កម្ពុជា ទិញអគ្គិសនីពីឡាវ មកផ្តត់ផ្តង់តាមព្រំដែន និងតភ្ជាប់ស្ពានរវាងប្រទេសទាំងពីរ

ជាតិ

នយោបាយជាតិ

កម្ពុជា ទិញអគ្គិសនីពីឡាវ មកផ្តត់ផ្តង់តាមព្រំដែន និងតភ្ជាប់ស្ពានរវាងប្រទេសទាំងពីរ

05, Dec 2018 , 9:39 pm

រូបភាព

នាយករដ្ឋមន្ត្រីកម្ពុជា-ឡាវ ធ្វើសន្និសីទកាសែតជាមួយគ្នា នៅថ្ងៃទី៥ ខែធ្នូ ឆ្នាំ២០១៨។ រូបពីទំព័រហ្វេសប៊ុករបស់សម្តេច ហ៊ុន សែន

ដោយ: ថ្មីៗ

រដ្ឋាភិបាលឡាវ បានយល់ព្រមតភ្ជាប់អគ្គិសនី មកកាន់តំបន់នានា នៅតាមព្រំដែនកម្ពុជា-ឡាវ។ ការយល់ព្រមនេះ គឺធ្វើឡើងក្នុងជំនួបរវាងនាយករដ្ឋមន្ត្រីនៃប្រទេសទាំងពីរ នៅថ្ងៃទី៥ ខែធ្នូ ឆ្នាំ២០១៨។

ក្រោយបញ្ចប់កិច្ចពិភាក្សា នាយករដ្ឋមន្ត្រីទាំងពីរ បានធ្វើសន្និសីទកាសែតរួមគ្នា។ សម្តេច ហ៊ុន សែន បានបញ្ជាក់យ៉ាងដូច្នេះថា៖«ប្រជាពលរដ្ឋ ដែលរស់តាមព្រំដែន គួរតែមានក្តីសប្បាយរីករាយ ដោយមានការចុះហត្ថលេខា លើការតភ្ជាប់អគ្គិសនីពីឡាវទៅផ្តត់ផ្គង់នៅកម្ពុជា ដែលជាផ្នែកមួយដ៏សំខាន់នៃកិច្ចសហប្រតិបត្តិការក្នុងវិស័យពាណិជ្ជកម្ម»។

ក្រៅពីនេះ ក៏មានការឯកភាពគ្នាលើការតភ្ជាប់ស្ពានរវាងប្រទេសទាំងពីរផងដែរ។ ប្រមុខរដ្ឋាភិបាលកម្ពុជា បានលើកឡើងថា ប្រទេសទាំងពីរ នឹងតភ្ជាប់ស្ពាន ពីភាគខាងជើងនៃខេត្តស្ទឹងត្រែងនិងខេត្តព្រះវិហារ រហូតដល់ខេត្តចំប៉ាសាក់ ដើម្បីផ្ដល់ឱកាសឲ្យប្រជាជនប្រទេសទាំងសងខាង ងាយស្រួលក្នុងការធ្វើដំណើរ និងបង្កើតទំនាក់ទំនងជាមួយគ្នា។

លោក ថងលូន ស៊ីសូលីត នាយករដ្ឋមន្ត្រីឡាវ បានថ្លែងថា ឯកសារភាគីទាំងពីរ បានចុះហត្ថលេខាជាមួយគ្នា នឹងត្រូវយកទៅអនុវត្តឲ្យបានល្អប្រសើរ។ លោក សង្កត់បែបនេះថា៖«បើបញ្ហាណាដែលយើងអនុវត្តមិនបានល្អទេ យើងនឹងសហការគ្នាដើម្បីដោះស្រាយបញ្ហានោះជាមួយគ្នា»។

គណៈប្រតិភូកម្ពុជា ទៅបំពេញទស្សនកិច្ចពីរថ្ងៃ គឺនៅថ្ងៃទី៥-៦ ខែធ្នូ ឆ្នាំ២០១៨។ បន្ទាប់មក គណៈប្រតិភូកម្ពុជា នឹងបន្តទៅបំពេញទស្សនកិច្ចនៅវៀតណាម៕