រថយន្ត
អន្តរជាតិ
ក្រុមហ៊ុន Dyson ជ្រើសរើសសិង្ហបុរីជាទីតាំងផលិតរថយន្តអគ្គិសនី
× ក្រុមហ៊ុន Dyson ដែលមានមូលដ្ឋាននៅចក្រភពអង់គ្លេស បានជ្រើសរើសសិង្ហបុរីជាទីតាំងផលិតរថយន្តអគ្គិសនីរបស់ខ្លួន ដោយរំពឹងថា រថយន្តដំបូងនឹងត្រូវបង្ហាញវត្តមាននាឆ្នាំ២០២១ ខាងមុខ។ នេះបើតាមការផ្សាយរបស់ BBC។
Dyson បានអះអាងសិង្ហបុរីជាដែនដីដ៏ថ្លៃបំផុតក្នុងការធ្វើអាជីវកម្ម ប៉ុន្តែក្រុមហ៊ុនមើលឃើញពីនិរន្តភាពនៃសង្វាក់ផលិតកម្ម ជាពិសេសទេពកោសល្យនៃជំនាញវិស្វកម្ម និងទីផ្សារដ៏ធំប្រចាំតំបន់។ ដោយមិនបានបញ្ជាក់ពីកាលបរិច្ឆេទច្បាស់លាស់ ក្រុមហ៊ុនមួយនេះ គ្រាន់តែបង្ហើបថា ដំណើរការសាងសង់រោងចក្រនឹងធ្វើឡើងក្នុងរយៈពេលដ៏ខ្លី។
Dyson ដែលមានភាពល្បីល្បាញលើផលិតផលម៉ាស៊ីនបូមធូលី ធ្លាប់បានអះអាងកន្លងមកថា ក្រុមហ៊ុនប្រើប្រាស់ថវិកា២ពាន់លានផោន (២,៧ពាន់លានដុល្លារអាមេរិក) លើគម្រោងផលិតរថយន្តអគ្គិសនី ដែលក្នុងនោះ២០០លានផោនសម្រាប់ចំណាយលើការស្រាវជ្រាវ និងអភិវឌ្ឍន៍ រួមទាំងការសាកល្បងគន្លងផ្លូវនៅចក្រភពអង់គ្លេស។
ទាក់ទងនឹងការដាក់ទីតាំងផលិតនៅអាស៊ី ជាជាងរក្សាទុកនៅចក្រភពអង់គ្លេស ត្រូវបាន Dyson អះអាងថា មិនមានអ្វីពាក់ព័ន្ធនឹងការចាកចេញពីសហភាពអឺរ៉ុបរបស់អង់គ្លេស (Brexit) នោះឡើយ។ ទោះបីជាយ៉ាងណាក៏ដោយ ដំណើរការហាក់ដូចជាយឺតយ៉ាវសម្រាប់ Dyson ពីព្រោះក្រុមហ៊ុនមិនទាន់មានដៃគួរយានយន្តច្បាស់លាស់នោះឡើយ។
រយៈពេល៥ឆ្នាំចុងក្រោយនេះ Dyson កើនបុគ្គលិកដល់ប្រមាណ៤៨០០នាក់នៅចក្រភពអង់គ្លេស។ នៅអាស៊ី ក្រុមហ៊ុនមានបុគ្គលិក ១១០០នាក់នៅសិង្ហបុរី ១៣០០នាក់នៅម៉ាឡេស៊ី ១០០០នាក់នៅចិន និង៨០០នាក់នៅហ្វីលីពីន។
ក្រុមហ៊ុនដែលមាន Sir James Dyson ជាស្ថាបនិកនេះ មិនបានលើកឡើងពីម៉ូតរថយន្តដែលត្រូវផលិតនោះឡើយ។ កន្លងមក ក្រុមហ៊ុនបានជ្រើសរើសកម្លាំងវិស្វកម្ម៣០០នាក់បន្ថែមទៀត ដើម្បីបោះជំហានទៅមុខលើគម្រោងយានយន្តអគ្គិសនីរបស់ខ្លួន៕
© រក្សាសិទ្ធិដោយ thmeythmey.com