ពិព័រណ៌យានយន្តពិភពលោកក្រុងប៉ារីស (Mondial de L’Auto Paris) បានឈានដល់ខួបទី១២០ឆ្នាំរបស់ខ្លួន ដោយព្រឹត្តិការណ៍ដែលរៀបចំនៅ Porte de Versailles កាលពីថ្ងៃទី៤ ដល់ថ្ងៃទី១៤ ខែតុលា កន្លងមកនេះ ទាក់ទាញអ្នកទស្សនាជាង១លាននាក់។ ការលក់ចេញក៏មានកំណើនខ្ពស់ផងដែរ បើប្រៀបធៀបទាំងនឹងឆ្នាំ២០១៦ និងឆ្នាំ២០១៧ ។
មនុស្ស១,០៦៨លាននាក់ បានទស្សនាព្រឹត្តិការណ៍តាំងរថយន្ត Mondial de L’Auto Paris 2018 (Mondial Paris Motor Show 2018) នាអំឡុងពេល១០ថ្ងៃពេញ។ ថ្វីត្បិតតែចំនួននេះ តិចជាងព្រឹត្តិការណ៍កាលពីឆ្នាំ២០១៦ (១,០៧៣លាននាក់) ក៏ដោយ ប៉ុន្តែរយៈពេលនៃការតាំងបង្ហាញក៏តិចជាងរហូតដល់ទៅ៥ថ្ងៃផងដែរ។
លោក Jean-Claude Girot អ្នករៀបចំព្រឹត្តិការណ៍ នេះ បានអះអាងថា អ្នកចូលរួមជាច្រើនរីករាយក្នុងការស្វែងយល់ និងសាកល្បងម៉ូដែលរថយន្តថ្មីៗប្រចាំឆ្នាំ។ ទោះបីជាព្រឹត្តិការណ៍ខួប១២០ឆ្នាំ មានរយៈពេលតិចជាងមុន៥ថ្ងៃក៏ដោយ ប៉ុន្តែការលក់ចេញ មានចំនួនដ៏ច្រើនគួរឲ្យកត់សម្គាល់។
យោងតាមការផ្សាយរបស់ Auto Plus ក្រុមហ៊ុនយានយន្តបារាំង មានកំណើននៃការលក់ដល់ទៅ៥០ភាគរយ បើប្រៀបធៀបទៅនឹងឆ្នាំ២០១៦ ។ Citroen, Peugeot និង Renault រួមទាំង Hyundai របស់កូរ៉េខាងត្បូង ក៏ដូចជា Suzuki របស់ជប៉ុន សុទ្ធតែរីករាយជាមួយនឹងអត្រានៃការលក់ចេញផលិតផលខ្លួន។
ទោះបីជាយ៉ាងណាក៏ដោយ ក្រុមហ៊ុនម៉ាកល្បីៗ ជិត២០ មិនបានចូលរួមក្នុងព្រឹត្តិការណ៍នេះឡើយ ក្រុមហ៊ុនទាំងនោះរួមមានដូចជា Abarth, Alfa Romeo, Bentley, Fiat, Ford, Jeep, Lancia, Mazda, Mini, Mitsubishi, Nissan, Opel, Polestar, Rolls-Royce, Ssangyong, Subaru, Volkswagen និង Volvo ជាដើម។
ក្រុមហ៊ុនដែលបានចូលរួមបង្អួតផលិតរបស់ខ្លួននៅ Porte de Versailles រួមមាន Alpine, Aston Martin, Audi, BMW, Citroën, Dacia, Dangel, DS Automobiles, E-Moke, Ferrari, Jaguar, Land Rover, Lamborghini, Ligier, Lotus, Maserati, Mercedes-Benz, Morgan, MPM Motors, Peugeot, Porsche, Renault, Seat, Škoda, Smart, Tesla។
ក្រុមហ៊ុន Vinfast របស់វៀតណាម បង្ហាញជាលើកដំបូងបំផុតក្នុងព្រឹត្តិការណ៍លំដាប់ពិភពលោកនេះ រីឯក្រុមហ៊ុនផ្សេងទៀតមកពីតំបន់អាស៊ីរួមមាន Aspark, GAC, Honda, Hyundai, Infiniti, Isuzu, Kia, Lexus, Suzuki និង Toyota។
ម៉ូដែលថ្មីៗ ដែលមានការទាក់ទាញខ្ពស់ មានដូចជា Aston Martin Vantage, Audi e-tron Quattro, BMW M5 Competition, Bugatti Divo, Citroën C5 Aircross, Cupra Ateca, DS 7 Crossback E-Tense, Ferrari Monza SP1 et SP219, Honda HR-V First Edition, Hyundai Kona Electric, Kia e-Niro, Lexus ES VII, Ligier JS2 R, Maserati Levante Trofeo, Mercedes-Benz Classe A IV berline, Peugeot 3008 II Hybrid4, Renault Mégane IV RS Trophy, Seat Tarraco, Škoda Kodiaq RS, Suzuki Jimny IV, Tesla Model 3, Toyota Corolla Touring Sports៕