ម៉ាឡេស៊ីដំឡើងថ្លៃបារី និងកំណត់អាយុអ្នកអាចទិញគ្រឿងស្រវឹងបានដល់ ២១ឆ្នាំ

អន្តរជាតិ

ម៉ាឡេស៊ីដំឡើងថ្លៃបារី និងកំណត់អាយុអ្នកអាចទិញគ្រឿងស្រវឹងបានដល់ ២១ឆ្នាំ

16, Oct 2018 , 5:49 pm

រូបភាព

រូបភាព៖ Malaymail

ដោយ: ថ្មីៗ

រដ្ឋាភិបាលម៉ាឡេស៊ីនឹងចាប់ផ្តើមដំឡើងថ្ងៃបារីនៅក្នុងប្រទេសចាប់ពីចុងខែនេះតទៅ។ រដ្ឋាភិបាលនេះក៏ចេញបទបញ្ញត្តិកំណត់អាយុអ្នកចង់ទិញគ្រឿងស្រវឹងអប្បបរមាពី ១៨ ដល់ ២១ឆ្នាំផងដែរ ហើយបទបញ្ជានេះចូលជាធរមានចាប់ពីសប្តាហ៍នេះ។

ចាប់ពីចុងខែតុលានេះតទៅ រាល់ផលិតផលបារីនឹងត្រូវដំឡើងថ្លៃនៅក្នុងប្រទេសម៉ាឡេស៊ី។ នេះជាការបញ្ជាក់របស់រដ្ឋមន្ត្រីសុខាភិបាលម៉ាឡេស៊ីលោក វេជ្ជបណ្ឌិត Dzulkefly Ahmad។

តាមការចុះផ្សាយរបស់ទីភ្នាក់ងារព័ត៌មានម៉ាឡេស៊ី Bernama រដ្ឋមន្ត្រីខាងលើបានពន្យល់ថា ការដំឡើងថ្លៃបារីនេះធ្វើឡើងដោយសារការដំឡើងពន្ធដែលស្ថិតក្រោមច្បាប់ស្តីពីការគ្រប់គ្រងចំណូលថ្នាំជក់ដែលបង្កើតឡើងកាលពីឆ្នាំ ២០០៤មកនោះ។

រដ្ឋមន្ត្រីរូបនេះបានបង្ហើបដែរថា កាលពីដើមសប្តាហ៍នេះដែរ អាគារសភាម៉ាឡេស៊ីទាំងមូលត្រូវគេកំណត់ជាកន្លែងគ្មានការជក់បារី ប៉ុន្តែអ្វីដែលគួរឲ្យកត់សម្គាល់នោះ គឺ សមាជិកសភាម្នាក់ស្ថិតក្នុងចំណោមមនុស្ស ៨នាក់ត្រូវបានគេផាកពិន័យដោយសារគេជក់បារីក្នុងតំបន់ហាមឃាត់។

ក្រៅពីការដំឡើងថ្លៃបារី រដ្ឋាភិបាលម៉ាឡេស៊ីក៏នឹងកំណត់អាយុអប្បបរមាសម្រាប់អ្នកចង់ទិញគ្រឿងស្រវឹងផងដែរ។ កន្លងមក នៅម៉ាឡេស៊ី អាយុ ១៨ឆ្នាំអាចទិញគ្រឿងស្រវឹងបាន ប៉ុន្តែចាប់ពីពេលនេះអ្នកចង់ទិញទាល់តែមានអាយុចាប់ពី ២១ ឆ្នាំឯណោះ។

តាមបទបញ្ជាថ្មី អ្នកលក់គ្រឿងស្រវឹងក៏ត្រូវដាក់ស្លាកសញ្ញាដែលក្រើនរម្លឹកអ្នកទិញថា វាប៉ះពាល់ដល់សុខភាព ហើយក៏ចាំបាច់ត្រូវដាក់តាំងផលិតផលគ្រឿងស្រវឹងដាច់ដោយឡែកពីផលិតផលចំណីអាហារ ឬម្ហូបអាហារដទៃទៀតដែរ។ បន្ថែមពីនេះ ច្បាប់នេះក៏ត្រូវដាក់ឲ្យអនុវត្តសម្រាប់អ្នករៀបចំពិធីស្រាបៀអាល្លឺម៉ង់ Oktoberfest ផងដែរ៕