ជាតិ
សង្គមជាតិ
សមត្ថកិច្ច៖ ថៅកែកំពង់ចម្លងអរិយក្សត្រ ទំនងជាមានវិបត្តិ ទើបបាញ់ខ្លួនឯង
×![]()
លោក វ៉ាន់ រ៉ាម៉ុន ម្ចាស់កំពង់ចម្លងភ្នំពេញ-អរិយក្សត្រ បានបាញ់សម្លាប់ខ្លួនឯង នៅក្នុងបន្ទប់ស្នាក់ការកំពង់ចម្លងភ្នំពេញ-អរិយក្សត្រ កាលពីថ្ងៃទី៤ខែធ្នូ។ ករណីបាញ់សម្លាប់ខ្លួនឯង នេះ ត្រូវបានសមត្ថកិច្ច សង្ស័យថាមានវិបត្ដិផ្ទាល់ខ្លួន។ នេះបើតាមការចុះផ្សាយរបស់អគ្គស្នងការនគរបាលជាតិ។
ការចុះផ្សាយរបស់ស្នងការនគរបាលជាតិ បានឲ្យដឹងថា ជនរងគ្រោះខាងលើ មានអាយុ៥៧ឆ្នាំ ជានាយករង នៃនាយកដ្ឋានអន្តោប្រវេសន៍ និងជាម្ចាស់ភាគហ៊ុនកំពង់ចម្លងទូកអរិយក្សត្រ-ភ្នំពេញ ដែលរស់នៅក្នុងភូមិ៤ សង្កាត់មិត្តភាព ខណ្ឌ៧មករា រាជធានីភ្នំពេញ។
នគរបាលជាតិ បានស្រង់សម្តីរបស់លោក វ៉េង ដារិទ្ធ អ្នកតំណាងដែលមើលការខុសត្រូវចំពោះកំពង់ចម្លង ទៅចុះផ្សាយថា៖«នៅមុនពេលកើតហេតុ ខ្ញុំបានចូលក្នុងផ្ទះកន្លែងស្នាក់ការកំពង់ចម្លងរបស់គាត់ (ជនរងគ្រោះ) ដើម្បីបូមប្រេង។ ពេលចូលទៅ ទ្វាររបងបិទខ្ទាស់គន្លឹះក្នុងជាប់ ខ្ញុំក៏ផ្លោះរបងចូលរួចរៀបទុយោប្រេងបូម រួចហើយក៏ទៅគោះទ្វារបន្ទប់ជនរងគ្រោះជាថៅកែ ដើម្បីរាយការណ៍ពីចំណូលចំណាយ តែមិនឮការឆ្លើយតប។ ពេលនោះខ្ញុំ ក៏ច្រានទ្វារចូល ស្រាប់តែឃើញជនរងគ្រោះដេកស្លាប់លើគ្រែដែកក្រាលពូក និងហូរឈាមពេញលើឥដ្ឋការ៉ូ បន្ទាប់មកក៏រាយការណ៍ជូនសមត្ថកិច្ចមូលដ្ឋាន»។
ក្រោយសមត្ថកិច្ចមូលដ្ឋានទទួលបានព័ត៌មានពីការធ្វើអត្ដឃាតខាងលើ កម្លាំងជំនាញស្រុក បានសហការជាមួយកម្លាំងជំនាញបច្ចេកទេសខេត្ត មណ្ឌលសុខភាពអរិយក្សត្រ និងក្រុមប្រឹក្សាឃុំ ហើយបានពិនិត្យសាកសពនិងសន្និដ្ឋានថា៖«ជនរងគ្រោះធ្វើអត្តឃាតបាញ់សម្លាប់ខ្លួនឯង ដោយប្រើបាស់អាវុធខ្លីម៉ាក K59 របស់ខ្លួនបាញ់១គ្រាប់ លើសៀតផ្កាខាងស្ដាំ ធ្លាយមកសៀតផ្កាខាងឆ្វេងស្លាប់នៅលើគ្រែ។
ជុំវិញរឿងនេះ សារព័ត៌មានថ្មីៗ មិនអាចសុំការបកស្រាយពី លោក អ៊ាវ ចំរើន ស្នងការខេត្តកណ្តាលបានឡើយ ដោយលោក ប្រាប់ថា មិនទាន់ទទួលបានព័ត៌មានផ្លូវការ៕
Tag:
កំពង់ចម្លងភ្នំពេញ-អរិយក្សត្រ
អត្តឃាត
© រក្សាសិទ្ធិដោយ thmeythmey.com
