អន្តរជាតិ
ផ្ទះលោកស្រី ស៊ូជី ធ្លាប់រស់នៅក្រោមការឃុំឃាំងត្រូវបានគេស្នើដាក់លក់តម្លៃ៩០លានដុល្លារ រូបភាព៖ Asia Travel
× បងប្រុសបង្កើតរបស់មេដឹកនាំមីយ៉ាន់ម៉ាលោកស្រី អ៊ុងសាន ស៊ូជី នៅថ្ងៃទី១៨ ខែតុលាបាននិយាយថា លោកសម្រេចចិត្តដាក់លក់ផ្ទះក្បែរមាត់បឹង ដែលជាទីកន្លែងលោកស្រីស៊ូជី ធ្លាប់រស់នៅក្រោមការឃុំឃាំរបស់របបសឹកអស់ពេល ១៥ឆ្នាំ។
លោក អ៊ុងសាន អ៊ូ (Aung San Oo) ដែលសព្វថ្ងៃរស់នៅសហរដ្ឋអាមេរិក បានបញ្ជូនសំណើទៅកាន់តុលាការកំពូលកាលពីថ្ងៃទី១៧ ខែតុលាដើម្បីដាក់ដេញថ្លៃផ្ទះលក្ខណៈគ្រួសារពណ៌សមួយខ្នង ដែលនៅក្បែរបឹង Inya នៅទីក្រុង Yangon។ សម្រាប់ផ្ទះមួយខ្នងនេះ តាមរយៈមេធាវីរបស់ខ្លួន លោក អ៊ូ ចង់ដាក់លក់ក្នុងតម្លៃ ៩០លានដុល្លារ។
លោកស្រី ស៊ូជី និងបងប្រុសលោកស្រី បានដណ្តើមគ្នាកាន់កាប់ផ្ទះនេះចាប់តាំងពីឆ្នាំ២០០១មកម្ល៉េះ នៅពេលនោះលោក អ៊ូ ជាអ្នកចាប់ផ្តើមប្តឹងទាមទារចំណែកកម្មសិទ្ធិនៃផ្ទះមួយខ្នងនេះ។
យ៉ាងណាមិញ ក្នុងឆ្នាំ២០១៦ តុលាការក្រុង Yangon បានចេញសេចក្តីសម្រេចថា លោកស្រី ស៊ូជី ជាម្ចាស់កម្មសិទ្ធិអគារសំខាន់ ខណៈអគារផ្សេងៗទៀត និងដីមួយចំនួននៅជុំវិញនោះ ជាកម្មសិទ្ធិរបស់លោក អ៊ូ។
យោងតាមទីភ្នាក់ងារព័ត៌មាន Reuters លោក អ៊ុងសាន អ៊ូ បានលើកឡើងថា៖ «ការកាត់ក្តីរបស់តុលាការកន្លងមកគឺមានភាពលម្អៀង ដោយតុលាការបានផ្តល់ចំណែកឲ្យលោកស្រី អ៊ូជីច្រើនជាងពាក់កណ្តាល។ ដូច្នេះខ្ញុំមិនពេញចិត្តនោះឡើយ ហើយពេលនេះខ្ញុំកំពុងដាក់ស្នើលក់ផ្ទះនេះតែម្តង»។ លោកអ៊ូបានបញ្ជាក់ទៀតថា លោកបានអនុញ្ញាតឲ្យលោកស្រី ស៊ូជី រស់នៅទីនៅអស់រយៈពេលជាង១២ឆ្នាំមកហើយ។
«វាមិនងាយស្រួលនោះទេ សម្រាប់ការចរចាបែងចែកចំណែកទ្រព្យសម្បត្តិនេះ។ ខ្ញុំចង់ឲ្យមានការដាក់លក់ដេញថ្លៃ ហើយខ្ញុំចង់បានលុយពាក់កណ្តាលដែលបានពីការដាក់លក់នេះ។ នេះជាវិធីងាយស្រួលបំផុត»។ នេះជាការអះអាងរបស់លោកអ៊ូសាន អ៊ូ។
គួររម្លឹកផងដែរថា លោកស្រី ស៊ូជី ត្រូវបានរបបសឹកមីយ៉ាន់ម៉ាចាប់ឃុំខ្លួនក្នុងផ្ទះលើកដំបូងក្នុងឆ្នាំ១៩៨៩ ហើយមេដឹកនាំតស៊ូដើម្បីប្រជាធិបតេយ្យរូបនេះត្រូវបានក្រុមយោធាដោះលែងនិងចាប់ឃុំជាបន្តបន្ទាប់ មុននឹងមានការដោះលែងចុងក្រោយនៅខែវិច្ឆិកាឆ្នាំ២០១០។ ក្រោយមកគណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រីបានឈ្នះការបោះឆ្នោតថ្នាក់ជាតិកាលពីឆ្នាំ២០១៥។ ដោយសារមិនអាចក្លាយជាប្រធានាធិបតីដោយសាររដ្ឋធម្មនុញ្ញហាមឃាត់ លោកស្រីបានដើរតួនាទីជាមេដឹកនាំកំពូលដោយមានតួនាទីជាទីប្រឹក្សារដ្ឋមីយ៉ាន់ម៉ា៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com