កំពត៖ មន្ទីរទេសចរណ៍ខេត្តកំពត បានកំណត់យកតំបន់សក្តានុពលទេសចរណ៍ចំនួន១១កន្លែង ជារមណីយដ្ឋាន និងកន្លែងកម្សាន្តបែបធម្មជាតិនៅក្នុងខេត្ត ដែលអាចទាក់ទាញភ្ញៀវទេសចរជាតិ-អន្តរជាតិឱ្យមកទស្សនាកាន់តែច្រើន។ សក្តានុពលទេសចរណ៍ទាំង១១កន្លែងនេះ ជាតំបន់ដែលមានទេសភាពធម្មជាតិដ៏ស្រស់ស្អាត, ងាយស្រួលធ្វើដំណើរ និងមានសុវត្ថិភាពដល់ភ្ញៀវទេសចរ។ល។
តំបន់សក្តានុពលទេសចរណ៍ទាំង១១កន្លែងដែលមាននៅក្នុងខិត្តប័ណ្ណ«ផែនទីទេសចរណ៍ខេត្តកំពត» ដែលបោះពុម្ពដោយក្រសួងទេសចរណ៍នេះ រួមមាន៖ ឧទ្យានជាតិព្រះមុន្នីវង្សបូកគោ, ទឹកឈូ, ណាតាយ៉ាព្រែកអំពិល, អន្លង់ធំ, ស្រែអំបិល, ភ្នំឈ្ងោក, ទំនប់ប្រទាក់ក្រទ្បា, ភ្នំកំពង់ត្រាច, ជម្រកសត្វស្លាបអន្លង់ព្រឹង, ចំការម្រេច និងទំនប់ម្លេច។
តំបន់ទេសចរណ៍ធម្មជាតិទាំងនោះ មានទេសភាពដ៏ស្រស់ស្អាតដែលអាចទាក់ទាញភ្ញៀវទេសចរជាតិ-អន្តរជាតិឱ្យមកកម្សាន្ត និងបង្កើតអនុស្សាវរីយ៍ដែលមិនអាចបំភ្លេចបាន។ ភូមិសាស្ត្រនៃតំបន់ទេសចរណ៍ទាំង១១កន្លែងនោះ ងាយស្រួលធ្វើដំណើរ, ជាតំបន់ដែលមានសុវត្ថិភាពដល់ភ្ញៀវទេសចរ និងគ្មានគ្រោះថ្នាក់ធម្មជាតិដែលអាចកើតទ្បើងជាយថាហេតុណាមួយ ដូចជាការបាក់ទឹកពីលើភ្នំមកជាដើម។
ក្រៅពីសក្តានុពលទេសចរណ៍ខាងលើ នៅមានរមណីយដ្ឋានជាច្រើនកន្លែងទៀត អាចក្លាយទៅជាតំបន់ទេសចរណ៍ដ៏សម្បូរបែប ដែលអំណោយផលដល់ភ្ញៀវទេសចរមកកម្សាន្តនៅលើទឹកដីនៃទិសនិរតីមួយនេះ។
ដែនដីទេសចរណ៍ដែលមានស្ថាបត្យកម្មដ៏ប្រណិតជាច្រើនកន្លែង ដែលបន្សល់ទុកដោយអាណានិគមនិយមបារាំងមួយនេះ កំពុងទាក់ទាញភ្ញៀវទេសចរណ៍ចម្រុះជនជាតិឱ្យមកកម្សាន្ត និងស្វែងយល់ពីទេសចរណ៍បែបធម្មជាតិ និងប្រវត្តិសាស្ត្រនៅខេត្តកំពតនេះកាន់តែច្រើន។