កាសែតអាមេរិកបានផ្សព្វផ្សាយនៅដើមសប្តាហ៍នេះថា អារ៉ាប៊ីសាអូឌីត ទំនងជាត្រៀមសារភាពថា អ្នកកាសែតអារ៉ាប៊ីសាអូឌីតលោក Jamal Khashoggi ដែលបានបាត់ខ្លួនកាលពីពីរសប្តាហ៍មុននោះបានស្លាប់ក្នុងការសួរចម្លើយមួយដែលរៀបចំឡើងដោយអង្គភាពចារកម្មអារ៉ាប៊ីសាអូឌីតនោះ។ កន្លងមក ក្រុងរីយ៉ាដ បន្តទាត់ចោលការចោទប្រកាន់ដែលថាខ្លួននៅពីក្រោយការបាត់ខ្លួនរបស់អ្នកកាសែតល្បីខាងលើ។
កាសែតអាមេរិកធំៗពីរមាន CNN និង Wall Street Journal បានស្រង់សម្តីប្រភពស្និទ្ធនឹងបញ្ហាបាត់ខ្លួនអ្នកសារព័ត៌មាន Jamal Khashoggi ដែលកើតឡើងនេះកាលពីថ្ងៃចន្ទ។ បើតាម CNN អារ៉ាប៊ីសាអូឌីត កំពុងរៀបចំរបាយការណ៍ដោយទទួលស្គាល់ការស្លាប់របស់លោក Khashoggi ក្នុងពេលសួរចម្លើយក្រោយត្រូវចាប់ខ្លួន។ ប៉ុន្តែប្រភពដែល CNN ដកស្រង់បញ្ជាក់ថា របាយការណ៍ដែលអារ៉ាប៊ីសាអូឌីតកំពុងរៀបចំនេះអាចនឹងត្រូវផ្លាស់ប្តូរថែមទៀត។
ចំណែក Wall Street Journal វិញបានបញ្ជាក់ថា អារ៉ាប៊ីសាអូឌីតកំពុងថ្លឹងថ្លែង ដោយបញ្ជាក់ក្នុងរបាយការណ៍របស់ខ្លួនថា លោក Khashoggi ត្រូវក្រុមឃាតកសង្គមងងឹតសម្លាប់ដោយអចេតនាក្នុងពេលសួរចម្លើយដែរ។
តាមពិតទៅ លោក Khashoggi ត្រូវបានគេស្គាល់ថា ជាអ្នកកាសែតម្នាក់មានឈ្មោះល្បីល្បាញម្នាក់ដោយសារលោកហ៊ានរិះគន់រជ្ជទាយាទអារ៉ាប៊ីសាអូឌីត Mohammed bin Salman ។ លោក Khashoggi បានរត់ទៅរស់នៅសហរដ្ឋអាមេរិក ក្រោយពេលរជ្ជទាយាទខាងលើអនុវត្តគោលនយបាយបង្ក្រាបអំពើពុករលួយតែតាមពិតបិទមាត់ពួកប្រឆាំង។ លោកបានបាត់ខ្លួនឈឹងក្រោយពេលដែលលោកចូលទៅកាន់ស្ថានកុងស៊ុលអារ៉ាប៊ីសាអូឌីតនៅក្រុងអ៊ីស្តង់ប៊ុលប្រទេសតួកគីថ្ងៃ ២ ខែតុលា។
ក្រោយការបាត់ខ្លួន ខាងអាជ្ញាធរតួកគីកន្លងមកបានអះអាងថា អ្នកកាសែតរូបនេះត្រូវបានអារ៉ាប៊ីសាអូឌីតសម្លាប់ចោល ប៉ុន្តែខាងអារ៉ាប៊ីសាអូឌីតបានទាត់ចោលការចោទប្រកាន់នេះជាបន្តបន្ទាប់។
ចំណែកសហរដ្ឋអាមេរិក ធ្លាប់បានគំរាមដាក់ទណ្ឌកម្មអារ៉ាប៊ីសាអូឌីតក្រោយមានករណីបាត់ខ្លួនអ្នកកាសែតនេះ។ ប៉ុន្តែប្រធានាធិបតី ដូណាល់ ត្រាំ បានប្រកាសនៅថ្ងៃចន្ទដែរថា លោកបាននិយាយទូរសព្ទជាមួយក្សត្រអារ៉ាប៊ីសាអូឌីត Salman ជុំវិញបញ្ហាចម្រូងចម្រាស និងអាថ៌កំបាំងនេះដែរ។ លោក ត្រាំ ហាក់ដូចជាគាំទ្រការលើកឡើងថា ការបាត់ខ្លួនរបស់លោក Khashoggi អាចជា ស្នាដៃរបស់ក្រុមឃាតកសង្គមងងឹតដែរ។
តាមការចុះផ្សាយរបស់ទីភ្នាក់ងារព័ត៌មាន AFP ដើម្បីស្វែងយល់បញ្ហាឲ្យកាន់តែស៊ីជម្រៅ លោក ត្រាំ ក៏បានបញ្ជូនប្រមុខការទូតខ្លួនលោក ម៉ៃ ប៉ុមប៉េអូ ទៅកាន់អារ៉ាប៊ីសាអូឌីតដើម្បីជួបជាមួយមេដឹកនាំប្រទេសនេះដែរ។ លោក ប៉ុមប៉េអូ បានទៅដល់អារ៉ាប៊ីសាអូឌីតនៅថ្ងៃ អង្គារ ទី ១៦ តុលាហើយលោកនឹងត្រូវជួបជាមួយប្រមុខការទូតតួកគី Mevlut Cavusoglu ទៀតក្រោយចាកចេញពីអារ៉ាប៊ីសាអូឌីត។
មន្ត្រីជាន់ខ្ពស់អាមេរិកធ្វើដំណើរទៅកាន់អារ៉ាប៊ីសាអូឌីត កើតឡើងស្របពេលដែលអាជ្ញាធរតួកគីនៅយប់ថ្ងៃចន្ទទី ១៥ ខែតុលា បានចូលឆែកឆេរស្ថានកុងស៊ុលអារ៉ាប៊ីសាអីឌីតក្នុងទឹកដីខ្លួន ដោយមានការឯកភាពពីសំណាក់អារ៉ាប៊ី សាអូឌីតដែរ។ ការចុះឆែកឆេរធ្វើឡើងក្នុងរយៈពេលរហូតដល់ ៨ម៉ោងឯណោះ ប៉ុន្តែគេមិនទាន់ដឹងច្បាស់ថា ភស្តុតាង ឬតម្រុយអ្វីដែលខាងអាជ្ញាធរតួកគីរកឃើញក្នុងប្រតិបត្តិការនោះឡើយ ព្រោះអាជ្ញាធរទាំងនោះមិនបាននិយាយឬបកស្រាយចំពោះមុខអ្នកសារព័ត៌មានឡើយ៕