អន្តរជាតិ
កូរ៉េខាងត្បូងបន្តគម្រោងអភិវឌ្ឍយន្តហោះចម្បាំងរួមគ្នា ទោះឥណ្ឌូណេស៊ីមានបញ្ហាលុយកាក់
យន្តហោះចម្បាំង KF-X (រូបភាព Indodefense.wordpress.com)
×![]()
ដោយ: តន ចាន់រិទ្ធារ៉ា
កូរ៉េខាងត្បូង នៅថ្ងៃទី២២ ខែតុលា និយាយថា គម្រោងអភិវឌ្ឍយន្តហោះចម្បាំងរួមគ្នាជាមួយឥណ្ឌូណេស៊ី នឹងនៅបន្តដដែល។ ការប្រកាសនេះធ្វើឡើង បន្ទាប់ពីក្រុងហ្សាការតាបង្ហាញជំហរចង់ចរចាដើម្បីកាត់បន្ថយវិភាគទានរបស់ខ្លួន ព្រោះកំពុងជួបបញ្ហាហិរញ្ញវត្ថុក្នុងស្រុក។ ជុំវិញបញ្ហានេះ កូរ៉េខាងត្បូងនឹងស្វែងរកច្រកចេញមួយដើម្បីឲ្យឥណ្ឌូណេស៊ីបង់ថ្លៃចំណាយរបស់ខ្លួនដែលមានចំនួនជាង២០០លានដុល្លារទៅហើយ។
គម្រោងផលិតយន្តហោះចម្បាំងរួមគ្នារវាងកូរ៉េខាងត្បូង និងឥណ្ឌូណេស៊ី បានជួបបញ្ហារអាក់រអួលខ្លះផ្នែកហិរញ្ញវត្ថុ ប៉ុន្តែកូរ៉េខាងត្បូងអះអាងថា គម្រោងនេះស្ថិតលើផ្លូវទៅមុខដដែល។ កាលពីចុងសប្ដាហ៍មុន មន្ត្រីជាន់ខ្ពស់រដ្ឋាភិបាលឥណ្ឌូណេស៊ីនិយាយថា ក្រុងហ្សាការតាកំពុងស្វែងរកលក្ខខណ្ឌហិរញ្ញវត្ថុស្រាលជាងមុនក្នុងការចរចាជាមួយកូរ៉េខាងត្បូងលើគម្រោងអភិវឌ្ឍយន្តហោះរួមគ្នាដ៏ធំមួយនេះ។
បើតាមទីភ្នាក់ងារព័ត៌មាន Reuters បច្ចុប្បន្ននេះ ឥណ្ឌូណេស៊ីកំពុងជួបបញ្ហាធ្លាក់ចុះលុយជាតិ Rupiah ដូចនេះហើយបានជារដ្ឋាភិបាលចាត់វិធានការជាច្រើនដើម្បីស្រោចស្រង់តម្លៃលុយជាតិរាប់ទាំងការកាត់បន្ថយចំណាយផង។ រដ្ឋមន្ត្រីសន្តិសុខឥណ្ឌូណេស៊ី Wiranto បានលើកឡើងថា ការចរចាជាមួយកូរ៉េខាងត្បូងនឹងផ្ដោតលើបញ្ហាដូចជាវិភាគទានរបស់ឥណ្ឌូណេស៊ីក្នុងគម្រោង ការចំណាយក្នុងការផលិត ការផ្ទេរបច្ចេកវិទ្យា កម្មសិទ្ធិបញ្ញា និងទីផ្សារជាដើម។
បន្ទាប់ពីការបង្ហាញបំណងកាត់បន្ថយការចូលវិភាគពីសំណាក់ឥណ្ឌូណេស៊ី កូរ៉េខាងត្បូងឯណោះហាក់ព្រួយបារម្ភពីបរាជ័យនៃគម្រោងឡើយ។ ទីភ្នាក់ងារលទ្ធកម្មអាវុធរបស់កូរ៉េខាងត្បូង (DAPA) បានបញ្ជាក់នៅថ្ងៃទី២២ ខែតុលា ថា ក្នុងជំនួបកំពូលមេដឹកនាំក្នុងខែកញ្ញា ភាគីទាំងពីរបានឯកភាពគ្នាបន្តគម្រោងអភិវឌ្ឍយន្តហោះ FK-X បន្តទៀត ចំណែកឯវិភាគទានវិញ ប្រទេសទាំងពីរក៏នឹងបន្តការចរចាថែមទៀត។
កូរ៉េខាងត្បូង និងឥណ្ឌូណេស៊ី បានឯកភាពក្នុងឆ្នាំ២០១៤ ក្នុងការអភិវឌ្ឍយន្តហោះចម្បាំង KF-X ក្នុងគម្រោងដែលមានទំហំទឹកប្រាក់វិនិយោគចំនួនជិត៨ពាន់លានដុល្លារ ហើយឥណ្ឌូណេស៊ីនឹងចេញចំនួន២០ភាគរយនៃគម្រោងអភិវឌ្ឍនេះ។ អ្នកនាំពាក្យរបស់ DAPA បញ្ជាក់ដែរថា ការវិភាគទានរបស់ឥណ្ឌូណេស៊ដែលមិនបានបង់មានចំនួនប្រហែល២០៣លានដុល្លារចន្លោះពាក់កណ្ដាលឆមាសទីពីរឆ្នាំ២០១៧ និងដើមឆមាសទីមួយឆ្នាំ២០១៨ ។
ការជំពាក់របស់ឥណ្ឌូណេស៊ី កើតឡើងព្រោះតែវិបត្តហិរញ្ញក្នុងស្រុក ដែលបង្ខំឲ្យប្រធានាធិបតី ចូកូ វីដូដូ ត្រូវចរចាលើថ្លៃចំណាយឡើងវិញ ខណៈដែលការដោះដូររូបិយវត្ថុបានធ្លាក់ចុះដល់កម្រិតទាបក្នុងរយៈពេល២០មកនេះ។ យ៉ាងណាក្ដី ប្រធានគណៈកម្មាធិការសម្របសម្រួលវិនិយោគរបស់ឥណ្ឌូណេស៊ី Thomas Lembong និយាយថា រដ្ឋាភិបាលនឹងបង្កើតក្រុមការងារចរចា ហើយស្របគ្នានេះនឹងរក្សាការទុកចិត្តរបស់វិនិយោគកូរ៉េខាងត្បូងក្នុងការរកស៊ីនៅឥណ្ឌូណេស៊ី៕
Tag:
កូរ៉េខាងត្បូង
ឥណ្ឌូណេស៊ី
© រក្សាសិទ្ធិដោយ thmeythmey.com
