ជាតិ
សង្គមជាតិ
បើកទស្សនាដោយសេរីរយៈពេល៣ថ្ងៃ អបអរខួប១០ឆ្នាំ នៃការបង្កើតសារមន្ទីរព្រះនរោត្តម សីហនុ-អង្គរ
× សៀមរាប៖ នៅថ្ងៃទី២ ធ្នូ អាជ្ញាធរជាតិអប្សរាបានរៀបចំខួប ១០ឆ្នាំ នៃការបង្កើតសារមន្ទីរព្រះនរោត្តម សីហនុ-អង្គរ ដែលមានការចូលរួមពីរដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានអាជ្ញាធរជាតិអប្សរា លោកស្រី ភឿង សកុណា។ ដើម្បីអបអរនូវពិធីនេះ គឺមានការបើកឱ្យចូលទស្សនាដោយឥតគិតថ្លៃរយៈពេល ៣ថ្ងៃ គឺចាប់ពីថ្ងៃទី ៤-៦ ធ្នូ។
ពិធីប្រារព្ធខួប១០ ឆ្នាំ នៃការដាក់សម្ពោធជាផ្លូវការសារមន្ទីរព្រះនរោត្តម សីហនុ-អង្គរ មានការចូលរួមពីរដ្ឋមន្ត្រីក្រសួងវប្បធម៌ មន្ត្រីរាជការ អ្នកជំនាញការជាតិ អន្ដរជាតិ និងភ្ញៀវអន្ដរជាតិប្រមាណ ១០០នាក់។ ជាមួយគ្នានេះដែរ ពិធីពុទ្ធាភិសេកព្រះពុទ្ធអង្គធំ ក៏រៀបចំដំណាលគ្នានេះដែរ។ បន្ទាប់ពីរៀបចំពិធីសាសនាចប់ លោកស្រី ភឿង សកុណា ក៏បានចូលទស្សនានៅក្នុងសារមន្ទីរផងដែរ។
សារមន្ទីរព្រះនរោត្តម សីហនុ-អង្គរ ត្រូវបានបង្កើតឡើងដោយក្រុមហ៊ុន អ៊ីអុង របស់ជប៉ុន តាមរយៈមូលនិធិ ១% និងដាក់សម្ពោធជាផ្លូវការនៅចុងឆ្នាំ ២០០៧ ក្រោមអធិបតីភាពរបស់ព្រះបាទ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា។ ដើមហេតុនៃការបង្កើតសារមន្ទីរនេះ គឺដោយសារនៅឆ្នាំ ២០០១ តាមរយៈការស្រាវជ្រាវនៅប្រាសាទបន្ទាយក្ដីរវាងសាកលវិទ្យាល័យ សូហ្វីយ៉ា និងបុរាណវិទូខ្មែរ បានប្រទះឃើញបំណែកបដិមាចំនួន ២៧៤។ ជាបណ្ដុះអាសន្ន រូបចម្លាក់ទាំងអស់ ត្រូវបាននាំទៅរក្សាទុកនៅមជ្ឈមណ្ឌល សូហ្វីយ៉ា ហើយនៅឆ្នាំ ២០០៣ ប្រធានកិតិ្ដយសរបស់ក្រុមហ៊ុន អ៊ីអុង បានមកទស្សនាកន្លែងតម្កល់រូបចម្លាក់នោះ ហើយក៏មានបំណងបង្កើតសារមន្ទីរមួយសម្រាប់តម្កល់រូបទាំងនោះ។
ដើម្បីអបអរនូវខួប ១០ឆ្នាំនេះ សាធារណជនទាំងអស់ អាចចូលទស្សនាដោយសេរីនៅសារមន្ទីរ ចាប់ពីថ្ងៃទី៤-៦ ធ្នូ និងអមដោយពិព័រណ៍ខ្នាតតូចមួយបន្ថែមស្ដីពី ព្រះពុទ្ធជាគ្រូថ្នាំ។
ទាក់ទងនឹងព្រះពុទ្ធអង្គធំដែលមានកម្ពស់៦ម៉ែត្រ វិញ ត្រូវបានសាងសង់តាមរយៈជំនួយឧបត្ថម្ភដោយលោកស្រី Sulata Mitra Sarkar ជនជាតិឥណ្ឌា នៅឆ្នាំ ២០១១ ក្នុងបំណងដើម្បីសុំសេចក្តីសុខសន្ដិភាព និងភាពសុខដុមរមនា ក៏ដូចជាទុកជាទីសក្ការៈដល់ប្រជាជនខ្មែរទូទៅ៕
© រក្សាសិទ្ធិដោយ thmeythmey.com