សម្តេច ហ៊ុន សែន និង លោក សម រង្ស៊ី ប្រកាសជំហររៀងខ្លួន ថាឈប់ចរចាជាមួយគ្នា

ជាតិ

នយោបាយជាតិ

សម្តេច ហ៊ុន សែន និង លោក សម រង្ស៊ី ប្រកាសជំហររៀងខ្លួន ថាឈប់ចរចាជាមួយគ្នា

22, Oct 2018 , 11:59 am

រូបភាព

ដោយ: ថ្មីៗ

មកដល់ពេលនេះ វប្បធម៌សន្ទនា កាន់តែឃ្លាតឆ្លាយពីអ្នកនយោបាយខ្មែរ។ ព្រោះតែចង់ឈ្នះគ្នាជាលក្ខណបុគ្គល ពួកគេ បានបង្ហាញឥរិយាបថរឹងត្អឹងដាក់គ្នា រហូតដល់ថ្នាក់ប្រកាន់ជំហររៀងៗខ្លួនថា នឹងមិនចរចាជាមួយគ្នាឡើយ។

ស្របពេលសម្តេចនាយករដ្ឋមន្ត្រី ហ៊ុន សែន និងគណៈប្រតិកម្ពុជា ទៅចូលរួមប្រជុំនៅបែលហ្ស៊ិក និងនៅតួកគួ ហើយត្រៀមបន្តហោះទៅប្រជុំនៅស្វីស លោក សម រង្ស៊ី អតីតប្រធានគណបក្សសង្គ្រោះជាតិ ដែលកំពុងមានវត្តមាននៅទីនោះស្រាប់ ក៏ប្រមូលកម្លាំងអ្នកគាំទ្រ ឲ្យទៅធ្វើបាតុកម្ម។ លើសពីនេះ អតីតប្រធានគណបក្សប្រឆាំង ថែមទាំងប្រើពាក្យសម្តីវាយប្រហារលើមេដឹកនាំកម្ពុជាសព្វបែបយ៉ាងផងដែរ។

ក្រៅពីវាយប្រហារតាមពាក្យសម្តី លោក សម រង្ស៊ី ឆ្លៀតប្រកាសទុកជាមុនថា លោក ក៏ដូចជាគណបក្សប្រឆាំង លែងចរចាជាមួយសម្តេច ហ៊ុន សែន ទៀតហើយ។ លោក សម រង្ស៊ី និយាយនៅក្រៅប្រទេសថា សម្តេច ហ៊ុន សែន ជាមនុស្ស ដែលនិយាយលែងយល់គ្នាហើយ ដូច្នេះទុកឲ្យប្រធានគណបក្សកាន់អំណាចរូបនេះ ទៅចរចានិងដោះស្រាយជាមួយសហគមន៍អន្តរជាតិវិញ។

ប្រធានគណបក្សកាន់អំណាច ហួសចិត្តមិនស្ទើរទេ នៅពេលដែលឮអតីតប្រធានគណបក្សប្រឆាំង ប្រកាសថាមិនចរចាជាមួយខ្លួន ទាំងដែលខ្លួន មិនដែលនឹងបង្ហាញបំណងចរចាសូម្បីតែបន្តិច។ ជាឆ្លើយតប មេដឹកនាំកម្ពុជា មិនត្រឹមតែមិនចង់ចរចានោះទេ តែថែមទាំងផ្តាំទៅលោក សម រង្ស៊ី វិញថា កុំឲ្យផ្ញើសារសុំចរចាឲ្យសោះ។

«ខ្ញុំសូមឲ្យអ្នកឯង កត់ត្រាឲ្យច្បាស់ថា អ្នកឯងកុំមកសូមខ្ញុំចរចា។ បើអ្នកឯងសុំខ្ញុំចរចា សូមឲ្យរន្ទះបាញ់»។ នេះជាសម្តីរបស់នាយករដ្ឋមន្ត្រី ដែលផ្តាំទៅលោក សម រង្ស៊ី ក្នុងពិធីជួបសំណេះសំណាលជាមួយប្រជាពលរដ្ឋកម្ពុជា ដែលកំពុងរស់នៅក្នុងប្រទេសតួកគី។

ទោះជាប្រកាសមិនចរចាក្តី តែលោក សម រង្ស៊ី នៅតែទាមទារឲ្យមេដឹកនាំកម្ពុជា បន្ទន់ឥរិយាបថ ដោយបញ្ឈប់ការកៀបសង្កត់លើគណបក្សប្រឆាំង ហើយងាកមកគោរពសិទ្ធិមនុស្ស។ លោក លើកឡើងថា បើមិនប្រញាប់សម្រួលស្ថានការណ៍ឲ្យល្អប្រសើរនោះទេ កម្ពុជា នឹងរងទណ្ឌកម្មពីសហគមន៍អន្តជាតិ ជាពិសេស ការព្រមានរបស់សហភាពអឺរ៉ុប ក្នុងការដកប្រព័ន្ធអនុគ្រោះពន្ធ EBA។

យ៉ាងណាក៏ដោយ មេដឹកនាំកម្ពុជា នៅតែបង្ហាញភាពរឹងមាំរបស់ខ្លួន ដោយមិនព្រួយបារម្ភនឹងការដាក់ទណ្ឌកម្មរបស់សហគមន៍អន្តរជាតិឡើយ រួមទាំងការដកប្រព័ន្ធអនុគ្រោះពន្ធ EBA ផងដែរ៕