ជាតិ
សង្គមជាតិ
អភិបាលក្រុងសៀមរាបថ្មី បេ្ដជ្ញាខ្ពស់ក្នុងការរំដោះចិញ្ចើមផ្លូវមកឱ្យអ្នកដំណើរវិញ
× សៀមរាប៖ អភិបាលក្រុងសៀមរាបថ្មី ដែលទើបឡើងកាន់តំណែងនៅពាក់កណ្ដាលខែ វិច្ឆិកា លោក នួន ពុទ្ធារ៉ា បានបង្ហាញគោលជំហរ និងការតាំងចិត្តខ្ពស់ ចំពោះការងាររំដោះចិញ្ចើមផ្លូវមកឱ្យអ្នកដំណើរ។ សម្រាប់លោកអភិបាលក្រុង បញ្ហានេះក្លាយជាចំណុចអាទិភាពសម្រាប់រដ្ឋបាលរបស់លោក ហើយលោកបេ្ដជ្ញាចិត្តថា នឹងធ្វើការងារនេះមិនដកដៃឡើយ។
ភ្លាមៗ បន្ទាប់ពីចូលកាន់តំណែងជាអភិបាលក្រុងសៀមរាបថ្មី លោក នួន ពុទ្ធារ៉ា បានបង្ហាញជំហរមាំទាំចំពោះបញ្ហារំដោះចិញ្ចើមផ្លូវ។ ការលើកឡើងនេះ នៅពេលដែលសមាគមទីភ្នាក់ងារទេសចរណ៍កម្ពុជា មានបំណងរៀបចំយុទ្ធនាការមួយ រួមគ្នារំដោះចិញ្ចើមផ្លូវសាធារណៈ សម្រួលដល់ការធ្វើដំណើររបស់ភ្ញៀវទេសចរ ដែលមានចំនួនច្រើននៅខេត្តសៀមរាប។
លោក ផាវ ព្រឿន ប្រធានសមាគមទីភ្នាក់ងារទេសចរណ៍កម្ពុជាខេត្តសៀមរាប បានបង្ហាញពីផែនការមួយដោយក្នុងនោះ រៀនចំឱ្យមានយុទ្ធនាការរំដោះចិញ្ចើមផ្លូវ ដែលបច្ចុប្បន្នលោកមើលឃើញថា វាត្រូវបានរំលោភដោយឯកជន។ «បញ្ហាត្រង់ថា ការប្រើប្រាស់ចំណីថ្នល់ របស់សាធារណៈជារបស់ឯកជន ម្នាក់ៗគិតថា មុខផ្ទះរបស់គេជាកម្មសិទ្ធិឯកជន ចង់ធ្វើអ្វីក៏បាន»។ នេះជាការបន្ថែមរបស់លោក ព្រឿន ទាក់ទងនឹងបញ្ហាចិញ្ចើមផ្លូវនេះ។
បើតាមការបញ្ជាក់របស់ប្រធានទីភ្នាក់ងារទេសចរណ៍កម្ពុជាខេត្តសៀមរាប បើការងារនេះជោគជ័យ លោក ជឿជាក់ថា វាជាផ្នែកមួយពន្យាដល់ការស្នាក់នៅ និងការកម្សាន្តទេសចរ ក្នុងក្រុងសៀមរាបបានមួយកម្រិតទៀតផងដែរ។ ក្រៅពីបង្ហាញពីបំណងក្នុងការរៀបចំយុទ្ធាការនេះ លោក ព្រឿន ចង់ឱ្យមានការចូលរួមពីអាជ្ញាធរ ជាពិសេសវិស័យទេសចរណ៍ ដើម្បីប្រាកដថា ទទួលបានជោគជ័យ។
ឆ្លើយតបទៅនឹងបញ្ហានេះ អភិបាលក្រុងសៀមរាប លោក នួន ពុទ្ធារ៉ា លើកឡើងថា មិនត្រឹមតែចូលរួមប៉ុណ្ណោះទេ តែវាជាបំណងប្ដូរផ្ដាច់របស់ក្រុងផងដែរ។ យ៉ាងណាលោកថា បញ្ហានេះកន្លងមកមានភាពស្មុគស្មាញ និងប្រឈម ដូច្នេះត្រូវការពិចារណាឱ្យបានច្បាស់លាស ថាតើកម្រិតណាដែលអនុញ្ញាតឱ្យពលរដ្ឋប្រើប្រាស់ កម្រិតណាទុកសម្រាប់អ្នកដំណើរ សម្រាប់ប្រកបអាជីវកម្ម សម្រាប់ចំណត គឺត្រូវមានការពិចារណាឱ្យច្បាស់លាស់៕
© រក្សាសិទ្ធិដោយ thmeythmey.com