កីឡាជាតិ
ជាតិ
×![]()
យុវជនសាលាបាល់ទាត់ជាតិបាទីចំនួន១៦រូប ត្រូវបានរំសាយ បន្ទាប់ពីពួកគេគ្រប់អាយុត្រូវចាកចេញ។ រាល់អត្ថប្រយោជន៍នានា ដែលសាលាបាល់ទាត់ជាតិបាទីធ្លាប់ផ្តល់ឲ្យ ត្រូវក្លាយជាបន្ទុករបស់ពួកគេផ្ទាល់។ ការរំសាយនេះ មិនត្រឹមតែគ្មានផលប៉ះពាល់នោះទេ ថែមទាំងជាឱកាសល្អសម្រាប់ពួកគេក្នុងការអភិវឌ្ឍសមត្ថភាពឲ្យកាន់តែប្រសើរទៀតផង។ នេះបើតាមការអះអាងរបស់លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា។
កីឡាករ សេត ម៉ាន់ស៊ូត, ហេង ទីណា, រ័ត្ន ប៊ុននូ, ហ៊ុល គឹមហ៊ុយ, ទេស សម្បត្តិ, សឿត ណាវ៉ា, គង់ ពីលត់, ផុន តៃនិញ, ឡុង ម៉េងហាវ, ទូច គឹមឆាយ, អាត អូនតូច, ទៀត គឹមហេង, ផាច សុជាវីឡា, ឈឿង វិស៊ីនុ, លន ថេន និង សៀន សុភក្ត្រា ត្រូវបានសហព័ន្ធកីឡាបាល់ទាត់កម្ពុជាប្រកាសរំសាយពីមជ្ឈមណ្ឌលសាលាបាល់ទាត់ជាតិបាទី។ ក្នុងចំណោមកីឡាករទាំង១៦នាក់នោះ មាន សេត ម៉ាន់ស៊ូត, ផុន តៃនិញ និងទូច គឹមឆាយ បានសុំលាឈប់មុនការរំសាយផ្លូវការ។
បើតាមលោក កែវ សារ៉េត អគ្គលេខាធិការសហព័ន្ធកីឡាបាល់ទាត់ជាតិបាទី ការរំសាយនេះ បន្ទាប់ពីកីឡាករមួយចំនួនបានរៀនចប់ថ្នាក់ទី១២ និងមួយចំនួនដល់អាយុកំណត់(កើតនៅឆ្នាំ២០០០)។ ព្រោះតាមលក្ខខណ្ឌកីឡាករអាចស្នាក់នៅ និងហ្វឹកហាត់បាល់ទាត់នៅសាលាបាល់ទាត់ជាតិបាទីបាន លុះត្រាមានអាយុក្រោម១៨ឆ្នាំ និងរៀននៅកម្រិតវិទ្យាល័យ។
លោក កែវ សារ៉េត (មុខគេ) ថ្លែងក្នុងសន្និសីទសារព័ត៌មានស្តីពីការរំសាយយុវជនសាលាបាល់ទាត់ជាតិបាទី
តាមរយៈការរំសាយនេះ មានន័យថា រាល់ការចំណាយផ្សេងៗរបស់យុវជនទាំង១៦រូបខាងលើ លែងជាបន្ទុករបស់សាលាបាល់ទាត់ជាតិបាទីទៀតហើយ ពោលគឺរាល់ការចំណាយទាំងលើថ្លៃសិក្សានៅថ្នាក់បន្ទាប់ និងចំណាយផ្សេងៗជាបន្ទុករបស់កីឡាករ។ «នៅពេលបញ្ចប់ពីសាលាបាល់ទាត់ជាតិបាទីទៅ មានន័យថា ពួកគេចេញផុតពីការគ្រប់គ្រងរបស់សាលាបាល់ទាត់ជាតិបាទី។ ហើយរាល់ការចំណាយក្រោយការរំសាយជាបន្ទុករបស់គាត់ ឬក្លិបដែលទទួលយកគាត់»។ នេះជាការបញ្ជាក់របស់លោក កែវ សារ៉េត។
ទោះបីយ៉ាងនេះក្តីអតីតនាយកសាលាបាល់ទាត់ជាតិបាទីរូបនេះអះអាងថា ការរំសាយនេះ គ្មានផលប៉ះពាល់ណាមួយដល់កីឡាករទាំង១៦រូបនោះឡើយ។ ផ្ទុយទៅវិញ វាជាឱកាសដ៏ល្អសម្រាប់ពួកគេក្នុងការអភិវឌ្ឍសមត្ថភាពឲ្យកាន់តែប្រសើរ ដើម្បីសម្រេចបំណងចង់ក្លាយជាកីឡាករល្បីទៅថ្ងៃអនាគត ព្រោះពួកគេសុទ្ធតែបានចុះកិច្ចសន្យាលេងឲ្យក្លិបក្នុងក្របខណ្ឌកំពូលកម្ពុជា។
ជាមួយគ្នានេះ កីឡាករ ទៀត គឹមហេង ដែលចុះកិច្ចសន្យាលេងក្លិបវិសាខាបានអះអាងថា ការរំសាយពីសាលាបាល់ទាត់ជាតិបាទីនេះ មិនមានផលប៉ះពាល់នោះទេ ព្រោះក្លិបវិសាខាបានផ្តល់អត្ថប្រយោជន៍ជាច្រើនដល់រូបគេ។ លើសពីនេះ ជាឱកាសដ៏ល្អក្នុងការអភិវឌ្ឍសមត្ថភាពឲ្យកាន់តែរីកចម្រើនសម្រាប់គេទៀតផង។
«ឆ្លងតាមការហ្វឹកហាត់រយៈពេល៤ឆ្នាំនៅសាលាបាល់ទាត់ជាតិបាទី ពួកយើងមិនទាន់មានសមត្ថភាពគ្រប់គ្រាន់នោះទេ។ ដូច្នេះពួកខ្ញុំត្រូវការទៅរួមរស់ជាមួយក្លិប ដើម្បីហ្វឹកហាត់ពង្រឹងសមត្ថភាព និងបច្ចេកទេសបន្ថែមទៀត។ សម្រាប់ខ្ញុំអាចមានការលំបាកខ្លះដែរជាមួយក្លិបថ្មី ព្រោះក្លិបនីមួយៗមានទម្រង់លេងរៀងៗខ្លួន តែខ្ញុំប្តេជ្ញាថា នឹងប្រឹងប្រែងឲ្យអស់ពីសមត្ថភាព»។ នេះជាការលើកឡើងរបស់កីឡាករ ទៀត គឹមហេង ក្នុងសន្និសីទសារព័ត៌មានស្តីពីការរំសាយយុវជនសាលាបាល់ទាត់ជាតិបាទី។
ក្រោយការរំសាយកីឡាករ សេត ម៉ាន់ស៊ូត, ហេង ទីណា និង រ័ត្ន ប៊ុននូ បានចុះកិច្ចសន្យាលេងក្លិបណាហ្គាវើល រីឯ ហ៊ុល គឹមហ៊ុយ, ទេស សម្បត្តិ និង សឿត ណាវ៉ា លេងឲ្យបឹងកេត ខណៈ គង់ ពីលត់, ផុន តៃនិញ, ឡុង ម៉េងហាវ, ទូច គឹមឆាយ, អាត អូនតូច និង ទៀត គឹមហេង លេងឲ្យវិសាខា និង ផាច សុជាវីឡា, ឈឿង វិស៊ីនុ, លន ថេន និង សៀន សុភក្ត្រា ចុះកិច្ចសន្យាលេងឲ្យអគ្គិសនីកម្ពុជា៕
Tag:
បាល់ទាត់
សាលាបាល់ទាត់ជាតិបាទី
សាន សារ៉េត
© រក្សាសិទ្ធិដោយ thmeythmey.com
