ភ្នំពេញ ថ្ងៃទី២៩ ខែវិច្ឆិកា ឆ្នាំ២០១៨៖ ហត្ថាកសិករ បានរៀបចំពិធីសម្ពោធដាក់ឲ្យប្រើប្រាស់ជាផ្លូវការ នូវអគារការិយាល័យសិក្សា និងផ្តល់នូវសម្ភារសិក្សា ដែលមានតម្លៃសរុបជាង៤ម៉ឺនដុល្លា ដល់សិស្សានុសិស្ស និងលោកគ្រូអ្នកគ្រូ នៅសាលាបឋមសិក្សាពោធិ៍សាត់ ក្នុងខេត្តពោធិ៍សាត់ ក្រោមអធិបតីភាពដ៏ខ្ពង់ខ្ពស់ លោក ម៉ៅ ធនិន អភិបាលខេត្តពោធិ៍សាត់។
ថ្លែងនៅក្នុងកម្មវិធីនេះ លោក ហួត អៀងតុង ប្រធានអគ្គនាយកនៃហត្ថាកសិករ លីមីតធីត បានមានប្រសាសន៍ថា៖ «គណៈគ្រប់គ្រង និងបុគ្គលិកហត្ថាកសិករទាំងអស់ រួមទាំងរូបខ្ញុំបាទ ពិតជាមាន សេចក្តីរីករាយ ដែលពួកយើងបានចូលរួមចំណែក ក្នុងការអភិវឌ្ឍវិស័យអប់រំ តាមសហគមន៍នានា ហើយរំពឹងថា អគារការិយាល័យថ្មី នឹងជួយឲ្យលោកគ្រូអ្នកគ្រូ ព្រមទាំងក្មួយៗសិស្សានុសិស្ស មានភាពងាយស្រួល ក្នុងធ្វើការងារប្រចាំថ្ងៃ និងសិក្សារៀនសូត្រ។ វាជាការតាំងចិត្តរបស់យើងទាំងអស់គ្នា ក្នុងការចូលរួមអភិវឌ្ឍន៍ប្រទេសរបស់យើង ទោះតិចក្តីឬច្រើនក្តី»។
អគារការិយាល័យសិក្សា ដែលត្រូវប្រគល់ជូននេះមានបន្ទប់ធ្វើការចំនួន២ និងបន្ទប់ប្រជុំចំនួន១ ដែលមានក្រឡាផ្ទៃសរុប១៤៤ ម៉ែត្រការ៉េ។ បន្ទាប់ពីបានទទួលនូវអគារថ្មីនាពេលនេះ អគារការិយាល័យសិក្សាចាស់ នឹងត្រូវបានរៀបចំជាបន្ទប់សិក្សារបស់សិស្ស ចំនួន៤ថ្នាក់ជំនួសវិញ ដែលអាចឲ្យសិស្សានុសិស្ស មានថ្នាក់រៀនកាន់ច្រើនជាងមុន។ ក្រៅពីនេះ ក៏មានការផ្តល់ជូននូវសម្ភារសិក្សា ដែលមានដូចជាសៀវភៅ និងប៊ិចជាដើម ដល់សិស្សពូកែចំនួន១៨៧នាក់ និងថវិកាដល់លោកគ្រូអ្នកគ្រូចំនួន១៧០នាក់។
ក្នុងពិធីនោះ លោក ឆេង រិទ្ធ នាយកនៃសាលាបឋមសិក្សាពោធិ៍សាត់ បានថ្លែងអំណរគុណជាអនេកចំពោះហត្ថាកសិករ ដែលបានយកចិត្តទុកចំពោះវិស័យអប់រំនៅក្នុងខេត្តពោធិ៍សាត់នេះ។ លោក ឆេង រិទ្ធ បញ្ជាក់ថា អគារការិយាល័យនេះ នឹងជួយឲ្យលោកគ្រូអ្នកគ្រូ មានកន្លែងធ្វើការងារនិងប្រជុំបានសមរម្យជាងមុន។
នេះមិនមែនជាលើកទីមួយទេ ហត្ថាកសិករ ចូលរួមចំណែកក្នុងការអភិវឌ្ឍសហគមន៍ នៅក្នុងខេត្តពោធិ៍សាត់។ កាលពីពេលកន្លងទៅនេះ ហត្ថាកសិករ បានសាងសង់អគារក្នុងមន្ទីរពេទ្យបង្អែកភ្នំក្រវាញ ព្រមទាំងអគារសិក្សា និងសមិទ្ធផលផ្សេងៗទៀតជាច្រើន។
ហត្ថាកសិករ ត្រូវបានសាធារណជនទទួលស្គាល់ថា ជាគ្រឹះស្ថានមីក្រូហិរញ្ញវត្ថុ ដែលមានភាពរឹងមាំផ្នែកហិរញ្ញវត្ថុ និងមានភាពចាស់ទុំជាងគេ ក្នុងដំណើរការអាជីវកម្ម តាំងពីដើមទស្សវត្សរ៍ទី៩០មក។ ជាងនេះទៅទៀត ហត្ថាកសិករ ជានិច្ចកាល តែងតែបង្ហាញខ្លួនយ៉ាងសកម្ម ក្នុងតួនាទីជាគ្រឹះស្ថានឯកជន ដែលបានបរិច្ចាគធនធានផ្ទាល់ខ្លួន ដើម្បីអភិវឌ្ឍសហគមន៍ ទាំងក្នុងវិស័យសុខាភិបាល វិស័យអប់រំ ព្រមទាំងការបង្កើតជាឱកាសការងារ ការចែករំលែកចំណេះដឹង លើការគ្រប់គ្រងហិរញ្ញវត្ថុផ្ទាល់ខ្លួន និងជាពិសេសការដោះស្រាយ និងនីតិវិធីចាកចេញពីបំណុល នៅតាមសហគមន៍នានា។
គួរបញ្ជាក់ថា ហត្ថាកសិករ គឺជាគ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើសន្សំធំជាងគេ លំដាប់ទី ៣ នៅក្នុងប្រទេសកម្ពុជា ដែលទទួលបានអាជ្ញាបណ្ណពីធនាគារជាតិនៃកម្ពុជា។ ដោយបានធ្វើប្រតិបត្តិការអស់រយៈពេលជាង២០ឆ្នាំមកហើយនៅលើទីផ្សារហិរញ្ញវត្ថុ ហត្ថាកសិករ គឺជាគ្រឹះស្ថានមីក្រូហិរញ្ញវត្ថុឈានមុខគេមួយ ដែលផ្តល់សេវាកម្មហិរញ្ញវត្ថុចម្រុះ ដល់អាជីវកម្មខ្នាតតូចបំផុត និងតូច ដល់អតិថិជនដូចជា៖ ឥណទានខ្នាតតូចបំផុត ឥណទានខ្នាតតូច និងមធ្យម ឥណទានគេហដ្ឋាន ឥណទានកែលម្អគេហដ្ឋាន សេវាប្រាក់បញ្ញើសន្សំ និងសេវាផ្ទេរប្រាក់ក្នុងស្រុក រួមទាំងសេវាកម្ម ហិរញ្ញវត្ថុផ្សេងៗជាច្រើនទៀត តាមរយៈសាខាចំនួន១៧៨ និងម៉ាស៊ីនអេធីអឹមចំនួន ១២៩ គ្រឿងនៅទូទាំងប្រទេស។ ហត្ថាកសិករ មានសេវាធនាគារចល័ត ដែលជាសេវាកម្មងាយស្រួលនិងឆ្លាតវៃសម្រាប់បំរើ និងបំពេញតម្រូវការអតិថិជន គ្រប់ពេលវេលា និងគ្រប់ទីកន្លែង។ គិតត្រឹមខែសីហា ២០១៨ សមតុល្យប្រាក់បញ្ញើសន្សំរបស់ហត្ថាកសិករ មានចំនួនជាង ៤២០ លានដុល្លារអាមេរិក ជាមួយនឹងចំនួនអតិថិជន ប្រាក់បញ្ញើសន្សំជាង ២៣០,០០០ នាក់ ផលប័ត្រឥណទានសរុបមាន ចំនួនប្រមាណ ៦៨៣ លានដុល្លារអាមេរិក ដោយមានអតិថិជនចំនួន ជាង១៣០,០០០ នាក់។ ទ្រព្យសកម្មសរុប របស់ហត្ថាកសិករមានចំនួន៨៤៣លានដុល្លារអាមេរិក។
នៅឆ្នាំ២០១៦ ហត្ថាកសិករ បានក្លាយជាបុត្រសម្ព័ន្ធនៃធនាគារក្រុងស្រ៊ី ដែលជាធនាគារធំជាងគេលំដាប់ទី៥ នៅព្រះរាជាណាចក្រថៃ និងជាសមាជិកនៃធនាគារ MUFG សម្ព័ន្ធធនាគារ ដែលធំជាងគេនៅប្រទេសជប៉ុន និងជាក្រុមហិរញ្ញវត្ថុ ធំបំផុតមួយនៅក្នុងពិភពលោក៕
(អត្ថបទពាណិជ្ជកម្ម)