ជាតិ
នយោបាយជាតិ
សន្និសីទទ្រង់ទ្រាយធំរបស់អតីត CNRP ធ្វើឡើងដោយគ្មានការឯកភាពពីលោក កឹម សុខា លោក សម រង្ស៊ី ទៅដល់រដ្ឋចចា សហរដ្ឋអាមេរិក ដើម្បីចូលរួមសន្និសីទរបស់អតីតគណបក្សសង្គ្រោះជាតិ នៅថ្ងៃទី១-២ ខែធ្នូ ឆ្នាំ២០១៨។ រូបពីទំព័រហ្វេសប៊ុករបស់លោក សម រង្ស៊ី
× ទោះជាទទួលដំណឹងថា លោក កឹម សុខា មិនពេញចិត្តក៏ដោយ ក៏អ្នកគាំទ្រនៃអតីតគណបក្សសង្គ្រោះជាតិនៅក្រៅប្រទេស នៅតែបន្តរៀបចំសន្និសីទ នៅសហអាមេរិកដដែល ដែលនឹងប្រព្រឹត្តទៅពីថ្ងៃទី១ដល់ថ្ងៃទី២ ខែធ្នូ ឆ្នាំ២០១៨ ដោយមានលោក សម រង្ស៊ី នៅពីក្រោយ។
លោក សម រង្ស៊ី បានសរសេរសារលើទំព័រហ្វេសប៊ុក ដើម្បីផ្តល់ដំណឹងដល់អ្នកគាំទ្រថា លោក បានទៅដល់ទីក្រុងអាត្លង់តា រដ្ឋចចា សហរដ្ឋអាមេរិកហើយ នៅថ្ងៃទី៣០ ខែវិច្ឆិកា ឆ្នាំ២០១៨ ដើម្បីតាមដានសន្និសីទរបស់សាខាគណបក្សសង្គ្រោះជាតិនៅទូទាំងពិភពលោក។
តាមរយៈសំណេរលើបណ្តាញសង្គម សម រង្ស៊ី បានសរសេរថា សន្និសីទនេះ គឺប្រមូលផ្តុំទៅដោយប្រតិភូគណបក្សសង្គ្រោះជាតិដល់ទៅជាង៤០០នាក់ ដែលមកពីសហរដ្ឋអាមេរិក កាណាដា និងទ្វីបអឺរ៉ុប គឺបារាំង បែលហ្សិក ស្វីស អាល្លឺម៉ង់ អ៊ីតាលី អូទ្រីស ហូឡង់ ន័រវេស ស៊ុយអែត និងហ្វាំងឡង់ រួមទាំងទ្វីបអាស៊ីផងដែរ គឺកម្ពុជា ថៃ ម៉ាឡេស៊ី ជប៉ុន កូរ៉េ ព្រមទាំងទ្វីបអូសេអានី ប៉ាស៊ីហ្វិច គឺអូស្ត្រាលី និងនូវែលសេឡង់។
លោក សម រង្ស៊ី អះអាងថា ក្នុងកាលៈទេសៈនេះ លោក កឹម សុខា ត្រូវបានគេចាប់ធ្វើជាចំណាប់ខ្មាំង ហើយមិនអាចបញ្ចេញយោបល់បានឡើយ។ លោក បញ្ជាក់យ៉ាងដូច្នេះថា៖«មានតែសកម្មជនគណបក្សសង្គ្រោះជាតិ នៅក្រៅប្រទេសប៉ុណ្ណោះ ដែលអាចជួបជុំគ្នា និងពិភាក្សាគ្នា ដើម្បីកំណត់យុទ្ធសាស្ត្រ និងធ្វើសេចក្តីសម្រេចសមស្របទាន់ពេលវេលា ក្នុងគោលបំណងរកដំណោះស្រាយចំពោះវិបត្តិនយោបាយសព្វថ្ងៃនៅកម្ពុជា»។
លោក កឹម សុខា ដែលតុលាការមិនអនុញ្ញាតឲ្យចេញទៅណាឆ្ងាយពីផ្ទះ បានបន្តរក្សាភាពស្ងៀមស្ងាត់ ចំពោះគ្រប់សកម្មភាពរបស់លោក សម រង្ស៊ី រួមទាំងការរៀបចំសន្និសីទដ៏ធំនាពេលនេះផងដែរ។ ប៉ុន្តែ ពីរ-បីថ្ងៃនេះ គេបានឃើញសារព័ត៌មានមួយចំនួនចុះផ្សាយពីប្រសាសន៍របស់មេធាវី ដែលការពារក្តីឲ្យលោក កឹម សុខា ថាលោក កឹម សុខា ពុំបានគាំទ្រសន្និសីទនេះឡើយ។
លោក ចាន់ ចេន មេធាវីម្នាក់របស់លោក កឹម សុខា ប្រាប់សារព័ត៌មានថ្មីៗតាមទូរសព្ទនៅថ្ងៃទី៣០ ខែវិច្ឆិកានេះ យ៉ាងដូច្នេះថា៖«ខ្ញុំមិនអាចនិយាយអ្វីច្រើនទេ គ្រាន់តែខ្ញុំដឹងពីរចំណុចពីកូនក្តីរបស់ខ្ញុំ គឺទីមួយគាត់ ថាគាត់អត់បានដឹងពីការរៀបចំសន្និសីទហ្នឹងទេ ហើយទីពីរ គឺគាត់ អត់គាំទ្រ។ លោកមេធាវី អះអាងថា លោក បានទៅសួរសុខទុក្ខលោក កឹម សុខា នៅគេហដ្ឋាន កាលពីថ្ងៃទី២៦ ខែវិច្ឆិកាកន្លងទៅ។
បន្ទាប់ពីសន្និសីទនៅអាមេរិក លោក សម រង្ស៊ី និងអ្នកគាំទ្រ នឹងបន្តរៀបចំសនិ្នសីទមួយទៀត ក្នុងប្រទេសបារាំង នៅថ្ងៃទី១៥ ខែធ្នូ៕
Tag:
CNRP
សន្និសីទ
សម រង្ស៊ី
កឹម សុខា
© រក្សាសិទ្ធិដោយ thmeythmey.com