រដ្ឋមន្ត្រីមហាផ្ទៃ៖ អ្នកគោរពសាលក្រម មិនគួរដកសិទ្ធិនយោបាយដល់ទៅ៥ឆ្នាំទេ

ជាតិ

នយោបាយជាតិ

រដ្ឋមន្ត្រីមហាផ្ទៃ៖ អ្នកគោរពសាលក្រម មិនគួរដកសិទ្ធិនយោបាយដល់ទៅ៥ឆ្នាំទេ

04, Dec 2018 , 9:39 pm

រូបភាព

រូបពីទំព័រហ្វេសប៊ុករបស់សម្តេច ស ខេង

ដោយ: ថ្មីៗ

វាជាសញ្ញាវិជ្ជមានមួយបន្ថែមទៀត សម្រាប់ថ្នាក់ដឹកនាំទាំង១១៧នាក់នៃអតីតគណបក្សសង្គ្រោះជាតិ នៅពេលសម្តេច ស ខេង រដ្ឋមន្ត្រីក្រសួងមហាផ្ទៃ បានលើកឡើងថា ភាគច្រើនក្នុងចំណោមពួកគេ បានគោរពតាមសាលក្រមរបស់តុលាការកំពូល។ បើតាមការលើកឡើងរបស់រដ្ឋមន្ត្រីមហាផ្ទៃ អ្នកដែលគោរពតាមសាលក្រម អាចនឹងមានឱកាសបានវិលមកកាន់ឆាកនយោបាយវិញ មុនកាលកំណត់។

សម្តេច ស ខេង មើលឃើញថា អ្នកដែលមិនគោរពសាលក្រម មានតែមួយចំនួនតូចប៉ុណ្ណោះ។ រដ្ឋមន្ត្រី ដែលមានដែនសមត្ថកិច្ចក្នុងការគ្រប់គ្រងគណបក្សនយោបាយ បានបញ្ជាក់យ៉ាងដូច្នេះថា៖«មិនមែនថា អ្នកទាំងអស់ហ្នឹង ទាល់តែ៥ឆ្នាំ បានផុតទេ ទោះគោរពសាលក្រមឬមិនគោរពក្តី។ យើង ត្រូវបត់បែន។ ការពិត មួយចំនួនធំ គឺគោរព ហើយយើងត្រូវទទួលស្គាល់។ ប៉ុន្តែសាលក្រមរបស់តុលាការកំពូល ដែលដាក់បម្រាមហ្នឹង គឺបិទផ្លូវតវ៉ា អត់មានទុកច្រកចេញបានទេ។ ទាល់តែ៥ឆ្នាំ បានផុត។ អ៊ីចឹង ដើម្បីបើកច្រកនិងដោះស្រាយបញ្ហាហ្នឹង វាមានតែធ្វើវិសោធនកម្មច្បាប់។ ឥឡូវ រដ្ឋសភាកំពុងធ្វើសេចក្តីស្នើច្បាប់ ដើម្បីផ្តល់លទ្ធភាពដល់អ្នកដែលបានគោរពសាលក្រម ដោយដកបម្រាម ចេញពីពួកគេ»។

ការថ្លែងរបស់សម្តេច ស ខេង គឺធ្វើឡើងក្នុងសិក្ខាសាលាស្តីពីការផ្សព្វផ្សាយភារកិច្ចរបស់គណៈកម្មាធិការជាតិប្រឆាំងទារុណកម្មនិងការអនុវត្តបទដ្ឋានសិទ្ធិមនស្សអន្តរជាតិ នៅថ្ងៃទី៤ ខែវិច្ឆិកា ឆ្នាំ២០១៨។

នៅថ្ងៃទី៣ ខែធ្នូឆ្នាំ២០១៨ រដ្ឋាភិបាលកម្ពុជា តាមរយៈក្រសួងការបរទេស បានសេចក្តីថ្លែងការណ៍មួយ ដោយប្រកាសថា រដ្ឋសភា កំពុងសិក្សាពីសេចក្តីស្នើច្បាប់ ដើម្បីបើកផ្លូវឲ្យអ្នកដែលត្រូវហាមឃាត់ក្នុងការធ្វើនយោបាយ អាចត្រឡប់មកធ្វើនយោបាយឡើងវិញ។ ក្នុងសេចក្តីថ្លែងការណ៍ រដ្ឋាភិបាល បញ្ជាក់ថា ការធ្វើដូច្នេះ គឺដើម្បីលើកកម្ពស់លទ្ធិប្រជាធិបតេយ្យនិងនីតិរដ្ឋ រួមទាំងឈរលើស្មារតីផ្សះផ្សារជាតិ។

ក្រោយមក លោក ឡេង ប៉េងឡុង អ្នកនាំពាក្យរដ្ឋសភា ក៏បានធ្វើសន្និសីទកាសែតមួយភ្លាម អំពីរឿងនេះ។ អ្នកនាំពាក្យរូបនេះ ថ្លែងក្នុងសន្និសីទកាសែតថា ការដែលតំណាងរាស្ត្រ បានស្នើច្បាប់នេះឡើង គឺដោយសារតែខ្លឹមសារនៃច្បាប់មុន មានភាពខ្វះចន្លោះ។

មាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ បានចែងថា៖«ក្នុងករណី ដែលគណបក្សនយោបាយ ត្រូវបានរំលាយ តុលាការអាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។

ប៉ុន្តែ មាត្រានេះ នឹងត្រូវធ្វើសោធនកម្មនាពេលខាងមុន។ ខ្លឹមសារថ្មី ដែលនឹងត្រូវបញ្ចូលក្នុងមាត្រានេះ គឺនាយករដ្ឋមន្ត្រី អាចមានសិទ្ធិ ថ្វាយសំណើទៅព្រះមហាក្សត្រ ដើម្បីទូលសុំព្រះអង្គ ឲ្យផ្តល់នីតិសម្បទាដល់អ្នកដែលត្រូវដកសិទ្ធិនយោបាយ ហើយឲ្យពួកគេ អាចធ្វើនយោបាយវិញ មុនកាលកំណត់របស់តុលាការកំពូល។

សូមបញ្ជាក់ថា តុលាការកំពូល បានរំលាយគណបក្សសង្គ្រោះជាតិផង និងបានហាមថ្នាក់ដឹកនាំ១១៨នាក់ (ស្លាប់ម្នាក់) នៃគណបក្សនេះ មិនឲ្យធ្វើនយោបាយរយៈពេល៥ឆ្នាំផង៕