នាយករដ្ឋមន្ត្រីថៃ ប្រកាសជោគជ័យក្នុងដំណើរទស្សនកិច្ចទៅប៊ែលហ្ស៊ិក ដ្បិតរដ្ឋអឺរ៉ុបព្រមយោគយល់ស្ថានភាពនៅថៃ

អន្តរជាតិ

នាយករដ្ឋមន្ត្រីថៃ ប្រកាសជោគជ័យក្នុងដំណើរទស្សនកិច្ចទៅប៊ែលហ្ស៊ិក ដ្បិតរដ្ឋអឺរ៉ុបព្រមយោគយល់ស្ថានភាពនៅថៃ

22, Oct 2018 , 10:59 pm

រូបភាព

ដោយ:

ប្រមុខរបបសឹកថៃ លោកឧត្តមសេនីយ៍ ប្រាយុទ្ធ ចន្ទ អូចា បានប្រកាសពីជោគជ័យក្នុងដំណើរទស្សនកិច្ចទៅចូលរួមកិច្ចប្រជុំអាស៊ី-អឺរ៉ុប នៅក្នុងប្រទេសបែលហ្ស៊ិក។ ហេតុផល ដែលប្រមុខរបបសឹកថៃរូបនេះហ៊ានប្រកាសបែបនេះ ដ្បិតលោក អះអាងថា ប្រទេសតំបន់អឺរ៉ុប បានយោគយល់ពីស្ថានភាពរបស់ប្រទេសថៃ ដែលកំពុងតែគ្របដណ្តប់ដោយឥទ្ធិពលយោធានោះ។

នៅពេលដែលមកព្រលានយន្តហោះក្នុងទឹកដីរបស់ខ្លួននៅព្រឹកថ្ងៃ២០ តុលាភ្លាម ពោលគឺបន្ទាប់ពីវិលត្រឡប់ពីចូលរួមប្រជុំអាស៊ី-អឺរ៉ុបនៅបែលហ្ស៊ិក លោកនាយករដ្ឋមន្ត្រី ប្រាយុទ្ធ ចន្ទ អូចា បានប្រាប់អ្នកសារព័ត៌មានថា លោក ទទួលបានមតិយល់ឃើញល្អៗ និងការជឿទុកចិត្តពីប្រទេសអឺរ៉ុបលើផែនការនៃការបោះឆ្នោតរបស់ថៃ ដែលកំពុងតែដឹកនាំដោយលោកនាយករដ្ឋមន្ត្រី។ នេះបើយោងតាមការចុះផ្សាយរបស់សារព័ត៌មាន Bangkok Post។

លោកនាយករដ្ឋមន្ត្រី បានអះអាងថា លោក បានជជែកជាមួយនឹងមេដឹកនាំមកពីបណ្តាប្រទេសជិត៥០ ហើយមេដឹកនាំ មួយចំនួន បានឯកភាពថា ថៃ បានអនុវត្តគ្រប់កាតព្វកិច្ចអន្តរជាតិ។ ពិសេសនោះ លោក សង្កត់ធ្ងន់ថា តាមរយៈជំនួបទ្វេភាគីជាមួយនឹងមេដឹកនាំប្រាំបួនប្រទេស លោក បានផ្លាស់ប្តូរយោបល់គ្នាជាច្រើន ដោយមេដឹកនាំប្រទេសទាំងនោះ ក៏បានទទួលស្គាល់ថា រដ្ឋាភិបាលរបស់លោក បានធ្វើឲ្យប្រទេសមានដំណើរការល្អ ទាំងលើវិស័យពាណិជ្ជកម្ម ការវិនិយោគ និងសណ្តាប់ធ្នាប់ជាដើម។

បន្ថែមពីការលើកឡើងនេះ លោករដ្ឋមន្ត្រីការបរទេសថៃ Don Pramudwinai ដែលបានអមដំណើរលោកនាយករដ្ឋមន្ត្រីក្នុងកិច្ចប្រជុំនោះ បានអះអាងថា គ្មានប្រទេសណាមួយ សម្តែងការព្រួយបារម្ភពីស្ថានភាពថៃ និងស្ថានភាពបន្ទាប់ពីលោកនាយករដ្ឋមន្ត្រី ប្រាយុទ្ធ ចុះចេញពីតំណែងឡើយ។ លោករដ្ឋមន្ត្រី ប្រាប់អ្នកសារព័ត៌មានថា មេដឹកនាំបរទេស ក៏ចាត់ទុកស្ថានភាពថៃមានស្ថិរភាព។

គួរជម្រាបថា រដ្ឋាភិបាលរបស់លោកនាយករដ្ឋមន្ត្រី ប្រាយុទ្ធ ចន្ទ អូចា បានចាប់កំណើតឡើងដោយសាររដ្ឋប្រហារយោធាថ្ងៃទី ២២ ខែឧសភា ឆ្នាំ២០១៤។ រដ្ឋប្រហារដែលដឹកនាំដោយលោក ប្រាយុទ្ធ ផ្ទាល់ ធ្វើឡើងក្រោមហេតុផលថា មេដឹកនាំមុន ធ្វើឲ្យប្រទេសមានការបែងចែក អស្ថិរភាព និងខូចខាតផលប្រយោជន៍សេដ្ឋកិច្ច៕