អនាគតនាយករដ្ឋមន្ត្រីម៉ាឡេស៊ីទទូចឲ្យយុវជនពង្រឹងភាសាចិនដើម្បីប្រយោជន៍សេដ្ឋកិច្ច

អន្តរជាតិ

អនាគតនាយករដ្ឋមន្ត្រីម៉ាឡេស៊ីទទូចឲ្យយុវជនពង្រឹងភាសាចិនដើម្បីប្រយោជន៍សេដ្ឋកិច្ច

22, Oct 2018 , 11:59 pm

រូបភាព

ដោយ:

តំណាងរាស្ត្រ និងជាអនាគតនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម នៅថ្ងៃទី២១ ខែតុលា បានទទូចឲ្យសិស្ស និងនិស្សិតម៉ាឡេស៊ីពង្រឹងការសិក្សាភាសាចិនឲ្យបានខ្លាំងពូកែ ដ្បិតថាភាសានេះ ជា «ភាសាសេដ្ឋកិច្ចដ៏សំខាន់ប្រចាំតំបន់»។

ថ្លែងនៅក្នុងសិក្ខាសាលាជាតិដែលបានរៀបចំឡើងដោយជាប់ទាក់ទងនឹងមហាសន្និបាតម៉ាឡេស៊ីលើកទី៤៧ ប្រធានគណបក្សសហព័ន្ធ Parti Keadilan Rakyat ដែលទើបតែចូលកាន់តំណែងជាសមាជិកសភាកាលពីពេលថ្មីនេះជំរុញឲ្យយុវជនម៉ាឡេស៊ីយកចិត្តទុកដាក់ពង្រឹងសមត្ថភាពភាសាចិន។

លោកបានលើកឡើងបែបនេះថា៖ «ភាសាចិនគឺជាភាសាសេដ្ឋកិច្ចយុទ្ធសាស្ត្រប្រចាំតំបន់មួយនាពេលបច្ចុប្បន្ននេះ។ ភាសានេះត្រូវបានទទួលយក ដោយមិនបាច់ចោទសួរពីជំហរនៃភាសាម៉ាឡេ ដែលជាភាសាជាតិរបស់យើងនោះទេ។ យ៉ាងណាមិញ រដ្ឋាភិបាលក៏គាំទ្រការសិក្សាភាសាបរទេសផ្សេងទៀតផងដែរ»។

មិនត្រឹមតែប៉ុណ្នោះ ក្នុងឱកាសនេះផងដែរ លោកអាន់វ៉ា ដែលធ្លាប់ជាអតីតប្រធានចលនាយុវជនមូស្លីមម៉ាឡេស៊ី បានអះអាងទៀតថា ការអភិវឌ្ឍរបស់ជាតិត្រូវតែភ្ជាប់យ៉ាងចាំបាច់ ជាមួយការសង្កត់ធ្ងន់លើទិដ្ឋភាពមនុស្សធម៌។ គោលបំណងនោះគឺដើម្បីពង្រឹងការយល់ដឹង អំពីសាសនាអ៊ីស្លាមឲ្យបានច្បាស់លាស់ជាងមុនបន្ថែមទៀត។ នេះបើតាមសារព័ត៌មានម៉ាឡេស៊ី Bernama។

ម្យ៉ាងវិញទៀត លោក អាន់វ៉ាក៏បានលើកឡើងពីតម្លៃមនុស្ស ដោយលោកពន្យល់ថា ទិដ្ឋភាពសេដ្ឋកិច្ចមិនគួរត្រូវបានគេវិនិច្ឆ័យដោយផ្អែកលើត្រឹមតែអភិបាលកិច្ចល្អ និងគ្មានអំពើពុករលួយប៉ុណ្ណោះទេ ប៉ុន្តែគេត្រូវផ្តោតលើតម្លៃមនុស្សផងដែរ។ លោកបន្ថែមថា វាមានអភិវឌ្ឍសេដ្ឋកិច្ចគួរឲ្យភ្ញាក់ផ្អើល ប៉ុន្តែបើក្រឡេកទៅមើលប្រជាជនវិញនោះមិនត្រូវបានគេឲ្យផ្តល់តម្លៃឡើយ៕