ជាតិ
សង្គមជាតិ
អាល្លឺម៉ង់ ផ្តល់ថវិកាជាង៩០ម៉ឺនដុល្លារ សម្រាប់អភិវឌ្ឍន៍គម្រោង៣ នៅកម្ពុជា
រូបភាពពីក្រសួងឧស្សាហកម្ម និងសិប្បកម្ម
×![]()
ភ្នំពេញ៖ អាល្លឺម៉ង់ ផ្ដល់ថវិកាជាង៩០ម៉ឺនដុល្លារអាមេរិក ដល់ក្រសួងឧស្សាហកម្ម និងសិប្បកម្ម សម្រាប់អភិវឌ្ឍន៍គម្រោង៣នៅកម្ពុជា។ទឹកប្រាក់ជាង ៩០ម៉ឺនដុល្លារអាមេរិក ត្រូវបានប្រកាសក្នុងការចុះហត្ថលេខា រវាងលោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងសិប្បកម្ម ជាមួយអ្នកស្រី Nitja Rehani អ្នកសម្របសម្រួលគម្រោងនៃអង្គការ PTB អាល្លឺម៉ង់ នឹងយកទៅអភិវឌ្ឍន៍គម្រោង៣ខាងលើរយៈពេល៣ឆ្នាំ គិតចាប់ពីឆ្នាំ២០១៨ ដល់ឆ្នាំ២០២០។ 
ទឹកប្រាក់ចំនួន ៨០០,០០០ អឺរ៉ូ (ជាង៩០ម៉ឺនដុល្លារអាមេរិក) ដែលជាជំនួយរបស់រាជរដ្ឋាភិបាលអាល្លឺម៉ង់ បានផ្តល់ឲ្យក្រសួងឧស្សាហកម្ម និងសិប្បកម្ម សម្រាប់អភិវឌ្ឍន៍គម្រោង៣ នៅកម្ពុជា ដូចជា ពង្រឹងការអភិវឌ្ឍហេដ្ឋារចនាសម្ព័ន្ធគុណភាពជាតិ, ពង្រីកវិសាលភាពទាក់ទងទៅលើអង្គភាពពាក់ព័ន្ធ ដែលរួមមាន មជ្ឈមណ្ឌលមាត្រាសាស្ត្រជាតិ, វិទ្យាស្ថានស្តង់ដារកម្ពុជា ,នាយកដ្ឋានវាយតម្លៃទទួលស្គាល់ និងមជ្ឈមណ្ឌលមន្ទីរពិសោធន៍កម្ពុជា និងពង្រឹងការផលិតដំឡូងមី។
រដ្ឋមន្ត្រីក្រសួងឧស្សាហកម្ម និងសិប្បកម្ម លោក ចម ប្រសិទ្ធ បាននិយាយថា ៖«កម្ពុជាមានសេដ្ឋកិច្ច ពឹងផ្អែកលើការនាំចេញផលិតផល តាមរយៈភាពអនុគ្រោះពាណិជ្ជកម្ម ដែលកម្ពុជាទទួលទីផ្សារក្រៅប្រទេស។ ដូច្នេះទឹកប្រាក់ដែលផ្តល់ឲ្យសម្រាប់អភិវឌ្ឍន៍គម្រោងទាំង៣នេះ យើងមិនអាចខ្វះមួយណាបានឡើយ ជាពិសេសការងារអភិរក្សហេដ្ឋារចនាសម្ព័ន្ធគុណភាពជាតិ ដើម្បីប្រើប្រាស់សមត្ថភាពមន្ទីរពិសោធន៍របស់យើង បូករួមនិងសក្តានុពលធនធានមនុស្ស ឲ្យមានសមត្ថភាពនិងលទ្ធភាពសម្រប់ការត្រួតពិនិត្យវាយតម្លៃភាពអនុលោម និងផ្តល់វិញ្ញាបនបត្របញ្ជាក់ទៅលើទំនិញ ឬផលិតផល ដែលត្រូវនាំចេញឲ្យស្របតាមកំរិតស្តង់ដារ»។
បន្ថែមពីនេះអ្នកស្រី Nitja Rehani អ្នកសម្របសម្រួលគម្រោងនៃអង្គការ PTB អាល្លឺម៉ង់ ចង់ឲ្យកម្ពុជា មានល្បឿននិងភាពស៊ីសង្វាក់គ្នាលើការងារ ការកំណត់ទិសដៅជាអាទិភាព និងស្វែងយល់ពីភាពខ្វះចន្លោះ និងការងារជាន់ភារកិច្ចគ្នាជាដើម។ «ការផ្ទេរបច្ចេកវិទ្យា និងអភិវឌ្ឍន៌ធុនធានមនុស្ស គឺកត្តាដែលត្រូវយកចិត្តទុកដាក់ផងដែរ»។ នេះជាការបញ្ជាក់របស់អ្នកស្រី Nitja Rehani៕
Tag:
អាល្លឺម៉ង់
ទឹកប្រាក់
កម្ពុជា
© រក្សាសិទ្ធិដោយ thmeythmey.com
