ក្រុមបាល់ទាត់អាណាចក្របៃតងលើកពានសម្តេច ហេង សំរិន ជាលើកទី២

កីឡាជាតិ

ជាតិ

ក្រុមបាល់ទាត់អាណាចក្របៃតងលើកពានសម្តេច ហេង សំរិន ជាលើកទី២

21, Oct 2018 , 1:59 pm

រូបភាព

ដោយ:

ក្រុមបាល់ទាត់អាណាចក្របៃតងបន្តគ្រងជើងឯកពានរង្វាន់សម្តេច ហេង សំរិន ប្រចាំឆ្នាំ២០១៨ ក្រោយយកឈ្នះក្រុម ធីអិនកណ្តាល ១-០ នៅវគ្គផ្តាច់ព្រ័ត្រកាលពីល្ងាចថ្ងៃទី២០ ខែតុលា នាពហុកីឡដ្ឋានជាតិ។ ចំណែកក្រុមពិស្ណុការ បានយកឈ្នះយុវជនបៃតងក្នុងលទ្ធផល ៤-២ ដើម្បីទទួលបានចំណាត់ថ្នាក់លេខ៣។

ក្រោយយកឈ្នះក្រុមធីអិនកណ្តាល យ៉ាងប្រផិតប្រផើយ ១-០ នៅវគ្គផ្តាច់ព្រ័ត្រ ជួយឲ្យក្រុមការពារតំណែងជើងឯកអាណាចក្របៃតង បន្តគ្រងជើងឯកពានរង្វាន់សម្តេច ហេង សំរិន ជាលើកទី២។ ខណៈកាលលើកទី១ ក្រុមដឹកនាំដោយលោក ហៅ សុជាតិ មួយនេះ បានយកឈ្នះយុវជនមុស្លីមក្នុងលទ្ធផលប្រផិតប្រផើយ ២-១ ដូចគ្នានៅវគ្គផ្តាច់ព្រ័ត្រ។

ក្រុមជើងឯកអាណាចក្របៃតងទទួលបានថវិកាលើកទឹកចិត្តចំនួន៣២លានរៀល និងថវិកាសម្តេច ហេង សំរិន ដែលនាំយកមកតាមរយៈលោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទាចំនួន២ពាន់ដុល្លារ។ ចំណែកក្រុមលេខ២ធីអិនកណ្តាលទទួលបាន២០លានរៀល និងថវិកាសម្តេច ហេង សំរិន ចំនួន១ពាន់ដុល្លារ។

ក្រុមលេខ៣ពិស្ណុការ ដែលយកឈ្នះយុវជនបៃតង ៤-២ ទទួលបានថវិកាលើកទឺកចិត្តចំនួន១៤លានរៀលនិងថវិកា១ពាន់ដុល្លារពីសម្តេច ហេង សំរិន។ ក្រុមនេះក៏ទទួលបានថវិកាលើកទឹកចិត្តបន្ថែម៦លានរៀលផងដែរ ក្រោយពួកគេជាប់ជាក្រុម Fair Play។

កីឡាករជើងចាស់ នុត ស៊ីនួន របស់ក្រុមធីអិនកណ្ដាលទទួលបានពានស្បែកជើងមាស ក្រោយរកគ្រាប់បាល់បានច្រើនជាងគេ ខណៈកីឡាករ ហាន់ មាន របស់អាណាចក្របៃតងទទួលពានស្រោមដៃមាសក្នុងនាមជាអ្នកចាំទីល្អ។ ពានលក្ខណៈឯកជនរបស់កីឡាករទាំងពីរគ្មានថវិកាលើកទឹកចិត្តនោះទេ។ ក្រៅពីនេះ គណៈកម្មការរៀបចំការប្រកួតពានរង្វាន់សម្តេច ហេង សំរិន បានឧបត្ថម្ភថវិកាចំនួន១,៦០០,០០០រៀល ដល់ក្រុមអាជ្ញាកណ្តាលល្អ។

នាពិធីបិទការប្រកួតកាលពីថ្ងៃទី២០ ខែតុលា ឆ្នាំ២០១៨ លោក វង សូត មានប្រសាសន៍ថា៖«ការប្រកួតតែងតែមានឈ្នះនិងចាញ់ ទោះជាយ៉ាងណាក្រុមទាំង២១បានប្រកួតក្នុងស្មារតីសាមគ្គីភាព មិត្តភាព ភាតរភាព និងការទទួលខុសត្រូវជាអតិបរមាគួរឲ្យកោតសរសើរ»។

ជាមួយគ្នានេះ លោករដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ជំរុញឲ្យក្រុម ដែលទទួលបានជ័យជម្នះត្រូវបង្កើនការយកចិត្តទុកដាក់ និងហ្វឹកហាត់ពង្រឹងសមត្ថភាពឲ្យកាន់តែខ្លាំងថែមទៀត ដើម្បីត្រៀមប្រជែងដណ្តើមជើងឯក និងការពារតំណែងជើងឯកនៅឆ្នាំក្រោយៗទៀត។ ចំណែកក្រុមដែលមិនទទួលបានជ័យជម្នះ លោក ជំរុញកុំឲ្យបាក់ទឹកចិត្ត និងបន្តការខិតខំហ្វឹកហាត់អភិវឌ្ឍន៍សមត្ថភាព ដើម្បីប្រជែងដណ្តើមជើងឯកនៅលើកក្រោយ។

សម្រាប់លោក វង សូត ពានរង្វាន់ពាក់កណ្តាលអាជីពមួយនេះ មិនត្រឹមតែចូលរួមចំណែកអភិវឌ្ឍន៍វិស័យកីឡាបាល់ទាត់កម្ពុជាប៉ុណ្ណោះទេ ថែមទាំងបានផ្តល់ឱកាសឲ្យយុវជនបានបង្ហាញសមត្ថភាព និងផ្តល់ឲ្យកីឡាករជើងចាស់បានចែករំលែកបទពិសោធដល់យុវជនជំនាន់ក្រោយថែមទៀតផង។ លើសពីនេះ វាបានចូលរួមចំណែកក្នុងសកម្មភាពជួយសង្គម តាមរយៈការជួយឲ្យយុវជនងាកមកលេងកីឡា ហើយបោះបង់អំពើអបាយមុខផ្សេងៗ៕