ជាតិ
ប្រជុំអាស៊ី-អឺរ៉ុប៖ សម្ដេច ហ៊ុន សែន នឹងធ្វើបទអន្តរាគមន៍ឆ្លើយតបការលើកឡើងពីកម្ពុជារងសម្ពាធEU
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន នឹងចូលរួមកិច្ចប្រជុំកំពូលអាស៊ីអឺរ៉ុប (ASEM) លើកទី១២ នៅថ្ងៃទី១៨-១៩ តុលា។ ក្នុងកិច្ចប្រជុំនេះ សម្ដេច ហ៊ុន សែន គ្រោងធ្វើបទអន្តរាគមន៍ពីការអភិវឌ្ឍកម្ពុជា ឆ្លើយតបនឹងការលើកឡើងថា កម្ពុជានឹងរងសម្ពាធពីអឺរ៉ុប ក្នុងកិច្ចប្រជុំអាស៊ី-អឺរ៉ុប។
អ្នកនាំពាក្យរដ្ឋាភិបាល បានបញ្ជាក់ថា សម្ដេច ហ៊ុន សែន ត្រៀមធ្វើបទអន្តរាមន៍ ដោយផ្ដោតលើប្រធានបទ ទាក់ទងនឹងរបៀបវារៈឆ្នាំ២០៣០ សម្រាប់ការអភិវឌ្ឍប្រកបដោយចីរភាព និងកំណើសេដ្ឋកិច្ចប្រកបដោយចីរភាព និងបរិយាប័ន្ន ដើម្បីចំអកមកលើអ្នករិះគន់សម្ដេចកន្លងមក។
សេចក្តីប្រកាសព័ត៌មានអ្នកនាំពាក្យរដ្ឋាភិបាល បានបញ្ជាក់ដូច្នេះថា៖«នេះជារបៀបវារៈផ្លូវការ ដែលជាសត្យានុម័ត ឆ្លើយតបទៅនឹងការធ្វើវិទ្ធង្សនាអកុសល របស់ក្រុមក្រៅច្បាប់ដែលធ្វើយុទ្ធនាការប្រឌិត និងបំភ្លៃការពិត ដែលលើកឡើងថា សម្ដេចនឹងទទួលសម្ពាធពីសហភាពអឹរ៉ុប ក្នុងពេលប្រជុំនេះ គឺជាការភូតភរពិតប្រាកដ និងមិនខ្មាសអៀន»។
អ្នកនាំពាក្យរដ្ឋាភិបាល បានបញ្ជាក់ថា កម្ពុជា និងសហភាពអឺរ៉ុប នៅតែបន្តដោះស្រាយរួមគ្នា និងសហការដោះស្រយបញ្ហាអនុគ្រោះពន្ធលើកម្ពុជា (Everything But Arms) ។
«អាស្រ័យដោយរាជរដ្ឋាភិបាលកម្ពុជា និងសហភាពអឺរ៉ុបទ្វេភាគី នៅតែរួមគ្នាបន្តក្នុងកិច្ចដោះស្រាយ និងសហការលើបញ្ហាខ្វែងគំនិតគ្នា ឬប្រឈម ទៅនឹងវិស័យកញ្ចប់ដទៃទៀត នៃកម្មវិធីអនុគ្រោះពន្ធសព្វសារពើលើកលែងតែអាវុធយុទ្ធភណ្ឌ (EBAs) នោះ។ ប៉ុន្តែកញ្ចប់នៃឧស្សាហកម្មវាយនភ័ណ្ឌ មិនមានផលប៉ះពាល់ធ្ងន់ធ្ងរនោះទេ ដោយសិទ្ធសេរីភាព និងជីវភាពកម្មករ ត្រូវបានសម្ដេច ហ៊ុន សែន បានលើកតម្កើងជាប្រចាំ ស្របគ្នាគោលដៅនិងផលប្រយោជន៍រួម ។ កម្ពុជា-សហភាពអឺរ៉ុប ដែលជាកម្លាំងបំពេញបន្ថែមដល់កម្ពុជា ក្នុងកិច្ចត្រៀមងើបឈានឡើង ទៅជាប្រទេសមានចំណូលមធ្យមកម្រិតខ្ពស់ នាពេលអនាគតដ៏ខ្លីខាងមុខនេះ»។ នេះបើតាមសេចក្តីប្រកាសព័ត៌មាន ។
កិច្ចប្រជុំកំពូលអាស៊ីអឺរ៉ុប (ASEM) លើកទី១២ នឹងប្រព្រឹត្តទៅក្រោមប្រធានបទ «អឺរ៉ុបនិងអាស៊ី៖ ដៃគូសម្រាប់បញ្ហាប្រឈមសាកល» មានគោលបំណងពង្រឹងកិច្ចសន្ទនា និងកិច្ចសហប្រតិបត្តិការ រវាងតំបន់អាស៊ី និងអឺរ៉ុប ខណៈដែលតំបន់ទាំងពីរ ជំរុញការកសាងកម្លាំងរួមគ្នា ដើម្បីដោះស្រាយបញ្ហាជាច្រើន ចាប់ពីការបង្កើនពាណិជ្ជកម្ម និងវិនិយោគ។ ការតភ្ជាប់ និងការអភិវឌ្ឍប្រកបដោយចីរភាព និងបម្រែបប្រួលអាកាសធាតុជាដើម៕
© រក្សាសិទ្ធិដោយ thmeythmey.com