ជាតិ
នយោបាយជាតិ
មេធាវី៖ ឲ្យតែដំណោះស្រាយដើម្បីប្រយោជន៍ជាតិ លោក កឹម សុខា តែងគាំទ្រ សម្តេច ហ៊ុន សែន និង លោក កឹម សុខា ចាប់ដៃគ្នាក្នុងរដ្ឋសភា កាលពីចុងឆ្នាំ២០១៦
× ក្រោយពីរដ្ឋាភិបាល ប្រកាសពីការកែប្រែច្បាប់ ដើម្បីបើកផ្លូវឲ្យអ្នកដែលត្រូវបានដកសិទ្ធិនយោបាយ អាចចូលធ្វើនយោបាយវិញ និងបង្ហាញពីឆន្ទៈក្នុងការពង្រឹងសិទ្ធិមនុស្សនៅកម្ពុជា មេធាវីរបស់លោក កឹម សុខា ក៏បានរំលេចនូវការសាទររបស់លោក កឹម សុខា លើរឿងនេះ។
លោក ផែង ហេង មេធាវីម្នាក់របស់លោក កឹម សុខា បានប្រាប់សារព័ត៌មានថ្មីៗតាមទូរសព្ទថា គោលជំហររបស់លោក កឹម សុខា គឺតែងតែគាំទ្រទង្វើឬដំណោះស្រាយទាំងឡាយ ដែលជាប្រយោជន៍ជាតិ ហើយលើកកម្ពស់ប្រជាធិបតេយ្យនិងសិទ្ធិមនុស្ស។ លោក បញ្ជាក់យ៉ាងដូច្នេះថា៖«តែឲ្យដំណោះស្រាយណាសមស្រប គឺគាត់មិនដែលជំទាស់ទេ។ តែគាត់មិនមែនគាំទ្ររដ្ឋាភិបាលទេ កុំច្រឡំ»។
រដ្ឋាភិបាល ប្រកាសថា ការកែប្រែច្បាប់នេះ គឺដើម្បីលើកស្ទួលទ្ធិប្រជាធិបតេយ្យនិងនីតិរដ្ឋនៅកម្ពុជា។ នៅព្រឹកថ្ងៃទី៥ ខែធ្នូ ឆ្នាំ២0១៨ គណៈកម្មាធិការអចិន្ត្រៃយ៍រដ្ឋសភា បានបើកកិច្ចប្រជុំ ដើម្បីពិភាក្សាពីសំណើសុំកែប្រែមាត្រា៤៥ថ្មី (ស្ទួន) នៃច្បាប់ស្តីពីគណបក្សនយោបាយ។
មាត្រានេះ បានចែងថា៖«ក្នុងករណី ដែលគណបក្សនយោបាយ ត្រូវបានរំលាយ តុលាការអាចសម្រេចហាមឃាត់ការធ្វើសកម្មភាពនយោបាយរបស់ថ្នាក់ដឹកនាំនៃគណបក្សនយោបាយនោះ សម្រាប់រយៈពេល ៥ឆ្នាំ»។
យ៉ាងណាក៏ដោយ អ្នក ដែលត្រូវតុលាការកំពូល ដកសិទ្ធិនយោបាយ អាចនឹងមានឱកាសបានចូលធ្វើនយោបាយវិញ មុនកាលកំណត់ នៅពេលមាត្រា៤៥ថ្មី (ស្ទួន) ត្រូវបានធ្វើវិសោធនកម្មរួច។ ខ្លឹមសារថ្មី ដែលនឹងត្រូវបញ្ចូលក្នុងមាត្រានេះ គឺ នាយករដ្ឋមន្ត្រី អាចមានសិទ្ធិ ថ្វាយសំណើទៅព្រះមហាក្សត្រ ដើម្បីទូលសុំព្រះអង្គ ឲ្យផ្តល់នីតិសម្បទាដល់អ្នកដែលត្រូវដកសិទ្ធិនយោបាយ ហើយឲ្យពួកគេ អាចធ្វើនយោបាយវិញ។
សូមបញ្ជាក់ថា តុលាការកំពូល បានហាមថ្នាក់ដឹកនាំ១១៨នាក់ (ស្លាប់ម្នាក់) នៃអតីតគណបក្សសង្គ្រោះជាតិ មិនឲ្យធ្វើនយោបាយរយៈពេល៥ឆ្នាំ៕
Tag:
កឹម សុខា
ច្បាប់នយោបាយ
© រក្សាសិទ្ធិដោយ thmeythmey.com