កីឡាអន្តរជាតិ
អន្តរជាតិ
បេក្ខភាព៥រូបដែលអាចជំនួសលោក Lopetegui នៅ Real Madrid
× ក្លិបយក្សអេស្ប៉ាញ Real Madrid រាយការណ៍ថាបានកំណត់អត្តសញ្ញាណបេក្ខភាព៥រូបដែល ត្រូវជំនួសអ្នកចាត់ការទូទៅ លោក Julen Lopetegui ដែលអាចនឹងបញ្ចប់តំណែងនាពេលឆាប់ៗនេះ បន្ទាប់ពីដឹកនាំក្រុមធ្លាក់ទម្រង់លេងយ៉ាងខ្លាំង។
អតីតគ្រូបង្វឹកក្រុមជម្រើសជាតិអេស្ប៉ាញរយៈពេលខ្លីរូបនេះ កំពុងស្ថិតក្រោមសម្ភាធធ្ងន់ធ្ងរបន្ថែមទៀតនៅឯទឹកដី Bernabeu បន្ទាប់ពីលទ្ធផលមិនគាប់ប្រសើរសោះ ដោយទទួលបរាជ័យជាច្រើនជាងជ័យជម្នះចាប់ពីឡើងដឹកនាំមក។
ក្រោមការដឹកនាំរបស់លោក Lopetegui ក្នុងការជំនួសតំណែង Zinedine Zidane សម្រាប់រដូវកាល ២០១៨-២០១៩នេះ ក្រុមរហស្សនាមស្តេចសរកបានតែ១៤ពិន្ទុប៉ុណ្ណោះក្នុងចំណោម៩ប្រកួតនៃក្របខណ្ឌ La Liga ដោយឈ្នះ៤ ចាញ់៤ និងស្មើមួយ តាមពីក្រោយគូប្រជែង Barcelona ដែលស្ថិតនៅកំពូលតារាង៤ពិន្ទុ។ Real ក៏បរាជ័យក្រោមថ្វីឈើងក្រុម CSKA Moscow ក្នុងការប្រកួតពាន Champions League វគ្គសន្សំពិន្ទុពូល G ផងដែរ។
អ្នកចាត់ការសញ្ជាតិអេស្ប៉ាញ វ័យ ៥២ឆ្នាំ រំពឹងថាត្រូវបានក្លិប Real ទុកឱកាសសម្រាប់ការប្រកួតពានរង្វាន់កំពូលអឺរ៉ុប ក្នុងជំនួបទល់នឹងក្រុម Viktoria Plzen មុនប៉ះ Barcelona នៅ El Clasico សប្តាហ៍ក្រោយដើម្បីរក្សាតំណែងរបស់លោក។
យ៉ាងណាក៏ដោយក្លិបដែលមានមូលដ្ឋានក្នុងក្រុងម៉ាឌ្រីដនេះ ក៏បានត្រៀមបញ្ជីឈ្មោះអ្នកដែលត្រូវជំនួសលោក Lopetegui រួចរាល់ហើយដែរ។
បើតាមកាសែតអេស្ប៉ាញ MARCA អតីតខ្សែបម្រើ Santiago Solari ជាបេក្ខភាពនាំមុខគេក្នុងចំណោម៥នាក់ដើម្បីជំនួសកៅអីនេះ។ បេក្ខភាព៤នាក់ផ្សេងទៀតរួមមាន Guti ដែលជាអតីតខ្សែបម្រើរបស់ Real Madrid នេះដែរ លោក Roberto Martinez គ្រូបង្វឹកក្រុមជម្រើសជាតិបែលហ្ស៊ិកបច្ចុប្បន្ន លោក Antonio Conte អតីតអ្នកចាត់ការទូទៅ Chelsea និង អតីតអ្នកចាត់ការ PSG លោក Laurent Blanc ផងដែរ៕
Tag:
បាល់ទាត់
Real Madrid
Julen Lopetegui
© រក្សាសិទ្ធិដោយ thmeythmey.com