ជាតិ
អាជ្ញាធរកំពុងសង់ស្ពានឈើថ្មីដើម្បីសម្រួលការទស្សនាប្រាសាទបេងមាលា
× សៀមរាប៖ ប្រាសាទបេងមាលា ជាប្រាសាទមួយដ៏ទាក់ទាញ និងមានរចនាបថដូចទៅនឹងប្រាសាទអង្គរវត្តដូច្នោះដែរ។ ដោយសារអាយុកាល បានធ្វើឱ្យប្រាសាទនេះមានភាពបាក់បែកច្រើន តែសម្រាប់អ្នកស្រាវជ្រាវ គំនរថ្មដែលនៅជុំវិញប្រាសាទនេះ ព្រោះថាការសាងសង់នៅសម័យនោះមិនទាន់រួចរាល់។ ដ្បិតនៅឆ្ងាយពីខេត្តសៀមរាបប្រមាណ ៨០គីឡូម៉ែត្រយ៉ាងណាក្ដី ក៏ភ្ញៀវទេសចរជាតិ និងអន្ដរជាតិមួយចំនួន ជាប់ចិត្តនឹងប្រាសាទនេះ ពិសេសនៅរដូវវស្សា ដែលមានទេសភាពស្រស់បំព្រង។ ដើម្បីសម្រួលដល់ការទស្សនារបស់ភ្ញៀវទេសចរ អាជ្ញាធរបានរៀបចំសាងសង់ស្ពានឈើឡើងវិញនៅជុំវិញប្រាសាទនេះ ដោយហេតុថាស្ពានចាស់មានសភាពទ្រុឌទ្រោមខ្លាំងមិនអាចដើរតទៅទៀត។
អាជ្ញាធរជាតិអប្សរា សហការជាមួយក្រុមហ៊ុនលក់សំបុត្រ ខាំ សាមេត បាននិងកំពុងសាងសង់ស្ពានឈើនៅក្នុងវង់ទស្សនាប្រាសាទបេងមាលាសាជាថ្មី។ តាមមន្ត្រីជំនាញ គម្រោងនេះគឺដើម្បីសម្រួលដល់ការទស្សនារបស់ភ្ញៀវទេសចរដែលមានការកើនឡើងជាបន្តបន្ទាប់។ ស្ពាននេះ សង់ជំនួសស្ពានចាស់ ដែលសង់តាំងពីឆ្នាំ ២០០២ មក។
លោក ឈាន រដ្ឋា ប្រធានស្ដីទីនាយកដ្ឋានអភិរក្សប្រាសាទក្រៅឧទ្យានអង្គរនៃអាជ្ញាធរជាតិអប្សរា បានឱ្យដឹងថា ស្ពានឈើដែលផ្តើមសាងសង់ចាប់ពីខែ កញ្ញាមក មានប្រវែង ១៨៣ម៉ែត្រ ទទឹងមួយម៉ែត្រកន្លះ ក្នុងប្រវែងស្ពានសរុបក្នុងប្រាសាទ ២៦៣ម៉ែត្រ។ តាមគម្រោង ការដ្ឋានសាងសង់នេះ នឹងបញ្ចប់នៅចុងខែ វិច្ឆិកា ឆ្នាំ២០១៨។ ឈើដែលយកមកប្រើមានឈើ ផ្ចឹក គគីរ និងរាំង ដែលធន់នឹងអាកាសធាតុ។
តាមការបញ្ជាក់របស់លោក ឈាន រដ្ឋា ការដ្ឋាននេះមានការសិក្សាច្បាស់លាស់ពីអ្នកជំនាញ ដោយធានាយ៉ាងណាមិនឱ្យប៉ះពាល់ថ្មប្រាសាទ។ គោលបំណងមួយទៀតសម្រាប់ការដ្ឋាននេះ គឺការពារកុំឱ្យទេសចរដើរជាន់ថ្ម ការពារគ្រោះថ្នាក់ជាយថាហេតុដែលបណ្ដាលមកពីការរអិលថ្ម និងសម្រួលដល់ការទស្សនា ព្រោះថាស្ពានថ្មីនេះមានទំហំធំជាមុន៕
© រក្សាសិទ្ធិដោយ thmeythmey.com