ជាតិ
×![]()
ដោយ: ភួង វ៉ាន់ថា
ក្រសួងកសិកម្ម រុក្ខាប្រមាញ់ និងនេសាទកំពុងធ្វើសេក្ដីព្រាងប្រកាសដាក់តំបន់មួយចំនួន នៅតាមព្រែកស្រែអំបិលទៅជាតំបន់ការពារ និងអភិរក្សសម្រាប់សត្វអណ្តើកហ្លួង និងក្រពើត្រី។ ការធ្វើសេចក្ដីព្រាងច្បាប់នេះ ក្រោយក្រសួងកសិកម្ម និងអង្គការសមាគមអភិរក្សសត្វព្រៃ រកឃើញវត្តមានប្រភេទសត្វទាំងពីរនេះ កំពុងរស់នៅតាមប្រព័ន្ធព្រែកស្រែអំបិលក្នុងខេត្តកោះកុង។
លោក អ៊ុក វិបុល ប្រធាននាយកដ្ឋានអភិរក្សជលផលនៃរដ្ឋបាលជលផល បានបញ្ជាក់ថា ក្រុមការងារផ្នែកច្បាប់នៃរដ្ឋបាលជលផល កំពុងតាក់កែងច្បាប់ដែលមាន១០ប្រការ ដើម្បីធានាភាពគងវង្សនៃអណ្តើកហ្លួង និងការបែងចែកទីតាំងគ្រប់គ្រងតាមផ្នែក ដែលមានដូចជាកន្លែងអភិរក្ស និងកន្លែងការពារ។
លោក អ៊ុក វិបុល៖ «តំបន់អភិរក្សគឺសំដៅទៅលើទីតាំងដែលវាទំលាក់ពង ជាពិសេសវាលខ្សាច់ យើងមិនឲ្យមានសកម្មភាពផ្សេងៗដែលរំខានដល់វា សូម្បីតែការនេសាទជាលក្ខណៈគ្រួសារក៏អត់ឲ្យដែរ។ បន្ទាប់មកយើងកំណត់កន្លែងការពារច្រើនកន្លែង ដែលវាហែលទៅរកចំណី ។កន្លែងការពារយើងអនុញ្ញាតឲ្យប្រជាធ្វើការនេសាទជាលក្ខណៈគ្រួសារ ចាប់ត្រីតែមិនមែនចាប់អណ្ដើក ឬក្រពើត្រីទេ»។
បើតាមប្រធាននាយកដ្ឋានអភិរក្សជលផលនៃរដ្ឋបាលជលផល ក្រសួងនឹងដាក់ចេញសេចក្ដីប្រកាសជាធរមានក្នុងចុងឆ្នាំនេះ ដែលត្រូវការការគាំទ្រពីស្ថាប័នពាក់ព័ន្ធនានា ដើម្បីចូលរួមកាត់បន្ថយហានិភ័យដែលកើកមានឡើង នៅតាមប្រព័ន្ធព្រៃស្រែអំបិល។« សកម្មភាពបូមខ្សាច់ ការកាប់បំផ្លាញព្រៃលិចទឹកដែលជាទីជម្រក និងការនេសាទខុសច្បាប់បានបង្កការគំរាមកំហែងដល់ទីជម្រករបស់អណ្តើកហ្លួងជាពិសេសតំបន់ឆ្នេរខ្សាច់ដែលជាជម្រកពងកូន»។ នេះជាការបញ្ជាក់របស់លោក អ៊ុក វិបុល។
សេចក្តីប្រកាសព័ត៌មានអង្គការសមាគមអភិរក្សសត្វព្រៃ កាលពីពេលថ្មីៗរកឃើញថា អណ្ដើកហ្លួងមួយក្បាលបានផ្លាស់ទីទៅកាន់ព្រែកជីផាត់ ដែលមានចម្ងាយជិត១០០គីឡូម៉ែត្រពីទីតាំងលែង ហើយមួយក្បាលទៀតត្រូវបានជាប់មង តែត្រូវបានជួយសង្គ្រោះ។
លោក សោម ស៊ីថា ទីប្រឹក្សាបច្ចេកទេសគម្រោងអភិរក្សប្រចាំខេត្តកោះកុងនៃអង្គការ WCS បានលើកឡើងថា កម្មវិធីការពារសំបុកពងកូនដើរតួនាទីយ៉ាងសំខាន់ ក្នុងការការពារសត្វអណ្ដើកហ្លួងពីការផុតពូជ។
លោកលើកឡើងថា៖ « កម្មវិធីតាមដានក្រោយការព្រលែងបានបង្ហាញពីភាពជោគជ័យដោយរកឃើញអត្រារស់រានមានជីវិតរបស់អណ្ដើកហ្លួងដែលព្រលែង មានកម្រិតខ្ពស់លើកត្តាគំរាមកំហែងនានា។ យើងសង្ឃឹមថា អណ្ដើកហ្លួងដែលព្រលែងទាំងនោះ នឹងធ្វើការបន្តពូជនាពេលដ៏ខ្លីខាងមុខដែលជាក្ដីសង្ឃឹមក្នុងការស្តារឡើងវិញនូវប្រភេទសត្វដ៏កម្រនេះ»។
អណ្ដើកហ្លួងស្ថិតនៅក្នុងចំណោមអណ្ដើកទាំង២៥ប្រភេទ ដែលជិតផុតពូជក្នុងពិភពលោក នៃបញ្ជីក្រហមរបស់អង្គការសហភាពអន្តរជាតិ ដើម្បីការអភិរក្សធម្មជាតិ (IUCN)។ អណ្ដើកហ្លួងត្រូវបានដាក់បញ្ចូលជាប្រភេទសត្វល្មូនតំណាងឲ្យប្រទេសកម្ពុជា ក្នុងព្រះរាជក្រឹត្យ ចុះថ្ងៃទី២១ ខែមីនា ឆ្នាំ២០០៥។ នាពេលបច្ចុប្បន្ននេះអណ្ដើកហ្លួង មានតិចជាង៥០ក្បាល ក្នុងដែនជម្រកធម្មជាតិក្នុងប្រទេសកម្ពុជា។ចំពោះអណ្ដើកពូជផ្សេងមានចំនួនជាង២០០ ក្បាល ដែលកំពុងទទួលបានការថែរក្សានៅក្នុងមជ្ឈមណ្ឌលអភិរក្សសត្វល្មូនក្នុងខេត្តកោះកុង។ បើយោងតាមរបាយការណ៍អង្គការសមាគមអភិរក្សសត្វព្រៃកម្ពុជា៕
Tag:
អណ្តើកហ្លួង បរិស្ថាន
© រក្សាសិទ្ធិដោយ thmeythmey.com
