ក្រៅពីកិច្ចប្រជុំខាងលើនេះ សម្ដេច ហ៊ុន សែន ក៏នឹងជួបប្រជាពលរដ្ឋខ្មែរ ដែលរស់នៅប្រទេសស៊្វីសនេះផងដែរ។ ដំណើរបន្តទៅប្រទេសស៊្វីសនេះ ធ្វើឡើងបន្ទាប់ពីសម្ដេច ហ៊ុន សែន បានទស្សនកិច្ចនៅប្រទេសតួកគី ពីថ្ងៃទី២០ដល់២២ តុលា។ កាលពីពេលថ្មីៗនេះ សម្ដេច ហ៊ុន សែន ទើបតែបញ្ចប់ការចូលរួមកិច្ចប្រជុំអាស៊ី-អឺរ៉ុប នៅទីក្រុងព្រុចសែល ប្រទេសបែលហ្ស៊ិក នៅថ្ងៃទី១៧ តុលា។

 

រយៈពេលជិតពីខែនេះ សម្ដេច ហ៊ុន សែន ហាក់មមាញឹកខ្លាំង ក្នុងចូលរួមកិច្ចប្រជុំវេទិកាសំខាន់ៗ រួមទាំងដំណើរទស្សនកិច្ចជិត១០ប្រទេសហើយ។ ដោយរាប់ចាប់ពីដំណើរចាកចេញពីកម្ពុជា ក្រោយរៀបចំរដ្ឋាភិបាលអាណត្តិទី៦នោះ សម្ដេច ហ៊ុន សែន បានចូលរួមតាំងពីព័រណ៌ចិន-អាស៊ាន លើកទី១៥ នៅប្រទេសចិន កាលពីថ្ងៃទី១០ដល់១២ កញ្ញា។ ក្រោយបញ្ចប់បេសកម្មនៅចិន សម្ដេច ហ៊ុន សែន បានបន្តចូលរួមវេទិកាសេដ្ឋកិច្ចពិភពលោកស្តីពីអាស៊ានលើកទី២៧ នៅទីក្រុងហាណូយ ប្រទេសវៀតណាម កាលពីថ្ងៃទី១៣ កញ្ញា។

 

សម្ដេចនាយករដ្ឋមន្ត្រី បានទៅអាមេរិក ដើម្បីចូលរួមកិច្ចប្រជុំលើកទី៧៣ នៅអង្គការសហប្រជាជាតិ កាលពីថ្ងៃទី២៧តុលា ។ ប្រមុខរដ្ឋាភិបាល ក៏បានចូលរួមវេទិកាមេគង្គ-ជប៉ុន នៅជប៉ុនផងដែរ មុននឹងសម្ដេចចូលរួមកិច្ចប្រជុំមេដឹកនាំអាស៊ាន ជាមួយអង្គការរូបិយវត្ថុអន្តរជាតិ (IMF)ដែលត្រូវរៀបចំឡើងពីថ្ងៃ ៨ ដល់ថ្ងៃ ១៤ ខែតុលា នៅទីក្រុងបាលី ប្រទេសឥណ្ឌូណេស៊ី ៕