ភ្នំពេញ៖ រាជធានីភ្នំពេញនឹងធ្វើជាម្ចាស់ផ្ទះ នៃកិច្ចប្រជុំអាស៊ី-អឺរ៉ុប លើកទី១៣ (ASEM13) នៅឆ្នាំ២០២០ខាងមុខ។ សម្តេច ហ៊ុន សែន បានគូសបញ្ជាក់ថា កម្ពុជាពិតជាមានកិត្តិយសក្រៃលែង ដែលនេះជាការរៀបចំកិច្ចប្រជុំកំពូលទ្រង់ទ្រាយធំលើកទី១ និងប្រកបសារសំខាន់បំផុត។
«កម្ពុជានឹងខិតខំធ្វើកិច្ចការចាំបាច់គ្រប់យ៉ាង ដើម្បីធានាឲ្យកិច្ចប្រជុំកំពូលអាស៊ីអឺរ៉ុបលើកទី១៣ ប្រព្រឹត្តទៅដោយរលូន និងទទួលបានជោគជ័យ ដូចកិច្ចប្រជុំកំពូលអាស៊ីអឺរ៉ុបកន្លងមក ពិសេសក្នុងឋានៈជាប្រធានកិច្ចប្រជុំកំពូលអាស៊ី អឺរ៉ុប»។ នេះជាការអះអាងរបស់សម្តេចនាយករដ្ឋមន្ត្រី ហ៊ុន សែន ក្នុងសុន្ទរកថា នាពេលបិទបញ្ចប់កិច្ចប្រជុំអាស៊ី-អឺរ៉ុប លើកទី១២ នៅក្រុងព្រុចសែល ប្រទេសបែលហ្ស៊ិក កាលពីថ្ងៃទី១៩ ខែតុលា។
ប្រមុខរដ្ឋាភិបាលកម្ពុជា បានបន្ថែមថា កម្ពុជាប្តេជ្ញាពង្រឹងចំណងមិត្តភាព និងភាពជាដៃគូយ៉ាងជិតស្និទ្ធ ដែលផ្តល់ផលប្រយោជន៍ឲ្យគ្នាទៅវិញទៅមក រវាងប្រទេសជាសមាជិកទាំងអស់ ដើម្បីរួមចំណែកលើកកម្ពស់សន្តិភាព និងសន្តិសុខពិភពលោក ក៏ដូចជាសម្រេចគោលដៅអភិវឌ្ឍន៍ប្រកបដោយចីរភាព នៃរបៀបវារៈឆ្នាំ២០៣០ របស់អង្គការសហប្រជាជាតិ។
កម្ពុជា គឺជាប្រទេសទី៤ ក្នុងចំណោមប្រទេសតំបន់អាស៊ាន បន្ទាប់ពីប្រទេសថៃ (១៩៩៦) វៀតណាម (២០០៤) និងឡាវ (២០១២) ដែលក្លាយជាម្ចាស់ផ្ទះនៃកិច្ចប្រជុំទ្វីបទាំងពីរ អាស៊ី អឺរ៉ុប គណៈកម្មាធិការអឺរ៉ុប និងសមាគមន៍អាស៊ាន។
បើគិតចាប់តាំងពីឆ្នាំ១៩៩៦មក កិច្ចប្រជុំអាស៊ី-អឺរ៉ុប (ASEM) បានរៀបចំចំនួន១២លើកហើយ ដោយក្នុងនោះធ្វើឡើងនៅប្រទេសថៃ (១៩៩៦) អង់គ្លេស (១៩៩៨) កូរ៉េខាងត្បូង (២០០០) ដាណាម៉ាក (២០០២) វៀតណាម (២០០៤) ហ្វាំងឡង់ (២០០៦) ចិន (២០០៨) បែលហ្ស៊ិក (២០១០) ឡាវ (២០១២) អ៊ីតាលី (២០១៤) ម៉ុងហ្គោលី (២០១៦) និងបែលហ្ស៊ិកម្តងទៀត នាឆ្នាំ២០១៨នេះ។
បច្ចុប្បន្នប្រទេសដែលជាសមាជិក ASEM មាន៥១ប្រទេស ក្នុងនោះមាន អូស្ត្រាលី, អូទ្រីស, បង់ក្លាដែស, បែលហ្ស៊ិក, ប្រ៊ុយណេ, ប៊ុលហ្គារី, កម្ពុជា, ចិន, ក្រូអាត, សាធារណរដ្ឋឆែក, ដាណឺម៉ាក, អេស្តូនី, ហ្វាំងឡង់, បារាំង, អាល្លឺម៉ង់, ក្រិក, ហុងគ្រី, ឥណ្ឌា, ឥណ្ឌូណេស៊ី, អៀរឡង់, អ៊ីតាលី, ជប៉ុន, កាហ្សាក់ស្ថាន, កូរ៉េខាងត្បូង, ឡាវ, ឡេតូនី, លីទុយអានី, លុចសំបួ, ម៉ាឡេស៊ី, ម៉ាល់ត៍, ម៉ុងហ្គោលី, មីយ៉ាន់ម៉ា, ហូឡង់, នូវែលសេឡង់, ន័រវេស, ប៉ាគីស្ថាន, ហ្វីលីពីន, ប៉ូឡូញ, ព័រទុយហ្គាល់, រុស្ស៊ី, សិង្ហបុរី, ស្លូវ៉ាគី, ស្លូវេនី, អេស្ប៉ាញ, ស៊ុយអែត, ស្វ៊ីស, ថៃ, ចក្រភពអង់គ្លេស និងវៀតណាម។ សហភាពអឺរ៉ុប និងអាស៊ាន ជាអង្គការប្រចាំតំបន់ដែលចូលរួមក្នុងកិច្ចប្រជុំនេះផងដែរ៕