី១៦៩។
លើសពីនេះទៀតនោះ FAS បានសរសេរពីកីឡាករកម្ពុជា៣រូបដែលរួមមានប្រធានក្រុម កួច សុកុម្ភៈ ប៉ិន ចាន់ធារី និងខ្សែប្រយុទ្ធឆ្នើម ចាន់ វឌ្ឍនាកា ដោយរៀបរាប់ពីសមិទ្ធផលដែលពួកគេទទួលបានកន្លងមក។
ស្ថាប័នដឹកនាំកីឡាបាល់ទាត់សិង្ហបុរីមួយនេះក៏បានរៀបរាប់ពីប្រវត្តិរបស់លោក Keisuke Honda អ្នកចាត់ការទូទៅថ្មីរបស់គោព្រៃកម្ពុជាផងដែរ។ ពួកគេសរសេថា អតីតសមាជិក AC Milan និង CSKA Moscow ដែលបច្ចុប្បន្នជាកីឡាកររបស់ក្លិប Melbourne Victory នៃលីគកំពូលអូស្ត្រាលីផងនោះ បានដឹកនាំកម្ពុជាដោយតែងតាំលោក Felix Gonzalez ជាជំនួយការ និងជាគ្រូបង្គោល ដ្បិត Honda មិនទាន់មានអាជ្ញាប័ណ្ឌគ្រូបង្វឹកនៅឡើយ។
សូមបញ្ជាក់ថា ក្រោមការដឹកនាំរបស់ Honda ចំនួនពីប្រកួតកន្លងមក កម្ពុជាទទួលបានលទ្ធផលចាញ់១ និងស្មើ១ ក្នុងនោះចាញ់ម៉ាឡេស៊ី ៣-១ និងស្មើទីម័រខាងកើត ២-២ នៅក្នុងផ្ទះខ្លួនឯង៕
© រក្សាសិទ្ធិដោយ thmeythmey.com