ក្រសួងសុខាភិបាល ហាមចរាចរកាហ្វេ Coffee Like ដែលបង្កគ្រោះថ្នាក់សុខភាព

ជាតិ

សុខភាព

សេដ្ឋកិច្ច

ក្រសួងសុខាភិបាល ហាមចរាចរកាហ្វេ Coffee Like ដែលបង្កគ្រោះថ្នាក់សុខភាព

17, Oct 2018 , 9:27 pm

រូបភាព

រូបពីហ្វេសប៊ុកក្រសួងសុខាភិបាល

ដោយ:

ភ្នំពេញ៖ ក្រសួងសុខាភិបាល បានហាមប្រើប្រាស់ ឬចរាចរកាហ្វេម៉ាក Coffee Like (កាហ្វេកំលាំងសេស) ព្រោះផលិតផលនេះមានផ្ទុកសារធាតុដែលបង្កគ្រោះថ្នាក់ដល់សុខភាព។ នេះបើតាមសេចក្ដីប្រកាសព័ត៌មានរបស់ក្រសួងសុខាភិបាល នៅថ្ងៃទី១៦តុលា។

កន្លងមក ផលិតផលកាហ្វេ Coffee Like (កាហ្វេកំលាំងសេស) ត្រូវបានផ្សព្វផ្សាយតាមវិទ្យុប្រជាជន FM 91.00 MH ជារៀងរាល់ថ្ងៃថាជាកាហ្វេកម្លាំងសេស ចំពោះអ្នកមានបញ្ហាលើសជាតិស្ករ ហើយអ្នកជំងឺទឹកនោមផ្អែមក៏អាចញាំបាន ដែលវាធ្វើឲ្យមានមេជីវិតបុរស ជួយដោះស្រាយបញ្ហាស្ទះចរន្តឈាម និងផ្លូវភេទបុរស ហើយមានលក់តែនៅវិទ្យុនេះប៉ុណ្ណោះ។

ក្រសួងសុខាភិបាល ចាត់ទុកការផ្សព្វផ្សាយនេះ ជាការបោកប្រាក់ ដោយគ្មានមូលដ្ឋានវិទ្យាសាស្ត្រត្រឹមត្រូវ និងគ្មានការអនុញ្ញាតពីក្រសួងឡើយ។ ក្រសួងសុខាភិបាល អះអាងថា កាហ្វេ Coffee Like (កាហ្វេកំលាំងសេស) មានផ្ទុកឱសថសម័យឈ្មោះ Sildenafil និង Tadalafil ដែលជាឱសថបង្កើនកម្លាំងផ្លូវភេទ។

ក្រសួងអំពាវនាវដល់សាធារណជនមិនឲ្យប្រើប្រាស់ផលិតផលនេះ ព្រោះកុំឲ្យប៉ះពាល់ដល់សុខភាព ដែលអាចឈានដល់បាត់បង់ជីវិត ដោយសារគាំងបេះដូង។

ចំណែកក្រុមហ៊ុនដែលនាំចូលផលិតផលកាហ្វេខាងលើនេះ ត្រូវបញ្ឈប់ការនាំចូល ឬចរាចរ និងផ្សព្វផ្សាយបន្តទៀត ពោលគឺត្រូវប្រមូលនូវកាហ្វេនេះមកកម្ទេចចោលជាបន្ទាន់។ នេះបើតាមក្រសួងសុខាភិបាល ដែលប្រកាសចាត់វិធានតាមផ្លូវច្បាប់ចំពោះក្រុមហ៊ុនណា ដែលពាក់ព័ន្ធការធ្វើអាជីវកម្មលើផលិតផលកាហ្វេ Coffee Like (កាហ្វេកំលាំងសេស)។

ចំពោះពលរដ្ឋដែលប្រទះឃើញ ឬលក់ផលិតផលនេះ សូមរាយការណ៍ទៅក្រសួងសុខាភិបាល តាមរយៈលេខទូរសព្ទ ០១១ ៥៧៤ ៧៨៧ ឬ ០៩៥ ៣៥៩ ៥៩៩ ៕